திமுக கூட்டணியை வீழ்த்த வேண்டும் என்று யாரெல்லாம் நினைக்கிறார்களோ அவர்கள் எல்லாம் எங்கள் கூட்டணியில் சேர வேண்டும் என்று தேசிய ஜனநாயக கூட்டணியில் இணைய வேண்டும் என்று அமமுக பொதுச்செயலாளர் டிடிவி தினகரன் பேசியுள்ளார்.
சென்னையில் செய்தியாளர்களை சந்தித்த அமமுக பொதுச்செயலாளர் டிடிவி தினகரன், அதிமுக – பாஜக கூட்டணி குறித்து பல்வேறு தகவல்களை கூறினார். அகில இந்திய அளவில் தலைமை தாங்குவது பாஜக. தமிழ்நாட்டில் அதிமுக தலைமையில் பாஜக கூட்டணி சட்டமன்ற தேர்தலில் சந்திக்கும் என உள்துறை அமைச்சர் அமித் ஷா தெரிவித்துள்ளார். அவர் சொன்னபடி தான் தமிழ்நாட்டில் கூட்டணி அமைந்திருக்கிறது என்று டிடிவி தினகரன் கூறியுள்ளார்.
தேசிய ஜனநாயக கூட்டணி தமிழ்நாட்டில் பலமடைந்து வருவது மகிழ்ச்சி அளிப்பதாக அவர் குறிப்பிட்டுள்ளார். திமுக கூட்டணியை வீழ்த்த வேண்டும் என்று யாரெல்லாம் நினைக்கிறார்களோ அந்த கட்சி எல்லாம் எங்கள் கூட்டணியில் சேர வேண்டும் என தினகரன் வலியுறுத்தி உள்ளார்.
தேசிய ஜனநாயக கூட்டணியை பலப்படுத்தும் முயற்சியில் பாஜக ஈடுபட்டு வருகிறது. அதற்கு நாங்கள் அனைவரும் உறுதுணையாக இருக்கிறோம். வரும் தேர்தலில் திமுகவை வீழ்த்தப்போவது உறுதி என அவர் நம்பிக்கை தெரிவித்தார்.
அதன் காரணமாக திமுக அமைச்சர் உட்பட அனைவரும் பயத்தில் பேசிக் கொண்டிருக்கின்றனர். பாஜக அதிமுக கூட்டணி குறித்து விமர்சனம் செய்கிறார்கள். ஆனால், இவர்கள் 1999 , 2004 வரைக்கும் கூட்டணி இருந்தவர்கள் தான். எங்களுக்குள் உள்ள பங்காளி சண்டையை ஒதுக்கி வைத்துவிட்டு தேசிய ஜனநாயக கூட்டணி வெற்றிக்கு முழுதும் பாடுபடுவோம்” இவ்வாறு அவர் தெரிவித்தார்.
