தமிழக முதலமைச்சர் விஜய் நேற்று சென்னை மெட்ரோ ரெயில் இரண்டாம் கட்டத் திட்டப் பணிகளைத் தீவிரமாக ஆய்வு செய்தார். பொதுமக்களின் அன்றாடப் பயண அனுபவத்தை நேரில் உணரும் வகையில், அவர் சாதாரண பயணியாக மெட்ரோ ரெயிலில் பயணம் செய்து, மக்களின் கருத்துகளை நேரடியாகக் கேட்டறிந்தார். அன்றாட அலுவல்களைத் தலைமைச் செயலகத்தில் முடித்துவிட்டு புறப்பட்ட முதலமைச்சர், அரசினர் தோட்டம் மெட்ரோ நிலையத்துக்கு வந்தார்.
அங்கு தானே டிக்கெட் எடுத்துக்கொண்டு ரெயிலில் ஏறினார். அரசினர் தோட்டம் முதல் நந்தனம் வரையிலான பயணத்தின்போது, பயணிகளுடன் உரையாடினார். முதலமைச்சரை அடையாளம் கண்ட பயணிகள் உற்சாகத்துடன் அவருடன் செல்ஃபி எடுத்து மகிழ்ந்தனர். பயணிகள் தங்கள் அனுபவங்களையும், மெட்ரோ சேவையில் மேம்படுத்த வேண்டிய அம்சங்களையும் தெரிவித்தனர்.
நந்தனத்தில் உள்ள மெட்ரோ தலைமை அலுவலகத்துக்கு சென்ற முதலமைச்சரை உயர் அதிகாரிகள் உற்சாகத்துடன் வரவேற்றனர். அங்கு மெட்ரோ பாதுகாப்பு ஏற்பாடுகள், கட்டுப்பாட்டு மையத்தின் செயல்பாடு, அவசரகால நடவடிக்கைகள், பயணிகளுக்கான வசதிகள் உள்ளிட்டவற்றை விரிவாக ஆய்வு செய்தார். குறிப்பாக, பயணிகள் பாதுகாப்பு, தீயணைப்பு மற்றும் மீட்புப் பணிகளுக்கான தயார் நிலை குறித்து அதிகாரிகளிடம் விளக்கம் பெற்றார்.
இதன்பிறகு, கிண்டி-கத்திப்பாரா பகுதியில் 101 அடி உயரத்தில் 1,354 அடி நீளத்தில் நிர்மாணிக்கப்பட்டு வரும் பிரம்மாண்ட மேம்பாலப் பாதையின் கட்டுமானப் பணிகளை நேரில் பார்வையிட்டார். இறுதிக்கட்டத்தில் உள்ள இந்தப் பணிகளின் வேகத்தைக் கண்டு மகிழ்ச்சி தெரிவித்த முதலமைச்சர், அதிகாரிகளுக்கு பாராட்டுகளைத் தெரிவித்தார். இந்த உயரமான வழித்தடம் சென்னையின் போக்குவரத்து நெரிசலை கணிசமாகக் குறைக்கும் என்று எதிர்பார்க்கப்படுகிறது.
தொடர்ந்து, போரூர் மெட்ரோ நிலையத்துக்கு சென்ற முதலமைச்சர், அங்கிருந்து பூந்தமல்லி வரை இயக்கப்பட்ட ஓட்டுநர் இல்லா (Driverless) மெட்ரோ ரெயிலின் சோதனை ஓட்டத்தில் பங்கேற்று பார்வையிட்டார். தொழில்நுட்ப ரீதியாக மிகவும் மேம்பட்ட இந்த அமைப்பு, எதிர்காலத்தில் சென்னை மெட்ரோவின் செயல்திறனை அதிகரிக்கும்.
ஆய்வின் இறுதியில், இரண்டாம் கட்ட மெட்ரோ திட்டப் பணிகளைத் திட்டமிட்ட கால அட்டவணைக்குள் விரைந்து நிறைவு செய்து, பொதுமக்கள் பயன்பாட்டுக்கு உடனடியாகக் கொண்டு வருமாறு அதிகாரிகளுக்கு முதலமைச்சர் விஜய் உத்தரவிட்டார். இந்தத் திட்டம் முடிவடைந்தால் சென்னையின் போக்குவரத்து மற்றும் பொருளாதார வளர்ச்சிக்கு பெரும் ஊக்கம் கிடைக்கும்.
