12 மற்றும் 10 ஆம் வகுப்பு பொது தேர்வு தேதி அட்டவணையை பள்ளிக்கல்வித்துறை அமைச்சர் அன்பில் மகேஷ் பொய்யாமொழி வெளியிட்டார்.
சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் பள்ளி கல்வித்துறை அமைச்சர் அன்பில் மகேஷ் பொய்யாமொழி செய்தியாளர்களை சந்தித்து, 10 மற்றும் 12ஆம் வகுப்பு பொதுத்தேர்வு கால அட்டவணை மற்றும் 11ஆம் வகுப்பு அரியர் தேர்வுக்கான கால அட்டவணையை வெளியிட்டார்.
அப்போது செய்தியாளர்களிடம் பேசிய அவர், 12 ஆம் வகுப்பு பொதுத்தேர்வு 02.03.2026 அன்று துவங்கி 26.03.2026 வரை நடைபெறவுள்ளது. இத்தேர்வில் சுமார் 7,513 பள்ளிகளை சார்ந்த 8,07,000 மாணாக்கர்கள் 3,317 தேர்வு மையங்களில் தேர்வெழுதவுள்ளனர். செய்முறைத்தேர்வுகள் 09.02.2026 முதல் 14.02.2026 நடைபெறவுள்ளது. தேர்வு முடிவுகள் 08.05.2026 வெளியிட திட்டமிடப்பட்டுள்ளது என்றார்.
10-ஆம் வகுப்பு பொதுத்தேர்வு 11.03.2026 அன்று துவங்கி 06.04.2026 வரை நடைபெறவுள்ளது. இத்தேர்வில் 12,485 பள்ளிகளை சார்ந்த சுமார் 8,70,000 மாணாக்கர்கள் 4,113 தேர்வு மையங்களில் தேர்வெழுதவுள்ளனர். செய்முறைத் தேர்வுகள் 23.02.2026 முதல் 28.02.2026 வரை நடைபெறவுள்ளது. தேர்வு முடிவுகள் 20.05.2026 வெளியிட திட்டமிடப்பட்டுள்ளது என கூறினார்.
மேலும் பேசிய அவர், தமிழ்நாடு மாநிலக் கல்விக் கொள்கை 2026-இன்படி 2025-26-ஆம் கல்வியாண்டு முதல் 11 ஆம் வகுப்பிறக்கான பொதுத்தேர்வு ரத்து செய்யப்பட்டுள்ளதால், மார்ச் 2018-ஆம் ஆண்டு முதல் ஜூன்2026-ஆம் ஆண்டு வரை மேல்நிலை 11 ஆம் வகுப்பு தேர்வு வரை பொதுத்தேர்வில் தேர்ச்சியடையாதவர்களுக்கு 03.03.2026 துவங்கி 27.03.2026 வரை நடைபெறவுள்ளது. செய்முறைத்தேர்வுகள் 16.02.2026 முதல் 21.02.2026 வரை நடைபெறவுள்ளது என தெரிவித்தார்.
மேலும் 2025-26 பொதுத்தேர்வு முதல் 12-ஆம் வகுப்பு கணக்குப்பதிவியல் (Accountancy) தேர்வில் கால்குலேட்டர் பயன்படுத்த மாணவர்களுக்கு அனுமதி வழங்கப்பட்டுள்ளதாகவும் கூறினார்.
