98-வது ஆஸ்கர் விருது விழாவின் நேரடி ஒளிபரப்பில் விடுபட்ட இந்தியத் திரைத்துறையின் மூத்த நட்சத்திரங்களின் பெயர்களை, தற்போது ஆஸ்கர் அகாடமி தனது அதிகாரப்பூர்வ இணையதளத்தில் சேர்த்து கௌரவித்துள்ளது.
2026-ம் ஆண்டுக்கான ஆஸ்கர் விருது விழா கோலாகலமாக நடைபெற்றது. இதில் கடந்த ஓராண்டில் மறைந்த உலக சினிமா கலைஞர்களுக்கு அஞ்சலி செலுத்தும் ‘In Memoriam’ பகுதி இடம்பெற்றது. ஆனால், இந்திய சினிமாவின் ஈடு இணையற்ற கலைஞர்களான தர்மேந்திரா, மனோஜ் குமார், சரோஜா தேவி மற்றும் கோட்டா ஸ்ரீனிவாஸ் ராவ் ஆகியோரின் பெயர்கள் நேரடி ஒளிபரப்பில் காட்டப்படவில்லை. இது இந்திய சினிமா ரசிகர்கள் மற்றும் திரைத்துறையினர் இடையே பெரும் அதிர்ச்சியையும், சமூக வலைதளங்களில் கடும் விமர்சனங்களையும் எழுப்பியது.
இதையடுத்து, ஆஸ்கர் அகாடமி தனது அதிகாரப்பூர்வ இணையதளத்தில் உள்ள ‘In Memoriam’ பிரிவில் இந்த நான்கு நட்சத்திரங்களின் பெயர்களையும், அவர்களின் புகைப்படங்களுடன் தற்போது சேர்த்துள்ளது.
ஆஸ்கர் மேடையில் இவர்களுக்கு அஞ்சலி செலுத்தப்படாதது வருத்தமளித்தாலும், தற்போது அகாடமியின் அதிகாரப்பூர்வ இணையதள கேலரியில் இவர்களின் பெயர்கள் சேர்க்கப்பட்டிருப்பது ரசிகர்களுக்குச் சற்று ஆறுதலை அளித்துள்ளது. உலகத் திரையுலகிற்கு இந்தியக் கலைஞர்கள் ஆற்றிய பங்களிப்பை சர்வதேச அகாடமி அங்கீகரிக்க வேண்டும் என்பதே அனைவரின் எதிர்பார்ப்பாக உள்ளது.
