தமிழக அரசின் 2026-27 நிதியாண்டு பட்ஜெட்டை சட்டப்பேரவையில் தாக்கல் செய்த நிதியமைச்சர் மரிய வில்சன், மக்களின் வாழ்வாதாரம் மற்றும் தொழில்நுட்ப வளர்ச்சியை முன்னிறுத்தி பல முக்கிய அறிவிப்புகளை வெளியிட்டார். குடிசைகளில் வசிக்கும் ஏழை மக்களின் வீட்டுவசதி மேம்பாட்டிற்காக கான்கிரீட் வீடுகள் கட்ட வழங்கப்பட்டு வந்த மானியத் தொகை ரூ.3.10 லட்சத்திலிருந்து ரூ.5 லட்சமாக உயர்த்தப்பட்டுள்ளது. இதனால் ஆயிரக்கணக்கான குடும்பங்கள் நிலையான வீடு பெறும் வாய்ப்பு உருவாகியுள்ளது.
தொழில்நுட்பத் துறையில் வரலாற்று முக்கியத்துவம் வாய்ந்த அறிவிப்பாக, இந்தியாவிலேயே முதல் பிரத்யேக செயற்கை நுண்ணறிவு (ஏஐ) நகரம் உருவாக்கப்படும் என அமைச்சர் தெரிவித்தார். இதற்கு ‘அறிவகம்’ என பெயரிடப்பட்டுள்ளது. இங்கு ஏஐ பல்கலைக்கழகம், சர்வதேச திறன் மேம்பாட்டு மையம், குறைக்கடத்தி சோதனை ஆய்வகம் மற்றும் ஏஐ-குவாண்டம் தொழில்நுட்ப ஒருங்கிணைந்த ஆராய்ச்சி மையம் அமைக்கப்படும். இதற்கான ஆய்வுக்கு ரூ.5 கோடி ஒதுக்கப்பட்டுள்ளது.
உலகில் சான் பிரான்சிஸ்கோ, பெய்ஜிங், சிங்கப்பூர் உள்ளிட்ட நகரங்களில் இதுபோன்ற ஏஐ நகரங்கள் செயல்படுவது குறிப்பிடத்தக்கது. தமிழக ஏஐ அமைப்பு சுகாதாரம், விவசாயம், கல்வி மற்றும் குடிமக்கள் சேவைகளில் பயன்படுத்தப்படும். எரிசக்தித் துறையிலும் பெரும் முன்னேற்றங்கள் அறிவிக்கப்பட்டுள்ளன. வீட்டுக் கூரைகளில் சூரிய மின் பலகைகள் அமைக்க ரூ.1 லட்சம் வரை மானியம் வழங்கும் புதிய திட்டம் அறிமுகப்படுத்தப்பட்டுள்ளது. இதற்கு ரூ.50 கோடி ஒதுக்கீடு.
சென்னையில் அனைத்து நுகர்வோருக்கும் ஸ்மார்ட் மீட்டர்கள் பொருத்தப்படும். மாநிலத்தின் பிற பகுதிகளில் 50 லட்சம் தொழில் மற்றும் வணிக நுகர்வோருக்கும் விரிவாக்கம் செய்யப்படும்.ரூ.1,543 கோடி முதலீட்டில் 178 புதிய துணை மின்நிலையங்கள் அமைக்கப்படும். பழைய 40 ஆயிரம் மின்மாற்றிகளை மாற்ற ரூ.2,000 கோடி செலவிடப்படும். ஐந்து ஆண்டுகளில் 20 ஆயிரம் பொது மின்சார வாகன சார்ஜிங் நிலையங்கள் அமைக்க ரூ.50 கோடியும், குடியிருப்புகளில் சார்ஜிங் வசதிக்கு ரூ.5 கோடியும் ஒதுக்கப்பட்டுள்ளன.
எரிசக்தித் துறைக்கு மொத்தம் ரூ.15,828 கோடி ஒதுக்கீடு செய்யப்பட்டுள்ளது. சென்னையை உலகத் தரத்திற்கு உயர்த்த ரூ.25 கோடி நிதி வழங்கப்படும்.இந்த அறிவிப்புகள் தமிழகத்தை தொழில்நுட்ப மற்றும் நிலையான வளர்ச்சியில் முன்னணி மாநிலமாக உருவாக்கும் என எதிர்பார்க்கப்படுகிறது.
