அதிமுக எம்எல்ஏ-க்கள் 4 பேர் நேற்று ராஜினாமா செய்து தவெகவில் இணைந்த நிலையில் ஆதரவு நிர்வாகிகளுடன் சி.வி.சண்முகம் ஆலோசனை மேற்கொண்டார்.
அதிமுகவில் தொடர் அதிர்ச்சி நிகழ்வுகள் தொடர்கின்றன. அம்பாசமுத்திரம் சட்டமன்றத் தொகுதி உறுப்பினர் இசக்கி சுப்பையா நான்காவது எம்.எல்.ஏ.வாக ராஜினாமா செய்துள்ளார். இதையடுத்து அவர் தமிழக வெற்றிக் கழகத்தில் (தவெக) இணைந்தார். நேற்று மதுராந்தகம் எம்.எல்.ஏ. மரகதம் குமரவேல், பெருந்துறை எம்.எல்.ஏ. ஜெயக்குமார் மற்றும் தாராபுரம் எம்.எல்.ஏ. சத்யபாமா ஆகியோர் ராஜினாமா செய்து த.வெ.க.,வில் இணைந்தனர். இன்று இசக்கி சுப்பையாவின் ராஜினாமாவுடன் அதிமுகவின் சட்டப்பேரவை உறுப்பினர் எண்ணிக்கை 47ல் இருந்து 43 ஆகக் குறைந்துள்ளது. இந்த நான்கு ராஜினாமாக்களும் கட்சிக்கு பெரும் பின்னடைவை ஏற்படுத்தியுள்ளன.
சமீபத்தில் நடைபெற்ற தமிழக சட்டசபைத் தேர்தலில் தவெக 108 தொகுதிகளில் வெற்றி பெற்று, காங்கிரஸ், விடுதலைச் சிறுத்தைகள் கட்சி, கம்யூனிஸ்ட் கட்சிகளின் ஆதரவுடன் ஆட்சியமைத்தது. திமுக 59 இடங்களிலும், அதிமுக 47 இடங்களிலும் வெற்றி பெற்றன. தேர்தலுக்குப் பிறகு அதிமுக இரு அணிகளாகப் பிளவுபட்டது. நம்பிக்கை வாக்கெடுப்பின்போது சி.வி. சண்முகம் தரப்பைச் சேர்ந்த 25 எம்.எல்.ஏ.க்கள் தவெகவுக்கு ஆதரவு அளித்தனர். இதையடுத்து அவர்களை அதிமுக பொதுச் செயலர் எடப்பாடி பழனிசாமி கட்சிப் பொறுப்புகளில் இருந்து நீக்கினார்.
இந்நிலையில், கொறடா மற்றும் சட்டப்பேரவைக் கட்சித் தலைவர் நியமனம் தொடர்பாக சி.வி. சண்முகம் மற்றும் எஸ்.பி. வேலுமணி தரப்பினர் சபாநாயகரை சந்தித்துப் பேசியிருந்தனர். இந்தப் பின்னணியில் நான்கு எம்.எல்.ஏ.க்களின் ராஜினாமா அதிமுகவுக்கு பெரும் அதிர்ச்சியை ஏற்படுத்தியுள்ளது. ராஜினாமா செய்த அனைத்து எம்.எல்.ஏ.க்களும் தங்கள் தொகுதிகளில் கணிசமான வாக்கு வித்தியாசத்தில் வெற்றி பெற்றவர்கள் என்பது குறிப்பிடத்தக்கது. இசக்கி சுப்பையா 10,245 வாக்குகள் வித்தியாசத்தில் அம்பாசமுத்திரத்தில் வெற்றி பெற்றிருந்தார். மற்ற மூன்று எம்.எல்.ஏ.க்களும் தங்கள் பகுதிகளில் வலுவான ஆதரவைப் பெற்றவர்கள்.
தற்போது எஞ்சியுள்ள எம்.எல்.ஏ.க்களைத் தக்கவைத்துக்கொள்ளும் முயற்சிகளில் அதிமுக தீவிரம் காட்டி வருகிறது. சி.வி. சண்முகம் தனது ஆதரவு நிர்வாகிகள் மற்றும் எம்.எல்.ஏ.க்களுடன் தொடர்ந்து அவசர ஆலோசனை நடத்தினார். அதிமுகவின் எதிர்காலம் மற்றும் அடுத்தகட்ட உத்திகள் குறித்து கட்சி வட்டாரங்களில் பெரும் கவலை நிலவுகிறது. இந்த ராஜினாமாக்கள் அதிமுகவின் உள் மோதல்களை மேலும் தீவிரப்படுத்தியுள்ளன. கட்சியின் ஒற்றுமை மற்றும் பலத்தைத் தக்கவைக்க எடப்பாடி பழனிசாமி தரப்பு என்ன உத்திகளைக் கையாளப் போகிறது என்பது அரசியல் வட்டாரங்களில் ஆர்வத்தை ஏற்படுத்தியுள்ளது.
