அமெரிக்க அதிபர் டொனால்ட் டிரம்ப், கனடாவிலிருந்து இறக்குமதி செய்யப்படும் பல்வேறு பொருட்களுக்கு 50 சதவீதம் கூடுதல் வரி விதிக்கும் உத்தரவில் கையெழுத்திட்டுள்ளார். இந்த நடவடிக்கை கனடாவின் வர்த்தகப் பாகுபாட்டுக்கு எதிரான பதிலடியாக அமைந்துள்ளது.
அமெரிக்க மதுபானங்கள், வாகனங்கள் மற்றும் பால் பொருட்களுக்கு கனடா பாரபட்சம் காட்டுவதாக டிரம்ப் நிர்வாகம் குற்றம் சாட்டியுள்ளது. வெள்ளை மாளிகை வெளியிட்ட அறிக்கையின்படி, ஒயின், ஐஸ் ஹாக்கி மட்டைகள், சிமெண்ட் உள்ளிட்ட கனடாவின் முக்கிய ஏற்றுமதிப் பொருட்கள் நேரடியாகப் பாதிக்கப்படும். இருப்பினும், எரிசக்தி பொருட்கள், பொட்டாஷ் மற்றும் ஏற்கனவே சிறப்பு வரிகளுக்கு உட்பட்ட சில பொருட்களுக்கு விலக்கு அளிக்கப்பட்டுள்ளது.
இந்தப் புதிய வரி விகிதங்கள் அடுத்த 30 நாட்களுக்குள் அமலுக்கு வரவுள்ளன. குறிப்பிடத்தக்க வகையில், அமெரிக்கா-மெக்சிகோ-கனடா தடையற்ற வர்த்தக ஒப்பந்தம் (USMCA) உள்ளிட்ட அனைத்து பொருட்களுக்கும் இந்த வரி பொருந்தும் என்பது கனடாவுக்கு பெரும் பின்னடைவாகப் பார்க்கப்படுகிறது. இரு நாடுகளுக்கும் இடையிலான வர்த்தக உறவுகள் மிக நெருக்கமானவை; கனடா அமெரிக்காவின் இரண்டாவது பெரிய வர்த்தகப் பங்காளியாக விளங்குகிறது.
டிரம்ப் இந்த முறை 1930-ஆம் ஆண்டு சுங்கவரி சட்டத்தின் அரிதாகப் பயன்படுத்தப்படும் 338-ஆம் பிரிவைப் பயன்படுத்தியுள்ளார். முன்னதாக அவர் விதித்த சில வரிகளை உச்ச நீதிமன்றம் ரத்து செய்ததைத் தொடர்ந்து, நீதிமன்றங்களில் எளிதில் சவால் செய்ய முடியாத புதிய சட்ட வழியைத் தேர்வு செய்துள்ளார். இதற்கு முன்பு வட அமெரிக்க ஒப்பந்தங்களின் கீழ் வரும் பொருட்களுக்கு விலக்கு அளித்திருந்த டிரம்ப், இம்முறை கடுமையான அணுகுமுறையை மேற்கொண்டுள்ளார்.
கனடா ஏற்கெனவே அமெரிக்க மதுபானங்களை தனது சந்தையிலிருந்து விலக்கியுள்ளது. பல மாகாணங்களில் அமெரிக்க மதுபானங்கள் கடைகளிலிருந்து திரும்பப் பெறப்பட்டுள்ளன. ஐரோப்பிய ஒன்றிய பால் பொருட்களுக்கு முன்னுரிமை அளிப்பது, அமெரிக்க வாகனங்களுக்கு வரம்புகள் விதிப்பது உள்ளிட்ட குற்றச்சாட்டுகளுக்கு எதிராகவே இந்த வரி நடவடிக்கை எடுக்கப்பட்டதாக அமெரிக்க வர்த்தகப் பிரதிநிதி ஜேமிசன் கிரீர் தெரிவித்தார்.
சமீபத்தில் கனடாவில் ஏற்பட்ட காட்டுத்தீயிலிருந்து பரவிய புகை அமெரிக்காவைப் பாதித்ததையும் டிரம்ப் சுட்டிக்காட்டியிருந்தார். மேலும், கனடாவை அமெரிக்காவின் 51-வது மாநிலமாக மாற்ற வேண்டும் என அவர் அவ்வப்போது பேசி வருவதற்கு எதிர்ப்பு தெரிவிக்கும் வகையிலும் கனடாவின் நடவடிக்கைகள் இருந்தன.
கனடா பிரதமர் மார்க் கார்னி இந்த அறிவிப்புக்கு கடுமையான எதிர்ப்பு தெரிவித்துள்ளார். இது USMCA ஒப்பந்தத்தின் நேரடி மீறல் எனக் குற்றம் சாட்டிய அவர், சர்ச்சைகளைத் தீர்க்க அமெரிக்காவுடன் பேச்சுவார்த்தைக்கு தயாராக இருப்பதாகவும் அறிவித்துள்ளார். இந்த வர்த்தகப் பதற்றம் இரு நாடுகளின் பொருளாதாரத்தையும் பாதிக்கும் என பொருளாதார வல்லுநர்கள் எச்சரித்துள்ளனர்.
