கோவை மாநகர எல்லையில் அமைந்துள்ள சூலூர் அடுத்த பட்டணம் ஊராட்சியில் அடிப்படை வசதிகள் இல்லாததால் 30,000-க்கும் மேற்பட்ட மக்கள் கடும் அவதியடைந்து வருகின்றனர். குடிநீர், தார் சாலை, மழைநீர் வடிகால், பேருந்து நிழற்குடை போன்ற அத்தியாவசியத் தேவைகள் முறையாக வழங்கப்படவில்லை என பொதுமக்கள் உள்ளாட்சி நிர்வாகம் மீது குற்றம் சாட்டுகின்றனர்.
மழைநீர் தேங்கிய சாலைகள்; மக்கள் அவதி:
கடந்த சில தினங்களாகக் கோவை மாவட்டத்தில் பரவலாக மழை பெய்து வருகிறது. இதன் காரணமாக, பட்டணம் ஊராட்சிக்குட்பட்ட குடியிருப்புப் பகுதிகளில் சாலைகள் அனைத்தும் சேறும் சகதியுமாக மாறியுள்ளன. இதனால் வாகனங்கள் சேற்றில் சிக்கிக்கொள்வதுடன், அடிப்படைத் தேவைகளுக்காகக்கூட வெளியே செல்ல முடியாமல் மக்கள் திண்டாடி வருகின்றனர். குறிப்பாக, காவேரி நகர், ரங்கா நகர் போன்ற பகுதிகளில் தார் சாலைகள் இல்லாததால் மழைநீர் தேங்கி, சகதியாகக் காட்சியளிப்பது மக்களின் இயல்பு வாழ்க்கையைப் பெரிதும் பாதித்துள்ளது.
நூதன போராட்டம்; உடனடி கோரிக்கை:
இந்நிலையில், இன்று அதிகாலை பட்டணம் ஊராட்சியில் தேங்கிக் கிடந்த மழைநீரில் நாற்று நட்டு அப்பகுதி மக்கள் நூதன முறையில் போராட்டத்தில் ஈடுபட்டனர். உடனடியாகத் தார் சாலை அமைத்து, மழைநீர் வடிகால் வசதி ஏற்படுத்த வேண்டும் என்று அவர்கள் கோரிக்கை விடுத்தனர். அதிகாரிகள் தொடர்ந்து அலட்சியம் காட்டினால், அரசின் கவனத்தை ஈர்க்கும் வகையில் தொடர் போராட்டங்களை முன்னெடுப்போம் எனவும் அவர்கள் எச்சரித்துள்ளனர்.
