பாகிஸ்தானின் பலூசிஸ்தான் மாகாணத்தில் அமைந்துள்ள மூலோபாய முக்கியத்துவம் வாய்ந்த குவாதர் மாவட்டத்தில் உள்ள ஜிவானியின் பன்வான் பகுதியில் பாகிஸ்தான் கடலோரக் காவல்படை முகாம் மீது தீவிரவாத அமைப்பினர் நடத்திய தாக்குதல் பெரும் அதிர்வலைகளை ஏற்படுத்தியுள்ளது. நேற்று மாலை சுமார் 6.32 மணியளவில் நடைபெற்ற இந்தச் சம்பவத்தில், வெடிபொருட்கள் நிரப்பப்பட்ட மாசுடா லாரி ஒன்றை ஓட்டிச் சென்ற தற்கொலைப் படை வீரர் முகாமுக்குள் நுழைந்து வெடிக்கச் செய்ததாகக் கூறப்படுகிறது.
இந்த வெடிப்பைத் தொடர்ந்து பலூச் விடுதலைப் படை (BLA) போராளிகள் அனைத்துப் பக்கங்களிலிருந்தும் தாக்குதலைத் தொடங்கினர். பலூச் விடுதலைப் படையின் செய்தித் தொடர்பாளர் ஜீயந்த் பலோச் வெளியிட்ட அறிக்கையில், “எங்கள் அமைப்பின் எலைட் மஜீத் பிரிகேடைச் சேர்ந்த அத்தாஉல்லா பலோச் (அல் அஜ்மல்) என்பவர் தற்கொலைத் தாக்குதலை நடத்தினார். இதில் கடலோரக் காவல்படை முகாம் முழுமையாக அழிக்கப்பட்டது. 30க்கும் மேற்பட்ட பாகிஸ்தான் பாதுகாப்புப் படையினர் உயிரிழந்தனர். ஏராளமானோர் காயமடைந்தனர்” என்று தெரிவித்தார்.
இந்தத் தாக்குதலின் காட்சிகளை உள்ளடக்கிய 43 வினாடி வீடியோவை BLA-வின் ஊடகப் பிரிவு ‘ஹக்கால்’ வெளியிட்டுள்ளது. அதில், வெடிபொருட்கள் நிரப்பப்பட்ட லாரி முகாமுக்குள் நுழைவதும், அதைத் தொடர்ந்து பெரும் தீப்பிழம்பு எழுவதும் தெளிவாகப் பதிவாகியுள்ளது. இந்த அமைப்பு தொடர்ந்து பாகிஸ்தான் ராணுவத்திற்கு எதிரான தாக்குதல்களை அதிகரித்து வருகிறது.
குவாதர் துறைமுகம் சீனாவின் பெல்ட் அண்ட் ரோட் முயற்சியின் முக்கியப் பகுதியாக இருப்பதால், இப்பகுதியில் நிலவும் பாதுகாப்புப் பிரச்னைகள் சர்வதேச அளவில் கவனத்தை ஈர்த்துள்ளன. எனினும், பாகிஸ்தான் அதிகாரிகள் இதுவரை உயிரிழப்பு எண்ணிக்கை அல்லது முகாம் சேதம் குறித்து உறுதிப்படுத்தவில்லை. சில அறிக்கைகளில் குறைந்த உயிரிழப்புகளே ஏற்பட்டதாகவும், தாக்குதலைத் தடுத்ததாகவும் கூறப்படுகிறது.
பலூசிஸ்தானில் பல ஆண்டுகளாக நீடிக்கும் பிரிவினைவாதப் போராட்டத்தின் ஒரு பகுதியாக இந்தச் சம்பவம் பார்க்கப்படுகிறது. பாதுகாப்புப் படைகள் தீவிர தேடுதல் நடவடிக்கையில் ஈடுபட்டுள்ளன. இந்தத் தாக்குதல் பலூசிஸ்தானின் அமைதியின்மையை மீண்டும் எடுத்துக்காட்டுகிறது.
