புதுக்கோட்டை மாவட்டம், திருமயம் தாலுகாவிற்கு உட்பட்ட ஓணான்குடி பகுதியில், அருண் நினைவாக நேதாஜி சுபாஷ் சந்திரபோஸ் இளைஞர்கள் சார்பில் 3-வது ஆண்டு மாட்டுவண்டி எல்கை பந்தயப் போட்டி சிறப்பாக நடைபெற்றது. ஜல்லிக்கட்டு மற்றும் மாட்டுவண்டி பந்தயங்களுக்கு பெயர் பெற்ற புதுக்கோட்டை மாவட்டத்தில் நடைபெற்ற இந்தப் போட்டி, ஏராளமானோரின் கவனத்தை ஈர்த்தது.
ஓணான்குடி சாலையில் தொடங்கிய இந்த எல்கை பந்தயம் புதுக்கோட்டை சாலை நோக்கி நடைபெற்றது. இதில் சின்ன மாடு, பெரிய மாடு, நடமாடு, கரைச்சான் மாடு, தேன்சிட்டு மாடு உள்ளிட்ட பல்வேறு பிரிவுகளின் கீழ் போட்டிகள் நடத்தப்பட்டன. ஒவ்வொரு பிரிவிற்கும் தனித்தனியாக நிர்ணயிக்கப்பட்ட தொலைவில், எல்லைக் கோட்டிலிருந்து சீறிப்பாய்ந்த மாட்டுவண்டிகள் ஒன்றையொன்று முந்திச் செல்லும் வகையில் விறுவிறுப்பாக பந்தயத்தில் ஈடுபட்டன. மாடுகளின் வேகமும், வண்டி ஓட்டிகளின் திறமையும் பார்வையாளர்களை வெகுவாகக் கவர்ந்தது.
போட்டியை காண ஓணான்குடி மற்றும் சுற்றுவட்டார பகுதிகளிலிருந்து ஆயிரத்திற்கும் மேற்பட்ட பொதுமக்கள், இளைஞர்கள் மற்றும் மாட்டுவண்டி விளையாட்டு ஆர்வலர்கள் திரண்டிருந்தனர். சாலையின் இருபுறங்களிலும் நின்று கைதட்டி, விசில் அடித்து போட்டியாளர்களை உற்சாகப்படுத்தியதால் திருவிழாவைப் போன்ற சூழல் நிலவியது.
பல்வேறு பிரிவுகளில் வெற்றி பெற்ற மாட்டுவண்டி உரிமையாளர்கள் மற்றும் வண்டி ஓட்டிகளுக்கு சுழற்கோப்பை, ரொக்கப் பரிசு மற்றும் நினைவுப் பரிசுகள் வழங்கி ஏற்பாட்டாளர்கள் கவுரவித்தனர். போட்டிக்கான பாதுகாப்பு மற்றும் ஒழுங்கு ஏற்பாடுகள் சிறப்பாக செய்யப்பட்டிருந்ததால் நிகழ்ச்சி அமைதியாகவும் சிறப்பாகவும் நிறைவடைந்தது.
