மீண்டும் தலைதூக்கும் கரூர் கூட்ட நெரிசல் வழக்கு..!! செந்தில் பாலாஜி இல்லத்தில் குவிந்த போலீஸ்..!!

முன்னாள் அமைச்சர் செந்தில் பாலாஜியின் இல்லத்திற்கு கரூர் போலீசார் விசாரணைக்காக சென்றனர்.

தமிழக வெற்றிக் கழகம் (தவெக) தலைவர் விஜய்யின் பொதுக்கூட்டத்தில் ஏற்பட்ட பெரும் மக்கள் நெரிசலில் 41 பேர் உயிரிழந்த சம்பவம் தமிழ்நாட்டு அரசியலை பெரும் புயலுக்கு உள்ளாக்கியுள்ளது. வேலுசாமிபுரம் பகுதியில் நடைபெற்ற இந்தக் கூட்டத்திற்கு பல்லாயிரக்கணக்கான மக்கள் திரண்டிருந்த நிலையில், போதிய ஏற்பாடுகள் இல்லாததால் ஏற்பட்ட துயரச் சம்பவம் பல குடும்பங்களை துயரத்தில் ஆழ்த்தியுள்ளது. ஏராளமானோர் படுகாயமடைந்து மருத்துவமனைகளில் சிகிச்சை பெற்றனர்.

கரூர்-ஈரோடு நெடுஞ்சாலையில் நடைபெற்ற இந்த பொதுக்கூட்டத்திற்கு விஜய் சுமார் ஏழு மணி நேரம் தாமதமாக வந்ததாகக் கூறப்படுகிறது. அனுமதிக்கப்பட்ட எண்ணிக்கையை விட பல மடங்கு அதிகமான மக்கள் கூடியதால் இட நெருக்கடி ஏற்பட்டது. விஜய் பேசி முடித்து வெளியேறியபோது, அவரது வாகன அணிவகுப்பை நெருக்கமாகப் பார்க்க மக்கள் முண்டியடித்ததில் பெரும் நெரிசல் உருவானது. இதில் பலர் சிக்கிக் கொண்டு மூச்சுத் திணறி உயிரிழந்தனர். சம்பவ இடத்தில் உடனடியாக மீட்புப் பணிகள் தொடங்கப்பட்டபோதும், போதிய ஆம்புலன்ஸ் வசதி இல்லாததால் மேலும் சிரமம் ஏற்பட்டதாக பாதிக்கப்பட்டவர்கள் தரப்பில் குற்றச்சாட்டு எழுந்துள்ளது.

சம்பவத்திற்குப் பிறகு அரசியல் களம் பரபரப்பாகியது. தவெக தரப்பினர், முன்னாள் அமைச்சர் செந்தில் பாலாஜி மீது கடும் குற்றச்சாட்டுகளை சுமத்தினர். அவர் திட்டமிட்டு நெரிசலை ஏற்படுத்தியதாகவும், அவரது ஆதரவாளர்களின் பேனர்களுடன் ஆம்புலன்ஸ் வாகனங்கள் வந்ததாகவும், உடல்களை அவசரமாக எரித்து ஆதாரங்களை மறைக்க முயற்சித்ததாகவும் கூறினர். இதனால் உச்ச நீதிமன்ற உத்தரவின் பேரில் சிபிஐ விசாரணைக்கு உத்தரவிடப்பட்டது. விஜய் உள்ளிட்ட தவெக தலைவர்கள் மற்றும் செந்தில் பாலாஜி உள்ளிட்டோரிடம் விசாரணை நடைபெற்று வருகிறது.

காவல்துறை மற்றும் அரசு தரப்பினர், விஜய்யின் வருகை தாமதம், அளவுக்கு அதிகமான கூட்டம், பாதுகாப்பு ஏற்பாடுகளில் குறைபாடு ஆகியவற்றையே முக்கிய காரணமாகச் சுட்டிக்காட்டினர். தேர்தல் காரணமாக சிறிது நேரம் நிறுத்தி வைக்கப்பட்டிருந்த சிபிஐ விசாரணை தற்போது மீண்டும் தீவிரமடைந்துள்ளது.

இந்நிலையில், சென்னை எம்.ஆர்.சி. நகரில் உள்ள செந்தில் பாலாஜியின் இல்லத்திற்கு கரூர் போலீசார் விசாரணைக்காக சென்றனர். அவர் அங்கு இல்லாததால் வீட்டுப் பணியாளர்களிடம் விசாரணை நடத்தினர். அதேபோல் கரூரில் உள்ள அவரது இல்லத்திலும் சிபிஐ அதிகாரிகள் சோதனை மேற்கொண்டனர். இந்த விசாரணை மீண்டும் தொடங்கியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இந்தச் சம்பவம் தமிழக அரசியலில் புதிய பதற்றத்தை உருவாக்கியுள்ள நிலையில், பாதிக்கப்பட்ட குடும்பங்களுக்கு உரிய நிவாரணம் மற்றும் நீதி கிடைக்க வேண்டும் என அனைத்துத் தரப்பினரும் வலியுறுத்தி வருகின்றனர்.