தேர்தல் அறிக்கைக்காக மக்களின் பரிந்துரைகளை கேட்கும் வகையில் புதிய இணையதளம் ஒன்றை தமிழக வெற்றிக் கழகம் ஆரம்பித்துள்ளது.
சட்டமன்ற தேர்தல் நெருங்கும் நிலையில், அனைத்து அரசியல் கட்சிகளும் தேர்தல் வேலைகளில் மும்முரம் காட்டி வருகின்றது. குறிப்பாக முதல் முறையாக களம்காண இருக்கும் தமிழக வெற்றிக் கழகம் கட்சியை பலப்படுத்துவதிலும், தொண்டர்களை இணைப்பதிலும் முழு வீச்சில் ஈடுபட்டு வருகிறது.
கூட்டணிக்காக விசிக, காங்கிரஸ், அதிமுக, நாம் தமிழர் கட்சி என பல கட்சிகளுடனும் மறைமுகமாகவும், நேரடியாக சந்தித்தும் பேச்சுவார்த்தை நடத்தி வருவதாக கிசுகிசுக்கப்படுகிறது. தங்களுடன் கூட்டணி வைப்பவர்களுக்கு ஆட்சியிலும், அதிகாரத்திலும் பங்கு உண்டு எனக் கூறி பிற கட்சி நிர்வாகிகளுக்கு வலை வீசி வருகிறது தவெக.
அதிமுக இரண்டு கட்ட தேர்தல் வாக்குறுதிகளை அறிவித்துள்ள நிலையில், தங்களது தேர்தல் அறிக்கைக்காக மக்களிடம் பரிந்துரைகளை கேட்க முடிவெடுத்துள்ளது தவெக. இது குறித்து தவெக வெளியிட்டுள்ள செய்தியில், ” தமிழ்நாட்டின் வருங்காலம் நீங்கள் இல்லாமல் இல்லை, மக்கள் தலைவரின் ஆட்சி உங்களுக்கானது மட்டுமல்ல, உங்களுடைய பரிந்துரைகளாலும் ஆனது. தமிழக வெற்றிக் கழகம் தேர்தல் அறிக்கைக்காக உங்களது பரிந்துரைகளை வழங்கும் இணையதளம் இன்று ( 5.02.2026 ) வெளியாகிறது. அதில் மக்கள் தங்களது பரிந்துரைகளை வழங்கலாம்” என தெரிவித்துள்ளது.
