விஜய் அமைச்சரவையின் இலாகா ஒதுக்கீடும் புதிய சமூக நீதி இலக்கணமும்..!

தமிழக அரசியல் வரலாற்றில் ஒரு புதிய அத்தியாயத்தைத் தொடங்கியுள்ளது சி. ஜோசப் விஜய் தலைமையிலான தமிழக வெற்றிக் கழக (தவெக) அரசு. சினிமா பிம்பம், ரசிகர் மன்றக் கட்டமைப்பு, பிற கட்சிப் பிரமுகர்களின் அனுபவம் மற்றும் படித்த இளைஞர்களின் கூட்டணிக் கலவையாக உருவெடுத்துள்ள இந்த புதிய அமைச்சரவையின் இலாக்காக்கள் ஒதுக்கீடு வெறும் தற்செயலானது அல்ல; அதற்குப் பின்னால் மிகத் தெளிவான, ஆழமான அரசியல் ராஜதந்திரம் ஒளிந்திருக்கிறது.

முதலமைச்சர் விஜய் மற்றும் அவரது 9 அமைச்சர்களின் இலாக்காக்களை உற்றுநோக்கினால், தவெக அரசு எந்தெந்தப் புள்ளிகளில் கவனம் செலுத்த விரும்புகிறது என்பது துல்லியமாகப் புலப்படும்.

திராவிடக் கட்சிகளின் பாரபட்சமும், தவெக-வின் மாற்று வியூகமும்

தமிழக அரசியலில் நீண்டகாலமாக இருந்து வரும் ஒரு மிக முக்கிய விமர்சனம் – “பட்டியல் சமூகத்தைச் சேர்ந்த அமைச்சர்களுக்கு ஏன் முக்கியத்துவம் வாய்ந்த இலாக்காக்கள் ஒதுக்கப்படுவதில்லை?” என்பதுதான். மறைந்த பெருந்தலைவர் காமராஜர் தலைமையிலான காங்கிரஸ் அமைச்சரவையில் தான், பட்டியல் இனத்தைச் சேர்ந்த தியாகி கக்கனுக்கு காவல்துறை (உள்துறை), பொதுப்பணித்துறை போன்ற மிக முக்கிய இலாக்காக்கள் ஒதுக்கப்பட்டன.

அதற்குப் பின் வந்த திராவிடக் கட்சிகளின் ஆட்சிகளில், எத்தனையோ திறமைசாலிகள் இருந்தும், பட்டியல் இனத்தைச் சேர்ந்த அமைச்சர்களுக்குப் பெரும்பாலும் ‘ஆதிதிராவிடர் நலத்துறை’ மட்டுமே தொடர்ந்து சாதி அடையாள அடிப்படையில் ஒதுக்கப்பட்டு வந்தது. “பட்டியல் இனத்தைச் சேர்ந்தவர்களுக்குப் பிற முதன்மைத் துறைகளை வகிக்கத் தகுதி இல்லையா? ஏன் இந்த பாரபட்சம்?” என்ற கேள்வியும் விமர்சனமும் சமூக நீதி பேசும் திராவிட மண்ணில் தார்மீகமாக எழுப்பப்பட்டது. ஜெயலலிதா ஆட்சியில் தனபாலுக்கு உணவுத் துறை ஒதுக்கப்பட்டது போன்ற ஒரு சில விதிவிலக்குகள் இருந்தாலும், முந்தைய ஸ்டாலின் தலைமையிலான திமுக ஆட்சியிலும் இதே விமர்சனம் நீடித்தது. பின்னர், உயர்கல்வித் துறை அமைச்சராக இருந்த பொன்முடி தற்காலிகமாகப் பதவி விலகியபோது, பட்டியல் சமூகத்தைச் சேர்ந்த கோவி. செழியனுக்கு அந்த இலாக்கா வழங்கப்பட்டது ஒரு சமீபத்திய அரசியல் மாற்றமாகும்.

இந்தச் சூழலில்தான், விஜய் தனது அமைச்சரவையில் சமூக நீதியை வெறும் ‘ஆதிதிராவிடர் நலத்துறை’ என்ற எல்லைக்குள் சுருக்கிவிடாமல், அதற்கு முற்றிலும் மாறான ஒரு புதிய முற்போக்குப்பாதையைத் தேர்ந்தெடுத்துள்ளார்.

பட்டியல் சமூகப் பின்னணியில் இருந்து வந்துள்ள அமைச்சர் ராஜ்மோகனுக்கு, மாநிலத்தின் எதிர்காலத்தைத் தீர்மானிக்கும் மிக முக்கிய இலாக்காவான பள்ளிக்கல்வி, தமிழ் வளர்ச்சி, தகவல் மற்றும் விளம்பரத் துறை ஒதுக்கப்பட்டுள்ளது.

ஒரு சமூகத்தின் ஒட்டுமொத்த முன்னேற்றத்திற்கும், அதிகார அதிகாரப் பரவலாக்கலுக்கும் அடிப்படையாக விளங்குவது கல்வி. அப்படிப்பட்ட ‘பள்ளிக்கல்வித் துறையை’ பட்டியல் சமூகத்தைச் சேர்ந்த, நவீன தலைமுறையின் மொழியறிந்த ஒரு படித்த இளைஞரிடம் விஜய் ஒப்படைத்திருப்பது, “முந்தைய திராவிட கட்சிகளின் இலாக்கா பாரபட்சத்திற்கு” ஒரு வலுவான முற்றுப்புள்ளி வைக்கும் முயற்சியாகவே பார்க்கப்படுகிறது.

முதலமைச்சர் விஜய்: அதிகாரமும், நேரடி மக்கள் தொடர்பும்

முதலமைச்சர் சி. ஜோசப் விஜய் தனக்குக் கீழ் பொது நிர்வாகம், உள்துறை, காவல்துறை (IPS), மற்றும் நகராட்சி நிர்வாகம், நகர்ப்புற மற்றும் குடிநீர் வழங்கல் ஆகிய முக்கிய இலாக்காக்களை வைத்துள்ளார்.

உளவுத்துறை மற்றும் காவல்துறை அதிகாரத்தைத் தன் வசம் வைத்திருப்பதன் மூலம் ஆட்சியைத் தன் முழுக் கட்டுப்பாட்டிற்குள் விஜய் கொண்டுவந்துள்ளார்.

குறிப்பாக, நகராட்சி நிர்வாகம் மற்றும் குடிநீர் வழங்கல் போன்ற துறைகள் மக்களின் அன்றாடத் தேவைகளுடன் (அடிப்படை வசதிகள்) நேரடியாகத் தொடர்புடையவை. திரைக்குப் பின்னால் இருக்கும் கோட்டையை விட, மக்களின் அடிமட்டப் பிரச்சினைகளைத் தீர்ப்பதில் முதலமைச்சர் நேரடியாகப் பங்கெடுக்கிறார் என்ற பிம்பத்தை இது உருவாக்குகிறது.

ஆனந்த்: கிராமப்புறங்களை நோக்கிப் பாயும் தவெக-வின் இதயம்

கட்சியின் பொதுச்செயலாளரும், விஜய்யின் நீண்டகால நிழலாகவும் இருக்கும் என். ஆனந்துக்கு ஊரக வளர்ச்சி மற்றும் நீர் வளத்துறை வழங்கப்பட்டுள்ளது.

ரசிகர் மன்றங்களை மக்கள் இயக்கமாக மாற்றிய ஆனந்திற்கு, தமிழகத்தின் கிராமப்புறக் கட்டமைப்பை (Rural Base) வலுப்படுத்தும் பொறுப்பு தரப்பட்டுள்ளது. வறுமை ஒழிப்பு, கிராமப்புறக் கடன் சுமை நீக்கம், பாசனம் போன்ற துறைகள் மூலம், தவெக-வை வெறும் ‘நகர்ப்புற இளைஞர்களுக்கான கட்சி’ என்ற பிம்பத்திலிருந்து மாற்றி, கிராமப்புற விவசாயக் குடும்பங்களின் வாக்குகளை அறுவடை செய்ய ஆனந்த் பயன்படுத்தப்படுவார்.

ஆதவ் அர்ஜுனா: உட்கட்டமைப்பை செதுக்கும் வியூகவாதி
தேர்தல் வியூகங்கள் மற்றும் கள நிர்வாகத்தில் கைதேர்ந்த ஆதவ் அர்ஜுனாவுக்கு பொதுப்பணி மற்றும் விளையாட்டு மேம்பாட்டுத்துறை அளிக்கப்பட்டுள்ளது.

நெடுஞ்சாலைகள், கட்டடங்கள் மற்றும் சிறு துறைமுகங்கள் போன்ற பெரும் உள்கட்டமைப்புத் திட்டங்களை (Infrastructure Projects) நிர்வகிக்கும் பலம் வாய்ந்த துறை இது. இதன் மூலம் தவெக அரசின் ‘வளர்ச்சி முகமாக’ ஆதவ் அர்ஜுனா முன்னிறுத்தப்படுகிறார். மேலும், விளையாட்டுத் துறை மூலம் தமிழகத்தின் இளைய தலைமுறையினரை (Youth Mobilization) நேரடியாகக் கட்சியின் பக்கம் ஈர்க்கும் திட்டமும் இதில் உள்ளது.

கே.ஏ. செங்கோட்டையன்: அனுபவத்திற்கு முக்கியத்துவம்
எம்.ஜி.ஆர் காலம் தொட்டு அஇஅதிமுக-வில் அமைச்சராகப் பணியாற்றிய மூத்த அரசியல்வாதி கே.ஏ. செங்கோட்டையனுக்கு நிதித்துறை ஒதுக்கப்பட்டுள்ளது.

அரசியல் நகர்வு: முற்றிலும் புதிய இளைய தலைமுறையைக் கொண்ட அமைச்சரவையில், நிதி போன்ற மிக முக்கியமான, சிக்கலான துறையை நிர்வகிக்கப் பேராற்றலும் அனுபவமும் தேவை. செங்கோட்டையனின் வருகை, புதிய அரசுக்கு நிர்வாக முதிர்ச்சியையும் (Administrative Stability), நிதி மேலாண்மையில் நம்பகத்தன்மையையும் வழங்குகிறது.

ஆர். நிர்மல்குமார்: டிஜிட்டல் மற்றும் சட்டம்
தவெக-வின் தேர்தல் பிரசாரத்தை டிஜிட்டல் மயமாக மாற்றிய ஆர். நிர்மல்குமாருக்கு மின்சாரம் மற்றும் சட்டத்துறை வழங்கப்பட்டுள்ளது.

நிர்மல்குமாருக்கு சட்டம், நீதிமன்றங்கள், சிறைச்சாலைகள் மற்றும் ஊழல் தடுப்பு போன்ற ‘சிஸ்டம்’ சார்ந்த துறைகள் தரப்பட்டிருப்பதுடன், மாநிலத்தின் வாழ்வாதாரமான மின்சாரத் துறை போன்ற சவாலான துறையும் வழங்கப்பட்டுள்ளது.

நிர்வாகத் தூண்கள்: பி. வெங்கடரமணன் & டாக்டர் கே.ஜி. அருண்ராஜ்

விஜய் மக்கள் இயக்கக் காலத்திலிருந்தே விஜய்யின் நம்பிக்கைக்குரியவராக இருக்கும் பி. வெங்கடரமணனுக்கு உணவு மற்றும் நுகர்வோர் பாதுகாப்புத் துறையும், முன்னாள் ஐஆர்எஸ் (IRS) அதிகாரியான டாக்டர் கே.ஜி. அருண்ராஜுக்கு சுகாதாரத் துறையும் ஒதுக்கப்பட்டுள்ளது.

ரேஷன் விநியோகம் மற்றும் விலைக் கட்டுப்பாடு போன்ற ஏழை மக்களின் மிக அத்தியாவசியத் துறையை நம்பகமான வெங்கடரமணனிடம் விஜய் ஒப்படைத்துள்ளார்.

அதேபோல், ஒரு மருத்துவரும் முன்னாள் ஐஆர்எஸ் அதிகாரியுமான அருண்ராஜுக்கு சுகாதாரத்துறை வழங்கப்பட்டிருப்பது, தவெக-வின் ‘தொழில்நுட்ப ஆளுமைக்கு’ (Technocratic Face) சான்றாகும். மருத்துவக் கல்வி மற்றும் குடும்ப நலனை ஒரு மருத்துவரே கையாள்வது துறை சார்ந்த சீர்திருத்தங்களுக்கு வழிவகுக்கும்.

இளையோர் பிரதிநிதித்துவம்: டாக்டர் டி.கே.பிரபு & செல்வி எஸ். கீர்த்தனா

காரைக்குடியைச் சேர்ந்த பல் மருத்துவர் டி.கே. பிரபுவுக்கு இயற்கை வளங்கள் (சுரங்கம்) துறையும், 29 வயதான இளம் பெண் எம்.எல்.ஏ செல்வி எஸ். கீர்த்தனாவுக்கு தொழில்துறை மற்றும் முதலீட்டு ஊக்குவிப்பும் வழங்கப்பட்டுள்ளது.

மிக இளம் வயதான கீர்த்தனாவிடம் தமிழகத்தின் ‘தொழில்துறை மற்றும் முதலீடுகளை ஈர்க்கும்’ மாபெரும் பொறுப்பு வழங்கப்பட்டிருப்பது, சர்வதேச முதலீட்டாளர்கள் மத்தியில் தவெக அரசு காட்ட விரும்பும் ஒரு ‘மாடர்ன், டைனமிக்’ பிம்பத்தின் வெளிப்பாடு ஆகும். சிவகாசி போன்ற தொழில் நகரப் பின்னணியில் இருந்து வந்தவருக்கு இந்தத் துறை பொருத்தமானது. பிரபுவுக்கு இயற்கை வளங்கள் வழங்கப்பட்டிருப்பது கனிமக் கொள்ளையைத் தடுத்து, அரசுக்கு வருவாய் ஈட்டும் நோக்கம் கொண்டது.

2026-ன் புதிய சமூக நீதி இலக்கணம்

விஜய்யின் இந்த முதல் அமைச்சரவை ஒதுக்கீடு இரண்டு விஷயங்களைத் தெளிவாக உணர்த்துகிறது:

முக்கியப் பொறுப்புகளில்  கட்சியின் அஸ்திவாரமாக இருக்கும் விசுவாசிகளுக்கு (ஆனந்த், வெங்கடரமணன்) மக்கள் தொடர்புத் துறைகளும்; அதிகாரத்துவ பின்னணி கொண்டவர்களுக்கு (அருண்ராஜ், செங்கோட்டையன், ஆதவ் அர்ஜுனா) கொள்கை மற்றும் பொருளாதாரத் துறைகளும்  ஒதுக்கப்பட்டுள்ளன.

இலாக்காக்கள் ஒதுக்கீட்டின் மூலம், தவெக வெறும் ‘சினிமா கவர்ச்சி’ கட்சி அல்ல, மாறாகப் பட்டியல் சமூகத்தினர் உட்பட அனைத்துத் தரப்பினருக்கும் கல்வி மற்றும் அதிகாரப் பகிர்வில் சம உரிமை அளிக்கும் ஒரு திட்டமிட்ட ‘சமூக நீதி’ இயக்கம் என்பதை விஜய் நிரூபிக்க முற்பட்டுள்ளார்.

முன்னாள் அதிகாரிகள், இணைய ஆளுமைகள், பழைய அரசியல் சிங்கங்கள் எனப் பலதரப்பட்ட ஆளுமைகளை ஒருங்கிணைத்து, இலாக்காக்களைப் பிரித்தளித்துள்ள முதலமைச்சர் விஜய்யின் இந்த ‘மாஸ்டர் பிளான்’ களத்தில் எப்படிச் செயல்படப் போகிறது என்பதைப் பொறுத்தே இந்த ஆட்சியின் வெற்றி அமையும்!