சென்னை உயர் நீதிமன்றத்தில் அரசு வழக்கறிஞர்கள் நியமனத்தில் லஞ்சம் புகுந்ததாக குற்றச்சாட்டுகளை எழுப்பி மனு தாக்கல் செய்த தமிழக வெற்றிக் கழகத்தின் (தவெக) விழுப்புரம் மாவட்ட மகளிர் வழக்கறிஞர் அணி இணைச் செயலாளர் ஞானசவுந்தரி, கட்சியில் இருந்து உடனடியாக நீக்கப்பட்டுள்ளார்.
தவெக விழுப்புரம் மாவட்ட செயலாளர் மோகன்ராஜ் அறிவுறுத்தலின்பேரில், மகளிர் நீதிமன்றத்தில் அரசு சிறப்பு வழக்கறிஞர் பதவிக்கும், மாவட்ட முதன்மை மற்றும் சார்பு நீதிமன்றங்களில் அரசு கூடுதல் குற்றவியல் வழக்கறிஞர் பதவிக்கும் ஞானசவுந்தரி விண்ணப்பித்திருந்தார். தமிழக அரசு ஜூன் 5-ம் தேதி வெளியிட்ட அறிவிப்பின்படி, விண்ணப்பிக்க கடைசி தேதி ஜூன் 29 மாலை என நிர்ணயிக்கப்பட்டிருந்தது.
அன்று மாலை ஒரு நியமனப் பட்டியல் வாட்ஸ்அப்பில் வெளியானது. இதனை உறுதிப்படுத்த மாவட்ட செயலாளரிடம் விசாரித்தபோது, அது இறுதிப் பட்டியல் என அவர் தெரிவித்ததாக ஞானசவுந்தரி கூறினார். இதனைத் தொடர்ந்து சென்னை உயர் நீதிமன்றத்தில் மனு தாக்கல் செய்த அவர், அரசு வழக்கறிஞர் நியமனங்களில் 5 லட்சம் முதல் 30 லட்சம் ரூபாய் வரை லஞ்சம் பெறப்பட்டதாகவும், பிற கட்சியைச் சேர்ந்த வழக்கறிஞர்கள் லஞ்சத்தின் உதவியுடன் நியமிக்கப்பட்டதாகவும் குற்றம்சாட்டினார்.
அமைச்சர் ஆனந்தின் பரிந்துரையின் அடிப்படையிலேயே நியமனங்கள் நடைபெறுவதாகவும், இதற்கு முதலமைச்சர் விஜய் பொறுப்பேற்க வேண்டும் எனவும், நியமனங்களுக்கு தடை விதிக்க வேண்டும் எனவும் கோரிக்கை வைத்திருந்தார். வழக்கு விசாரணையின்போது, முதலமைச்சர் விஜய் மற்றும் அமைச்சர் புஸ்ஸி ஆனந்த் ஆகியோரின் பெயர்களை மனுவில் இருந்து நீக்குமாறு உயர் நீதிமன்றம் உத்தரவிட்டது. இதனைத் தொடர்ந்து, ஞானசவுந்தரியை தவெகவில் இருந்து நீக்கியுள்ளது கட்சி.
விழுப்புரம் தெற்கு மாவட்ட செயலாளர் மோகன்ராஜ் வெளியிட்ட செய்திக்குறிப்பில், “இணையம் வழியாக உறுப்பினரான (MS.No.4063/2015) சந்திரமோகன் மனைவி ஞானசவுந்தரி, கட்சியின் எதிரிகளுடன் சேர்ந்து பொய்யான குற்றச்சாட்டுகளை முன்வைத்தார். கட்சியின் கொள்கைகள், ஒழுக்கம் மற்றும் கட்டுப்பாடுகளுக்கு எதிராக செயல்பட்டதால் அவரை அடிப்படை உறுப்பினர் பதவியில் இருந்து உடனடியாக நீக்குகிறோம். கட்சியின் எந்த நிர்வாகியோ உறுப்பினரோ இனி அவருடன் எந்த தொடர்பும் வைத்துக்கொள்ளக் கூடாது” என அறிவித்துள்ளார்.
இந்த சம்பவம் தவெகவில் பரபரப்பை ஏற்படுத்தியுள்ளது. அரசு வழக்கறிஞர் நியமனங்களில் வெளிப்படைத்தன்மை குறித்த கேள்விகள் எழுந்துள்ளன.
