2026 தமிழக சட்டமன்றத் தேர்தலில், அதிமுக தலைமையிலான தேசிய ஜனநாயகக் கூட்டணியில் (NDA) இணைந்தால், தவெக-வுக்கு 80 தொகுதிகள் மற்றும் துணை முதல்வர் பதவி வழங்க அதிமுக முன்வந்துள்ளதாக ‘இந்தியா டுடே’ (India Today) செய்தி வெளியிட்டுள்ளது. ஆந்திராவில் பவன் கல்யாணின் ஜனசேனா கட்சிக்குக் கிடைத்த வெற்றியை முன்மாதிரியாகக் கொண்டு, அதே பாணியில் விஜய்யை ஒரு “ஜூனியர் பார்ட்னராக” இணைத்துக்கொள்ள பாஜக மேலிடம் விரும்புவதாகவும், இதற்கான பேச்சுவார்த்தைகளை டெல்லி பாஜக நிர்வாகிகள் விஜய் தரப்பிடம் தீவிரமாக நடத்தி வருவதாகவும் கூறப்படுகிறது.
நேற்று தனியார் செய்தி நிறுவனத்தின் விவாத நிகழ்ச்சியில் கலந்துகொண்டு பேசிய அதிமுக பொதுச்செயலாளர் எடப்பாடி பழனிசாமி, விஜய் உடன் எந்தவிதமான கூட்டணிப் பேச்சுவார்த்தையும் தற்போது நடைபெறவில்லை என்று திட்டவட்டமாகத் தெரிவித்தார். இருப்பினும், டெல்லி தரப்பிலிருந்து கொடுக்கப்படும் அழுத்தத்தால் அதிமுக இந்த விட்டுக்கொடுத்தலுக்குத் தயாராக இருப்பதாகத் தகவல்கள் தெரிவிக்கின்றன. குறிப்பாக, திமுக-வுக்கு எதிரான வாக்குகளைப் பிரிக்காமல் இருக்க, விஜய்யின் ஆதரவு மிகவும் அவசியம் என்று பாஜக கருதுவதால், இந்த 80 தொகுதிகள் மற்றும் அதிகாரப் பகிர்வு திட்டம் முன்வைக்கப்பட்டதாகச் சொல்லப்படுகிறது.
கூட்டணி குறித்த செய்திகள் காட்டுத்தீயாகப் பரவி வரும் நிலையில், தவெக பொதுச்செயலாளர் சி.டி.ஆர். நிர்மல் குமார் இதனை மறுத்துள்ளார். “திமுக அரசு மக்களின் கவனத்தைத் திசைதிருப்பவே இத்தகைய வதந்திகளைப் பரப்புகிறது; தவெக எப்போதும் போலத் தனது கொள்கையில் உறுதியாக இருக்கிறது” என்று அவர் தெரிவித்துள்ளார். மேலும், விஜய் ஏற்கனவே தனது முதல் மாநாட்டில் பாஜகவை “கருத்தியல் எதிரி” என்றும், திமுகவை “அரசியல் எதிரி” என்றும் அறிவித்துள்ளதால், அவர் NDA கூட்டணியில் இணைவாரா அல்லது 234 தொகுதிகளிலும் தனித்துப் போட்டியிடுவாரா என்பது இம்மாத இறுதிக்குள் தெரியவரும்.
