இடதுசாரி தீவிரவாதம் அதிகரித்து வருவதாகக் கூறி, அதனுடன் தொடர்புடைய நபர்களுக்கு எதிராக புதிய விசா கட்டுப்பாட்டு கொள்கையை அமெரிக்கா அறிவித்துள்ளது.
அமெரிக்க வெளியுறவுத்துறை செயலாளர் மார்கோ ரூபியோ, வியாழக்கிழமை இந்த புதிய கொள்கையை வெளியிட்டார். இதன்படி, இடதுசாரி தீவிரவாத அமைப்புகள் மற்றும் அவற்றுடன் தொடர்புடைய குழுக்களில் உறுப்பினர்களாக இருந்து, பயங்கரவாதம் அல்லது வன்முறையை ஆதரித்தவர்கள், தூண்டியவர்கள், பொருளாதார சேதப்படுத்தும் நடவடிக்கைகளில் ஈடுபட்டவர்கள் மற்றும் பிற குற்றச் செயல்களுக்கு ஆதரவளித்தவர்கள் மீது விசா கட்டுப்பாடுகள் விதிக்கப்படும் என்று தெரிவிக்கப்பட்டுள்ளது.
இந்த அறிவிப்பை வெளியிட்ட அதே நாளில், வாஷிங்டனில் நடைபெற்ற அரசியல் தீவிரவாதம் தொடர்பான சர்வதேச மாநாட்டின் தொடக்க விழாவில் மார்கோ ரூபியோ உரையாற்றினார்.
அப்போது, “அரசியல் இடதுசாரி வன்முறையை எதிர்கொள்ளும் விஷயத்தில் அமெரிக்காவின் தீவிரவாத எதிர்ப்பு கொள்கையில் நீண்ட காலமாக ஒரு ‘குருட்டுப் பகுதி’ இருந்து வந்தது” என்று அவர் கூறினார்.
அமெரிக்க அதிபர் டொனால்டு டிரம்ப் தலைமையிலான நிர்வாகம், சமீப காலமாக இடதுசாரி தீவிரவாதத்தை தேசிய பாதுகாப்புக்கு அச்சுறுத்தலாகக் கருதி அதற்கு எதிரான நடவடிக்கைகளை தீவிரப்படுத்தி வருகிறது.
2020-ஆம் ஆண்டு இனநீதி போராட்டங்களின்போது நிகழ்ந்த வன்முறை சம்பவங்களில் குற்றவாளிகள் மீது நடவடிக்கை எடுக்காததாக உள்ளூர் நிர்வாகங்களை டிரம்ப் விமர்சித்துள்ளார். அதே நேரத்தில், 2021 ஜனவரி 6-ஆம் தேதி அமெரிக்க நாடாளுமன்ற (Capitol) வளாகத்தில் நடந்த கலவரத்தில் ஈடுபட்ட தனது ஆதரவாளர்கள் மீது முந்தைய நிர்வாகம் எடுத்த நடவடிக்கைகளையும் அவர் எதிர்த்து வந்துள்ளார்.
Center for Strategic and International Studies (CSIS) வெளியிட்ட ஆய்வின்படி, 2016-ஆம் ஆண்டு முதல் அமெரிக்காவில் இடதுசாரி தாக்குதல்கள் மற்றும் சதித் திட்டங்கள் அதிகரித்துள்ளன. அதே நேரத்தில், வலதுசாரி வன்முறைச் சம்பவங்கள் குறைந்துள்ளதாகவும், 2025-ஆம் ஆண்டில் 30 ஆண்டுகளுக்குப் பிறகு முதல்முறையாக இடதுசாரி தாக்குதல்கள் வலதுசாரி தாக்குதல்களை விட அதிகமாக பதிவாகியுள்ளதாகவும் தெரிவிக்கப்பட்டுள்ளது.
எனினும், இடதுசாரி வன்முறை அதிகரித்திருந்தாலும், அதன் மொத்த அளவு வரலாற்று ரீதியாக வலதுசாரி மற்றும் ஜிஹாதி தாக்குதல்களை விட இன்னும் குறைவாகவே உள்ளது என்றும் அந்த ஆய்வு சுட்டிக்காட்டியுள்ளது.
இடதுசாரி தீவிரவாதத்தை குறைத்து மதிப்பிடுவது “கருத்தியல் முன்வைத்த பாரபட்சம்” என்று ரூபியோ குற்றம்சாட்டினார்.
மேலும், “நாகரிகத்தையே வெறுக்கும் மனப்பான்மையே இடதுசாரி தீவிரவாதத்தின் அடிப்படை. உருவாக்க முடியாதவர்கள், சாதிக்க முடியாதவர்கள், மற்றவர்கள் உருவாக்கியவற்றை அழிப்பதையே நோக்கமாகக் கொண்டுள்ளனர்” என்று அவர் கடுமையாக விமர்சித்தார்.
அதேபோல், தங்களை முதலாளித்துவ எதிர்ப்பாளர்கள், பேராதிக்க எதிர்ப்பாளர்கள், கம்யூனிஸ்ட்கள், மார்க்சிஸ்ட்கள் என்று அழைப்பவர்கள் சமத்துவம், நீதி, விடுதலை போன்ற சொற்களை பயன்படுத்தி தங்களது உண்மையான நோக்கத்தை மறைக்கிறார்கள் என்றும் அவர் குற்றம்சாட்டினார்.
கடந்த ஆண்டு நவம்பரில், அமெரிக்க வெளியுறவுத்துறை நான்கு வன்முறை இடதுசாரி அமைப்புகளை வெளிநாட்டு பயங்கரவாத அமைப்புகளாக அறிவித்தது. மேலும், அவற்றின் நிதி ஆதாரங்களை முடக்க உதவும் தகவல்களுக்கு அதிகபட்சமாக 1 கோடி அமெரிக்க டாலர் (10 மில்லியன் டாலர்) வரை வெகுமதி அறிவிக்கப்பட்டுள்ளது.
“இதேபோன்ற மேலும் பல அமைப்புகள் விரைவில் பயங்கரவாத பட்டியலில் சேர்க்கப்படும்” என்றும் மார்கோ ரூபியோ தெரிவித்தார்.
