சென்னை மெட்ரோ ரயில் திட்டம் கட்டம்-2ல் மேலும் ஒரு முக்கிய மைல்கல்லை எட்டியுள்ளது. வழித்தடம் 3ல் ‘நீலகிரி’ என்று பெயரிடப்பட்ட சுரங்கப்பாதை தோண்டும் இயந்திரம் (TBM) வெற்றிகரமாக தனது பணியை நிறைவு செய்து மூலக்கடை மெட்ரோ நிலையத்தை அடைந்துள்ளது.
சென்னை மெட்ரோ ரயில் நிறுவனம் வெளியிட்ட அறிக்கையின்படி, கட்டம்-2 திட்டத்தில் மொத்தம் 118.9 கிலோமீட்டர் நீளத்தில் மூன்று புதிய வழித்தடங்கள் அமைக்கும் பணிகள் தீவிரமாக நடைபெற்று வருகின்றன. இதில் வழித்தடம் 3ன் முதல் கட்டமாக மாதவரம் பால்பண்ணை முதல் கெல்லீஸ் வரையிலான சுமார் 9 கிலோமீட்டர் நீளமுள்ள பகுதியில் சுரங்கப்பாதை அமைக்கும் பணியை டாடா புராஜெக்ட்ஸ் நிறுவனம் மேற்கொண்டு வருகிறது. இந்தப் பணிக்காக ஏழு சுரங்கப்பாதை தோண்டும் இயந்திரங்கள் பயன்படுத்தப்பட்டு வருகின்றன.
நீலகிரி இயந்திரம் மாதவரம் நெடுஞ்சாலை நிலையத்திலிருந்து மூலக்கடை நிலையம் வரையிலான மேல்வழி (up line) பகுதியில் 819 மீட்டர் நீளத்திற்கு சுரங்கம் தோண்டும் பணியைத் தொடங்கி வெற்றிகரமாக நிறைவு செய்துள்ளது. இது TU-01 ஒப்பந்தத்தின் கீழ் டாடா புராஜெக்ட்ஸ் மேற்கொண்ட 11வது வெற்றிகரமான சுரங்கப்பாதை நிறைவு ஆகும். ஒட்டுமொத்தமாக கட்டம்-2 திட்டத்தில் இதுவரை 24 சுரங்கப்பாதை தோண்டும் இயந்திரங்கள் தங்கள் இலக்குகளை அடைந்துள்ளன.
இந்தப் பகுதியில் பணிகள் பல சவால்களைக் கொண்டிருந்தன. பக்கிங்ஹாம் கால்வாய் அடியிலும் அதிக வாகனப் போக்குவரத்துள்ள சாலையின் அடியிலும் பாதை அமைக்கப்பட்டது. அப்பகுதியில் இருந்த 14க்கும் மேற்பட்ட ஆழ்துளைக் கிணறுகளால் பொதுமக்களின் குடிநீர் விநியோகம் பாதிக்கப்படாதவாறு மாற்று நீர் ஆதாரங்கள் உடனடியாக ஏற்பாடு செய்யப்பட்டன. நில அதிர்வு மற்றும் மண் அமர்வு அனுமதிக்கப்பட்ட வரம்புக்குள் கட்டுப்படுத்தப்பட்டதோடு, தொடர் கண்காணிப்புக் கருவிகள் மூலம் முழுப் பணியும் கண்காணிக்கப்பட்டது.
இந்நிகழ்ச்சியில் சென்னை மெட்ரோவின் இணைப் பொது மேலாளர் கொள்ளி வெங்கட ரமணா, பொது ஆலோசகர் குழுவின் முதன்மை வரைபடப் பொறியாளர் பி.எஸ்.எஸ். நாயுடு, டாடா புராஜெக்ட்ஸ் திட்ட மேலாளர் விஜயகுமார் உள்ளிட்ட அதிகாரிகள் மற்றும் பணியாளர்கள் கலந்துகொண்டனர். இந்த வெற்றி, சென்னை மெட்ரோ கட்டம்-2 திட்டம் திட்டமிட்டபடி முன்னேறி வருவதை மீண்டும் உறுதிப்படுத்துகிறது.
