தமிழகத்தில் கோடை வெயில் சுட்டெரித்து வரும் நிலையில், மின்சாரத் தேவை இதுவரை இல்லாத அளவுக்கு புதிய உச்சத்தைத் தொட்டுள்ளது. நேற்று செவ்வாய்க்கிழமை அன்று மாநிலத்தின் மின் தேவை 21,211 மெகாவாட்டாக (MW) பதிவாகியுள்ளது. இதற்கு முந்தைய நாளான திங்கட்கிழமை பதிவான 21,117 மெகாவாட் என்ற சாதனையை இது முறியடித்துள்ளது. வெயிலின் தாக்கம் நாளுக்கு நாள் அதிகரித்து வருவதால், ஏசி மற்றும் மின்விசிறிகளின் பயன்பாடு அதிகரித்து மின் தேவை புதிய உச்சத்தை எட்டியுள்ளது.
மின்சாரப் பயன்பாடும் புதிய மைல்கல்லை எட்டியுள்ளது. கடந்த ஏப்ரல் 22-ம் தேதி 466.196 மில்லியன் யூனிட்டுகளாக இருந்த மின் நுகர்வு, ஏப்ரல் 28-ம் தேதி அன்று 470.674 மில்லியன் யூனிட்டுகளாக உயர்ந்து புதிய சாதனை படைத்துள்ளது. வரும் மே மாதத்தின் முதல் வாரத்தில் வெப்பம் இன்னும் அதிகரிக்கும் பட்சத்தில், மாநிலத்தின் மின் தேவை 22,000 மெகாவாட் வரை செல்லக்கூடும் என தமிழ்நாடு மின் உற்பத்தி மற்றும் பகிர்மான கழக அதிகாரிகள் கணித்துள்ளனர்.
இந்தக் கடுமையான மின் தேவையைத் தடையில்லாமல் பூர்த்தி செய்யத் தேவையான நடவடிக்கைகள் எடுக்கப்பட்டுள்ளதாக மின்வாரிய உயர் அதிகாரி ஒருவர் தெரிவித்துள்ளார். மத்திய மின் உற்பத்தி நிலையங்கள், மாநில அனல் மின் நிலையங்கள் மற்றும் சூரிய சக்தி மூலம் கிடைக்கும் மின்சாரத்தைக் கொண்டு இந்தத் தேவை ஈடு செய்யப்படுகிறது. மேலும், மே மாத இரண்டாம் வாரத்தில் காற்றாலை மின் உற்பத்தி அதிகரிக்கும் என்பதால், நிலைமை இன்னும் சீராகும் என்றும், மின் விநியோகத்தில் பாதிப்பு ஏற்படாமல் இருக்க கட்டமைப்பு தொடர்ந்து கண்காணிக்கப்பட்டு வருவதாகவும் அவர் கூறினார்.
