யார் இந்த ஜெகதீஷ் பழனிசாமி..?? முதல்வர் விஜய்யின் தனிச் செயலராக நியமனம்..!!

தமிழக முதல்வர் ஜோசப் விஜய்யின் தனிச் செயலராக ஜெகதீஷ் பழனிசாமி நியமிக்கப்பட்டுள்ளதாக தகவல் வெளியாகியுள்ளது.

சென்னை: தமிழக முதலமைச்சர் சி. ஜோசப் விஜய்யின் தனிச் செயலாளராக (அரசியல்) ஜெகதீஷ் பழனிசாமி நியமிக்கப்பட்டுள்ளார். தமிழக அரசின் பொதுத்துறை முதன்மைச் செயலாளர் ரீட்டா ஹரீஷ் தக்கர் இதற்கான உத்தரவைப் பிறப்பித்துள்ளார். மே 12-ம் தேதி நடைபெற்ற இந்த நியமனம் குறித்த அதிகாரப்பூர்வ அறிவிப்பு இப்போது வெளியாகியுள்ளது. இவருக்கான பணி நிபந்தனைகள் விரைவில் தனியாக அறிவிக்கப்படும் என்று உத்தரவில் தெரிவிக்கப்பட்டுள்ளது.

ஜெகதீஷ் பழனிசாமி, திரையுலகில் முதல்வர் விஜய்க்கு நீண்டகாலமாக நெருக்கமானவர். நடிகராக இருந்த காலத்தில் விஜய்யின் மேலாளராகப் பணியாற்றிய அவர், விஜய் அரசியலில் இறங்கிய பிறகு அவரது நம்பிக்கைக்குரிய உதவியாளராகவும் செயல்பட்டு வந்தார். தமிழக வெற்றிக் கழகம் (தவெக) கட்சியின் தேர்தல் வியூகம் மற்றும் வார் ரூம் நடவடிக்கைகளை மேற்கொண்ட ‘ரூட்’ அமைப்பின் நிறுவனர் என்ற பெருமையும் அவருக்கு உண்டு. அவரது அனுபவமும், விஜய்யுடனான நீண்டகால உறவும் இந்தப் பொறுப்புக்கு அவரைத் தகுதியானவராக்கியுள்ளது.

முதல்வர் விஜய்யின் பிறந்தநாளை முன்னிட்டு, ஜெகதீஷ் பழனிசாமி தனது சமூக வலைதளப் பக்கத்தில் ஒரு உணர்ச்சிகரமான பதிவை வெளியிட்டார். அதில், “கடந்த 18 ஆண்டுகளுக்கு முன்பு, உங்களுடன் ஒரு புகைப்படம் எடுத்துக்கொள்ள வேண்டும் என்ற ஆவலுடன் ஒரு தீவிர ரசிகனாக வரிசையில் நின்றிருந்தேன். இன்று, அதே நான் மாநிலத்தின் முதல்வரின் தனிச் செயலராக உங்கள் அருகில் நிற்கிறேன். வாழ்க்கை முழு வட்டம். சுற்றி மீண்டும் அதே இடத்துக்கு வந்ததுபோல் உணர்கிறேன்” என்று குறிப்பிட்டார்.

மேலும், கடினமான காலங்களில் விஜய் தனக்குத் தந்த உற்சாகமும் ஆற்றலும் வார்த்தைகளால் விவரிக்க முடியாதவை என்றும், தனது வாழ்க்கைப் பயணத்தில் அவர் ஏற்படுத்திய தாக்கத்துக்கும் தொடர்ந்து ஊக்கமளித்து வருவதற்கும் என்றும் நன்றியுடன் இருப்பதாகவும் அவர் பதிவு செய்துள்ளார். இந்தப் பதிவு அவரது பயணத்தின் உணர்ச்சிகரமான பக்கத்தை வெளிப்படுத்துகிறது.

இந்த நியமனம், முதல்வர் விஜய்யின் நிர்வாக அமைப்பில் முக்கியமான மாற்றமாகப் பார்க்கப்படுகிறது. திரையுலக அனுபவத்துடன் அரசியல் தளத்திலும் தனது திறமையை நிரூபித்த ஜெகதீஷ் பழனிசாமி, முதல்வரின் அன்றாட அரசியல் மற்றும் நிர்வாகப் பணிகளில் முக்கியப் பங்கு வகிப்பார் என எதிர்பார்க்கப்படுகிறது. இந்த நடவடிக்கை தவெக அரசின் செயல்பாடுகளுக்கு புதிய வேகத்தை அளிக்கும் என்று அரசியல் வட்டாரங்கள் கருதுகின்றன.