விருதுநகர் மாவட்டம், சிவகாசி அருகே உள்ள அரசு பள்ளிக்கு சமீபத்தில் சென்ற பள்ளிக்கல்வித் துறை அமைச்சர் கீர்த்தனா, அங்கு ஒரு மாணவியிடம் ஆங்கிலத்தில் கேள்வி எழுப்பினார். மாணவி சற்று தயக்கத்துடன் பதிலளிக்க முயன்ற காட்சி, ஊடகங்களால் பதிவு செய்யப்பட்டு சமூக ஊடகங்களில் வேகமாகப் பரவியது. இந்தச் சம்பவம் எதிர்க்கட்சிகளின் கடும் விமர்சனத்துக்கு உள்ளானது.
திமுக இளைஞர் அணித் தலைவர் உதயநிதி ஸ்டாலின், முன்னாள் பள்ளிக்கல்வித் துறை அமைச்சர் அன்பில் மகேஷ் பொய்யாமொழி மற்றும் பாஜக மாநிலத் தலைவர் நயினார் நாகேந்திரன் உள்ளிட்டோர் அமைச்சரின் செயலுக்கு கண்டனம் தெரிவித்தனர். இந்த விமர்சனங்களுக்கு விரிவான பதிலளிக்கும் வகையில் அமைச்சர் கீர்த்தனா தனது எக்ஸ் (ட்விட்டர்) பக்கத்தில் நீண்ட பதிவு ஒன்றை வெளியிட்டுள்ளார்.
அதில் தான் ஒரு அரசு பள்ளி மாணவி என்பதையும், தமிழ் வழிக் கல்வியில் பயின்றவள் என்பதையும் சுட்டிக்காட்டியுள்ளார். “இன்று சிலர் ‘அரசு பள்ளி மாணவியை கேலி செய்தார்’ என்ற பொய்யான கதையைப் பரப்புகிறார்கள். உண்மை என்னவென்றால், நானே அரசு பள்ளியில் படித்தவள். தமிழ் வழியில் தான் கல்வி கற்றேன்” என்று தொடங்கும் அவரது பதிவு, பலரது கவனத்தை ஈர்த்துள்ளது.
அமைச்சர் தனது பள்ளி நாட்களை நினைவுகூர்ந்து, “கணிதம், அறிவியல், சமூக அறிவியல் அனைத்தையும் தமிழில்தான் படித்தேன். இரண்டாவது மொழியாக பிரெஞ்ச் படிக்கும் வாய்ப்போ, உயர்தர தனியார் பள்ளியில் பயிலும் சௌகரியமோ எனக்கு இருக்கவில்லை. கார்ப்பரேட் உலகில் நுழைந்தபோது ஆங்கிலத்தில் தடுமாறினேன். தவறுகள் செய்தேன். ஆனால் கற்றுக்கொண்டேன். இன்னும் கற்றுக்கொண்டிருக்கிறேன். அதில் எனக்கு எந்த வெட்கமும் இல்லை” என்று தெரிவித்தார்.
மேலும், தன்னை விமர்சிப்பவர்கள் உண்மையில் லட்சக்கணக்கான அரசு பள்ளி மாணவர்கள் மற்றும் தமிழ் வழி மாணவர்களின் தன்னம்பிக்கையை கேலி செய்வதாகவும் அவர் சுட்டிக்காட்டினார். “ஒரு அரசு பள்ளி மாணவன் உலக மேடையில் நிற்க வேண்டும். ஒரு தமிழ் வழி மாணவி எந்த மேடையிலும் தலையை நிமிர்த்தி பேச வேண்டும். அதற்கான சூழலை உருவாக்குவதே எனது நோக்கம்” என்று வலியுறுத்தினார்.
வீடியோ பதிவு குறித்தும் அவர் விளக்கம் அளித்தார். “அந்த வீடியோவை நான் எடுக்கவில்லை. ஊடகங்கள் தங்கள் பணியைச் செய்தனர். உண்மையை அறிய விரும்புபவர்கள் அவர்களிடம் கேட்கலாம்” என்றார். அரசியல் விமர்சகர்களுக்கு நேரடி கேள்வியும் எழுப்பிய கீர்த்தனா, “என்னை கேலி செய்யும் அரசியல்வாதிகளின் சொந்தக் குழந்தைகள் எத்தனை பேர் அரசு பள்ளிகளில், தமிழ் வழியில் படிக்கிறார்கள்?” என்று வினவினார். அரசு பள்ளியை நம்பாதவர்கள், அரசு பள்ளியில் படித்த ஒரு பெண் இன்று அமைச்சர் பதவியில் இருப்பதையே தனது பதிலாகக் கருதுவதாகவும் அவர் தெரிவித்தார்.
இந்தச் சம்பவம் தமிழகத்தில் தமிழ் வழிக் கல்வி மற்றும் அரசுப் பள்ளிகளின் தரம் குறித்த விவாதத்தை மீண்டும் தூண்டியுள்ளது. பலர் அமைச்சரின் பதிலை வரவேற்றாலும், எதிர்க்கட்சிகள் இன்னும் தங்கள் விமர்சனத்தைத் தொடர்ந்து வருகின்றன. அரசு பள்ளி மாணவர்களின் ஆங்கிலத் திறனை மேம்படுத்த அரசு எடுக்கும் நடவடிக்கைகள் குறித்தும் பொதுமக்கள் ஆர்வம் காட்டி வருகின்றனர்.
அமைச்சர் கீர்த்தனாவின் இந்தப் பதில், தனிப்பட்ட அனுபவத்திலிருந்து உருவானது என்பதால், தமிழ் வழி மாணவர்களிடையே பெரும் எதிரொலியைப் பெற்றுள்ளது. அரசுப் பள்ளிகளை வலுப்படுத்துவதும், மாணவர்களுக்கு உரிய திறன் மேம்பாட்டுப் பயிற்சிகளை வழங்குவதும் தான் நீண்டகாலத் தீர்வு என்பது பலரின் கருத்தாக உள்ளது.
