விஜய் மீது நடிகர் அனுமோகன் கூறிய கருத்து அவருடைய சொந்த கருத்து, அதற்கும் தனக்கும் எந்த சம்பந்தமும் இல்லை என நடிகரும் தயாரிப்பாளருமான லெனின் தெரிவித்துள்ளார்.
’ரெட் லேபிள்’ என்ற திரைப்படம் வரும் பிப்ரவரி 6-ம் தேதி வெளியாகவுள்ளது. இப்படத்தின் பத்திரிக்கையாளர் சந்திப்பு சென்னை சாலிகிராமத்தில் நடைபெற்றது. இதில் படத்தின் நாயகனும், தயாரிப்பாளருமான லெனின், ஹீரோயின் அஸ்மின், இசையமைப்பாளர் கைலாஷ் மேனன், நடிகர் அனுமோகன் உட்பட படக்குழுவினர் கலந்து கொண்டனர். அப்போது செய்தியாளர்கள் படக்குழுவினரிடம் பல்வேறு கேள்விகளை எழுப்பினர்.
அவ்வாறு அனுமோகனிடம் 2026 சினிமா உலகில் மாற்றம் ஏற்படும் என சொல்கிறீர்களே, அரசியல் களத்திலும் அதுபோல் மாற்றம் ஏற்படுமா என செய்தியாளர்கள் கேள்வி எழுப்பினர். அதற்கு பதிலளித்த அவர், ”நிச்சயமாக மாற்றம் ஏற்படும். ஆனால் நீங்கள் எதிர்பார்க்கும் மாற்றம் நிகழாது. அனைத்து ஊடகங்களிலும் ஒருவரின் பெயரை அதிகமாக ஒளிப்பரப்பட்டு வருகிறதல்லவா? அவருக்கு பெரிய ஆப்பு காத்துக் கொண்டிருக்கிறது” என மறைமுகமாக தமிழக வெற்றிக் கழக தலைவர் விஜய்யை விமர்சித்திருந்தார். இந்த வீடியோ இணையத்தில் பேசுபொருளாக மாறியது.
இந்த நிலையில் இது குறித்து விளக்கமளித்துள்ள ’ரெட் லேபிள்’ படத்தின் தயாரிப்பாளரும், நடிகருமான லெனின், ”அனுமோகனின் கருத்து அவருடைய சொந்த கருத்து எனவும், அதில் தனக்கு உடன்பாடு இல்லை, நானும் ஒரு தளபதி ரசிகர் தான்” எனவும் வீடியோ வெளியிட்டுள்ளார்.
