தமிழக கடற்பகுதிகளில் மீன்களின் இனப்பெருக்கத்தை ஊக்குவிக்கும் வகையில் ஒவ்வொரு ஆண்டும் ஏப்ரல் 15 முதல் ஜூன் 15 வரை 61 நாட்கள் மீன்பிடி தடைக்காலம் அமல்படுத்தப்படுகிறது. இந்த ஆண்டுக்கான தடைக்காலம் இன்று நள்ளிரவுடன் முடிவடைய உள்ள நிலையில், தூத்துக்குடி மாவட்ட மீனவர்கள் நாளை (ஜூன் 16) அதிகாலை 5 மணி முதல் கடலுக்கு மீன்பிடிக்கச் செல்ல தயாராகி வருகின்றனர். இதனால் மாவட்டத்தின் மீன் பிடி துறைமுகங்கள் பரபரப்பான காட்சியளிக்கின்றன.
தூத்துக்குடி, தருவைகுளம், வேம்பார் உள்ளிட்ட பகுதிகளிலிருந்து சுமார் 600க்கும் மேற்பட்ட விசைப்படகுகள் நாளை கடலுக்கு புறப்படும் என எதிர்பார்க்கப்படுகிறது. கடந்த 61 நாட்களாக வெறிச்சோடிக் கிடந்த துறைமுகப் பகுதிகள் தற்போது மீனவர்களின் ஆரவாரத்தால் உயிர்பெற்றெழுந்துள்ளன. மீனவர்கள் தங்கள் படகுகளைப் பழுதுபார்த்து, சுத்தம் செய்து, மீன்பிடி வலைகள், உபகரணங்கள், உணவுப் பொருட்கள் உள்ளிட்ட அத்தியாவசியப் பொருட்களை ஏற்றி வருகின்றனர். படகுகளை முழுமையாகத் தயார் செய்யும் பணியில் மீனவர்கள் குடும்பத்துடன் ஈடுபட்டுள்ளதால் துறைமுகம் களை கட்டியுள்ளது.
இந்த ஆண்டு நல்ல மீன் விசை எதிர்பார்ப்பதாக மீனவர்கள் தெரிவித்துள்ளனர். “படகுகளைப் பழுதுபார்க்க மட்டும் ஐந்து லட்சம் முதல் பத்து லட்சம் ரூபாய் வரை செலவழித்துள்ளோம். இந்த முறை போதிய அளவில் மீன்கள் கிடைத்தால் எங்களின் இழப்பை ஈடுகட்ட முடியும்” என அவர்கள் மகிழ்ச்சியுடன் கூறுகின்றனர்.
எனினும், டீசல் விலை உயர்வு அவர்களுக்கு பெரும் சவாலாக உள்ளது. “தடைக்காலத்துக்கு முன்பு டீசல் விலை ஒப்பீட்டளவில் குறைவாக இருந்தது. தற்போது லிட்டருக்கு பத்து ரூபாய் உயர்ந்துள்ளது. இதனால் தினசரி செலவு அதிகரித்து, அடிக்கடி கடலுக்கு செல்ல முடியாத நிலை ஏற்படும்” என மீனவர்கள் வருத்தம் தெரிவித்தனர். எனவே மத்திய அரசு டீசல் விலையைக் குறைக்க உடனடி நடவடிக்கை எடுக்க வேண்டும் என அவர்கள் கோரிக்கை விடுத்துள்ளனர்.
மேலும், கடந்த ஜூன் 10ம் தேதி முதல் கேரள கடல் பகுதிகளில் மீன்பிடி தடை அமலில் உள்ளதால், தூத்துக்குடி மீனவர்களுக்கு டீசல் தட்டுப்பாடு ஏற்படாது என எதிர்பார்க்கப்படுகிறது. கேரளாவில் மீன் பிடிப்பு குறைவாக இருப்பதால், தங்களுக்கு நல்ல விலை கிடைக்கும் என மீனவர்கள் நம்பிக்கை தெரிவித்துள்ளனர்.
இதனிடையே, மீனவர்களுக்கு கூட்டுறவு சங்கங்கள் மூலம் வழங்க வேண்டிய 4,500 ரூபாய் உதவித் தொகையை தமிழக அரசு உடனடியாக வழங்க வேண்டும் என அவர்கள் வலியுறுத்தியுள்ளனர். மீன்வளத்துறையின் தடைக்கால நிவாரண நிதியும் சரியான நேரத்தில் கிடைக்க வேண்டும் என்பது அவர்களின் முக்கிய கோரிக்கையாக உள்ளது. இந்த மீன்பிடி பருவம் மீனவர்களின் வாழ்வாதாரத்தை மேம்படுத்தும் வகையில் அமைய வேண்டும் என அனைவரும் ஆவலுடன் எதிர்பார்க்கின்றனர்.
