பாஜகவில் அதிருப்தியுடன் இயங்கும் முன்னாள் தலைவர் அண்ணாமலை தனிக்கட்சி துவங்கியே ஆக வேண்டும் என அவரது ஆதரவாளர்கள் தீவிரமாக முயற்சி எடுத்து வருகின்றனர்.
பாரதிய ஜனதா கட்சியில் (பாஜக) தொடர்ந்து அதிருப்தியில் இருக்கும் முன்னாள் மாநிலத் தலைவர் கே. அண்ணாமலையை முன்னிறுத்தி புதிய அரசியல் அமைப்பை உருவாக்கும் முயற்சிகள் தீவிரமடைந்துள்ளன. அவரது ஆதரவாளர்கள் சமூக ஊடகங்களில் தீவிர பிரச்சாரம் மேற்கொண்டு வரும் நிலையில், இந்த விவகாரம் தமிழக அரசியலில் பரபரப்பை ஏற்படுத்தியுள்ளது. பாஜக தேசியத் தலைமை, அதிமுகவுடன் கூட்டணி வலியுறுத்தியதால் அண்ணாமலையை மாநிலத் தலைவர் பொறுப்பிலிருந்து நீக்கியது பெரும் சர்ச்சையை கிளப்பியது. அதன்பிறகு அவர் கட்சியின் உள் நிகழ்வுகளில் பங்கேற்பைக் குறைத்துக்கொண்டார்.
பிரதமர் நரேந்திர மோடி மற்றும் உள்துறை அமைச்சர் அமித் ஷா போன்ற முக்கிய தலைவர்கள் கலந்துகொள்ளும் பல்வேறு நிகழ்ச்சிகளை அவர் புறக்கணித்ததாகக் கூறப்படுகிறது. சட்டமன்றத் தேர்தலின்போது சில தொகுதிகளுக்கு பொறுப்பாளராக நியமிக்கப்பட்டபோதும் அதை ஏற்க மறுத்த அண்ணாமலை, மாறாக 95 தொகுதிகளில் தீவிரமாகப் பிரசாரம் செய்தார். எனினும், அந்தத் தேர்தலில் பாஜக பெரும் தோல்வியைச் சந்தித்தது. இந்நிலையில், அண்ணாமலையின் தலைமைத்துவத்தின் மீது இளைஞர்கள் மத்தியில் பெரும் நம்பிக்கை நிலவுவதாக அவரது ஆதரவாளர்கள் தெரிவிக்கின்றனர்.
பாஜக மாநில தொழில்நுட்பப் பிரிவுச் செயலாளர் விஷ்ணு பிரசாத், “அண்ணாமலை மீது இளைஞர்கள் பெரும் நம்பிக்கை வைத்துள்ளனர். அவரது தலைமையில் எது நடந்தாலும் அது எழுச்சியாகவே இருக்கும்” என்று கூறியுள்ளார். இதற்கிடையில், மே 26 முதல் 29 வரை பாஜக தேர்தல் தோல்வி குறித்த ஆய்வுக் கூட்டங்கள் நடைபெற உள்ளன. அண்ணாமலை இந்தக் கூட்டங்களில் பங்கேற்கப் போவதில்லை எனவும், அந்த நாட்களில் தென்கொரியா பயணம் மேற்கொள்ளத் திட்டமிட்டுள்ளதாகவும் தகவல்கள் வெளியாகியுள்ளன.
இந்தச் சூழலில் அண்ணாமலை ஆதரவாளர்கள் ‘புதிய தமிழகம் ஜனதா கட்சி’ என்ற பெயரில் புதிய கட்சியைத் தொடங்க வலியுறுத்தி வருகின்றனர். ஆரஞ்சு, வெள்ளை, பச்சை நிறங்களைக் கொண்ட கொடியில் அண்ணாமலையின் உருவத்துடன் கூடிய வடிவமைப்புகள் சமூக ஊடகங்களில் வைரலாகி வருகின்றன. ஊழலற்ற நிர்வாகம், இளைஞர்களுக்கு அதிக வேலைவாய்ப்பு, பெண்கள் பாதுகாப்பு, விவசாயிகளுக்கு நேரடி உதவி, அரசு பள்ளிகள் மற்றும் மருத்துவமனைகளை மேம்படுத்துதல் உள்ளிட்ட வாக்குறுதிகளும் முன்வைக்கப்பட்டுள்ளன.
மேலும், ‘அகில இந்திய அண்ணாமலை நற்பணி மன்றம்’ என்ற பெயரிலும் பதிவுகள் செய்யப்படுவதாகத் தெரிகிறது. இதுவரை அண்ணாமலை இந்த முயற்சிகள் குறித்து எந்தவிதமான ஆதரவு அல்லது எதிர்ப்பையும் தெரிவிக்கவில்லை. இதனால் அவர் தனி அரசியல் பாதையில் செல்லும் முடிவில் இருக்கலாம் என அவரது ஆதரவாளர்களிடையே எதிர்பார்ப்பு அதிகரித்துள்ளது. தமிழக அரசியலில் இளைஞர்களிடையே பெரும் செல்வாக்கு பெற்றுள்ள அண்ணாமலையின் அடுத்த நகர்வு என்னவாக இருக்கும் என்பதை நாடு முழுவதும் உன்னிப்பாகக் கவனித்து வருகிறது.
