தெலுங்கு திரையுலகின் மூத்த நடிகையும், பல்வேறு காலகட்டங்களில் முக்கிய குணச்சித்திர வேடங்களை ஏற்று ரசிகர்களின் மனதில் இடம்பிடித்தவருமான பவள சியமலா (75) உடல்நலக் குறைவு காரணமாக இன்று உயிரிழந்தார். அவரது மறைவு தெலுங்கு சினிமா உலகையும், அவரது ரசிகர்களையும் அதிர்ச்சியில் ஆழ்த்தியுள்ளது.
மேடை நாடகங்களில் தனது நடிப்புப் பயணத்தைத் தொடங்கிய பவள சியமலா, 1984-ம் ஆண்டு தெலுங்கு திரையுலகில் அறிமுகமானார். அதன் பின்னர் நான்கு தசாப்தங்களுக்கும் மேலாக தொடர்ந்த அவரது பயணத்தில் 200க்கும் அதிகமான படங்களில் நடித்துள்ளார். தலைமைப் பாத்திரங்கள் முதல் தாய், பாட்டி, அத்தை உள்ளிட்ட குணச்சித்திர வேடங்கள் வரை பல்வேறு தரப்பு பாத்திரங்களை தனது தனித்துவமான நடிப்பால் சிறப்பித்தவர்.
அவரது இயல்பான உணர்ச்சி வெளிப்பாடும், திரைக்கு ஏற்ற உடல்மொழியும் பல இயக்குநர்களின் விருப்பத்துக்கு உரியவராக அவரை மாற்றியது. சமீப காலமாக உடல்நலக் குறைவால் அவதிப்பட்டு வந்த பவள சியமலா, ஹைதராபாத்தில் உள்ள அரசு மருத்துவமனையில் சிகிச்சை பெற்று வந்தார். சிகிச்சைக்கு உட்படுத்தப்பட்டிருந்த நிலையில், இன்று திடீரென மாரடைப்பு ஏற்பட்டு அவர் உயிரிழந்ததாக மருத்துவமனை வட்டாரங்கள் தெரிவித்தன. அவரது மறைவு செய்தி கேள்விப்பட்டதும் சினிமா பிரமுகர்கள், ரசிகர்கள் மற்றும் அவருக்கு நெருக்கமானவர்கள் நேரில் சென்று இரங்கல் தெரிவித்தனர்.
பவள சியமலாவின் இறுதிச் சடங்கு நாளை ஹைதராபாத்தில் நடைபெற உள்ளதாக குடும்பத்தினர் அறிவித்துள்ளனர். அவரது நீண்டகால சினிமா பங்களிப்பு தெலுங்கு திரையுலகில் என்றும் நினைவுகூரப்படும் என ரசிகர்கள் பலர் வருத்தத்துடன் தெரிவித்துள்ளனர். தெலுங்கு சினிமாவின் பொற்கால நடிகைகளில் ஒருவராகக் கருதப்படும் பவள சியமலாவின் மறைவு, திரையுலகுக்கு ஈடு செய்ய முடியாத இழப்பு எனக் கூறப்படுகிறது. அவரது குடும்பத்தினருக்கும், நெருங்கிய உறவினர்களுக்கும் ஆழ்ந்த இரங்கல்.
