சட்டமன்றத்தில் முதலமைச்சர் விஜய் கொண்டு வந்த மேகதாது அணைக்கு எதிரான தனித் தீர்மானத்தை வரவேற்பதாக தெரிவித்த எதிர்க்கட்சித் தலைவர் உதயநிதி ஸ்டாலின், தமிழக விவசாயிகளின் வாழ்வாதாரத்தை பாதிக்கும் இத்திட்டத்திற்கு திமுகவின் உறுதியான எதிர்ப்பை வலியுறுத்தினார். “மேகதாதுவில் அணை கட்டக்கூடாது என்பதே திமுகவின் தெளிவான நிலைப்பாடு” என்று அவர் தெரிவித்தார்.
காவிரி நதிநீர் பிரச்னையில் தமிழ்நாட்டின் உரிமைகளை நிலைநாட்டுவதில் திமுகவின் பங்கு முக்கியமானது என்பதை சுட்டிக்காட்டிய உதயநிதி, முன்னாள் முதலமைச்சர் கலைஞர் கருணாநிதி ஆட்சியில் மேற்கொள்ளப்பட்ட ஆக்கப்பூர்வ நடவடிக்கைகள் மற்றும் நீண்டகால அரசியல், சட்டப் போராட்டங்களின் விளைவாகவே காவிரியில் தமிழ்நாட்டுக்கு உரிய பங்கு உறுதி செய்யப்பட்டதாகக் கூறினார். ஆட்சிப் பொறுப்பேற்ற ஒரு மாதத்திற்குள் முதலமைச்சர் மு.க.ஸ்டாலின் மேகதாது விவகாரத்தில் உடனடி நடவடிக்கை எடுத்ததை நினைவுகூர்ந்த அவர், கர்நாடகா அரசு ரூ.1,000 கோடி ஒதுக்கீடு செய்தபோது திமுக அரசு தனித் தீர்மானம் நிறைவேற்றியதையும், 2021 ஜூன் மாதம் பிரதமருக்கு எதிர்ப்புக் கடிதம் எழுதியதையும் சுட்டிக்காட்டினார்.
திமுக அரசின் தொடர் முயற்சிகளால்தான் மேகதாது திட்ட அறிக்கை மத்திய அரசால் திருப்பி அனுப்பப்பட்டதாக அவர் விளக்கினார். மேலும், காவிரி நதிநீர் பிரச்னைக்கு தீர்வு காண புதிய நடுவர் மன்றம் அமைக்க மத்திய அரசை வலியுறுத்த வேண்டும் என்று வலியுறுத்திய உதயநிதி ஸ்டாலின், மேகதாது அணை கட்டும் கர்நாடகாவின் முயற்சிகளை முறியடிக்கும் அனைத்து நடவடிக்கைகளுக்கும் திமுக முழு ஆதரவு அளிக்கும் என்று உறுதியளித்தார். தமிழக விவசாயிகளின் நீர் உரிமையைப் பாதுகாக்கும் வகையில் அனைத்துக் கட்சிகளும் ஒன்றுபட்டு செயல்பட வேண்டும் என்ற செய்தியும் இந்த விவாதத்தில் எதிரொலித்தது.
