அமெரிக்கா, கனடா, மெக்சிகோ நாடுகளில் நடைபெறும் 2026 உலகக் கோப்பை கால்பந்து தொடரின் ரவுண்ட் ஆஃப் 32 சுற்றில், பிரான்ஸ் அணி ஸ்வீடன் அணியை எதிர்கொண்டு சிறப்பான ஆட்டத்தை வெளிப்படுத்தி 3-0 என்ற கணக்கில் அபார வெற்றி பெற்றது. இந்திய நேரப்படி இன்று அதிகாலையில் நடைபெற்ற இந்த முக்கியப் போட்டியில் பிரான்ஸ் அணியின் நட்சத்திர வீரர் கிலியன் எம்பாப்பே இரண்டு கோல்கள் அடித்து தனது அணியின் வெற்றிக்கு முக்கியப் பங்காற்றினார்.
போட்டியின் தொடக்கம் முதலே இரு அணிகளும் தாக்குதல் முறையில் விளையாட முனைந்தன. ஸ்வீடன் அணி உறுதியான பாதுகாப்புடன் பதிலடி கொடுக்க முயன்றது. முதல் பாதியில் இரு அணிகளும் பல வாய்ப்புகளை உருவாக்கினாலும், கோல் அடிக்கும் அதிர்ஷ்டம் அவர்களுக்கு அமையவில்லை. இடைவேளைக்கு சில நிமிடங்கள் முன்பாகத்தான் பிரான்ஸ் அணி முன்னிலை பெற்றது. ஓஸ்மேன் டெம்பெலே அளித்த சிறப்பான அசிஸ்ட்டை எம்பாப்பே சரியாகப் பயன்படுத்தி கோல் அடித்தார். இதனால் முதல் பாதி முடிவில் பிரான்ஸ் 1-0 என்ற முன்னிலையுடன் ஓய்வறைக்குச் சென்றது.
இரண்டாவது பாதி தொடங்கிய சில நிமிடங்களிலேயே பிரான்ஸ் அணியின் தாக்குதல் தீவிரமடைந்தது. 53ஆவது நிமிடத்தில் மைக்கேல் ஒலிஸ் அளித்த அசிஸ்ட்டின் மூலம் பிராட்லி பார்கோலா கோல் அடித்து பிரான்ஸ் அணியின் முன்னிலையை 2-0 ஆக உயர்த்தினார். இந்த கோல் ஸ்வீடன் அணியின் மன உறுதியை பாதித்தது.போட்டி முழுவதும் பிரான்ஸ் அணி பந்து கட்டுப்பாட்டில் சிறப்பாக செயல்பட்டது.
பயிற்சியாளர் திட்டமிட்ட மாற்றங்கள் மூலம் அணியின் ஆற்றலைத் தக்க வைத்தனர். 74ஆவது நிமிடத்தில் மீண்டும் மைக்கேல் ஒலிஸின் அசிஸ்ட்டை எம்பாப்பே துல்லியமாக கோலாக மாற்றினார். இதனால் பிரான்ஸ் 3-0 என்ற வலுவான முன்னிலைக்குச் சென்றது. எம்பாப்பேவின் இந்த இரட்டை கோல் சாதனை ரசிகர்களை உற்சாகப்படுத்தியது.
ஸ்வீடன் அணி கடைசி நேரத்தில் பல மாற்றங்கள் செய்து கோல் அடிக்க முயற்சித்தாலும், பிரான்ஸ் அணியின் பாதுகாப்பு அரண் உறுதியாக இருந்தது. இறுதி வரை எந்த பதிலடியும் கொடுக்க முடியாமல் ஸ்வீடன் தோல்வியைத் தழுவியது.இந்த வெற்றியின் மூலம் பிரான்ஸ் அணி ரவுண்ட் ஆஃப் 16 சுற்றுக்கு முன்னேறியுள்ளது. உலகக் கோப்பை வெற்றிக்கு வலுவான போட்டியாளராகக் கருதப்படும் பிரான்ஸ் அணியின் இந்த ஆட்டம் அவர்களின் பலத்தை மீண்டும் நிரூபித்துள்ளது.
