கடந்த நான்கு மாதங்களாக நீடித்து வந்த அமெரிக்கா-ஈரான் இடையேயான பதற்றமான போர் நிலை, கடந்த வாரம் எட்டிய புரிந்துணர்வு ஒப்பந்தத்தால் தற்காலிகமாக அமைதியடைந்திருந்தது. ஆனால், ஹார்முஸ் ஜலசந்தியில் ஈரான் நடத்திய வணிகக் கப்பல் தாக்குதல்கள் ஒப்பந்தத்தை உடைத்தன. இதனைத் தொடர்ந்து அமெரிக்கா உடனடியாக ஒப்பந்தத்தை ரத்து செய்து, ஈரானின் முக்கிய ராணுவ மற்றும் பொருளாதார இலக்குகளைத் தீவிரமாகத் தாக்கத் தொடங்கியுள்ளது. இந்த மோதல் மீண்டும் மத்திய கிழக்கு முழுவதும் பரவலான பதற்றத்தை ஏற்படுத்தியுள்ளது.
அமெரிக்க வான்படையின் தொடர் தாக்குதல்களில் ஈரானின் தெற்குப் பகுதியில் உள்ள முக்கியத் துறைமுக நகரங்களான பந்தர் அப்பாஸ், சாபஹார் மற்றும் ஜாஸ்க் ஆகியவை முதன்மை இலக்குகளாகத் தேர்வு செய்யப்பட்டன. மேலும், ஹார்முஸ் ஜலசந்திக்கு அருகிலுள்ள மூலோபாய முக்கியத்துவம் வாய்ந்த அபு மூசா தீவிலும் ராணுவ நிலைகள் தாக்கப்பட்டன. இந்தத் தாக்குதல்கள் ஈரானின் எண்ணெய் ஏற்றுமதி மற்றும் கடற்பாதுகாப்பு அமைப்புகளை பெரிதும் பாதித்துள்ளதாக தகவல்கள் தெரிவிக்கின்றன.
ஈரான் இதற்கு உடனடி பதிலடி கொடுத்துள்ளது. அதன் புரட்சிகர காவல்படையின் கடற்படை மற்றும் விமானப்படை இணைந்து, குவைத் மற்றும் பஹ்ரைனில் உள்ள அமெரிக்க ராணுவத் தளங்களை ஏவுகணை மற்றும் டிரோன் தாக்குதல்களால் நோக்கின. குவைத் நாட்டின் அரிப்ஜான் மற்றும் அலி அல் சலேம் விமானப்படைத் தளங்கள், பஹ்ரைனின் ஜுபைர் மற்றும் ஷேக் ஈசா ராணுவக் கட்டுப்பாட்டு மையங்கள் உள்ளிட்டவை இலக்கு வைக்கப்பட்டன.
பஹ்ரைன் மற்றும் கத்தாரில் வான்வழித் தாக்குதல் எச்சரிக்கை சைரன்கள் ஒலிக்கப்பட்டன. பொதுமக்கள் வீடுகளுக்குள் தங்குமாறு அறிவுறுத்தப்பட்டுள்ளனர். குவைத் அரசு, ஈரானிலிருந்து வந்த பல டிரோன்கள் மற்றும் ஏவுகணைகளை தங்கள் வான் பாதுகாப்பு அமைப்புகள் நடுவானில் சுட்டு வீழ்த்தியதாகத் தெரிவித்துள்ளது.ஈரான் தரப்பில் வெளியிடப்பட்ட அதிகாரப்பூர்வ அறிக்கையில், அமெரிக்கா தொடர்ந்து தாக்குதல்களை நிறுத்தாவிட்டால், மத்திய கிழக்கில் உள்ள மற்ற அமெரிக்கத் தளங்களும் தரைமட்டமாக்கப்படும் என எச்சரிக்கை விடுக்கப்பட்டுள்ளது.
அமெரிக்கா தரப்போ, ஹார்முஸ் ஜலசந்தியில் வணிகக் கப்பல்கள் மீதான தாக்குதல்களுக்கான பதிலடியாகவே இந்த நடவடிக்கைகள் என்று விளக்கியுள்ளது. தாக்குதல்கள் இரண்டாவது நாளாக தீவிரமடைந்துள்ள நிலையில், ஈரானிய வெளியுறவு அமைச்சகம் அமெரிக்க அதிபர் டொனால்ட் டிரம்பை “கொலைகாரன்” என்று கடுமையாக சாடியுள்ளது. ஈரான் தனது நாட்டின் இறையாண்மை மற்றும் பாதுகாப்பைப் பாதுகாக்க எந்த எல்லைக்கும் செல்லத் தயாராக இருப்பதாக உறுதிப்படுத்தியுள்ளது. சர்வதேச சமூகம் இந்த மோதலை உடனடியாக தணிக்க நடவடிக்கை எடுக்க வேண்டும் என்கிற கோரிக்கை எழுந்துள்ளது.
