டென்னிஸ் உலகின் மிகவும் மதிப்புமிக்க விம்பிள்டன் சாம்பியன்ஷிப் தொடர் தொடங்கி விறுவிறுப்பாக நடைபெற்று வரும் வேளையில், ரசிகர்களால் பெரிதும் எதிர்பார்க்கப்பட்ட கனடா நட்சத்திரம் கார்சன் பிரான்ஸ்டைன் இந்த ஆண்டு விளையாடும் வீராங்கனைகள் பட்டியலில் இடம் பெறாதது ஏமாற்றத்தை அளித்துள்ளது.
அமெரிக்காவில் பிறந்து கனடா நாட்டுக்காக விளையாடி வரும் கார்சன், கடந்த 2024-ல் தொழில்முறை டென்னிஸ் வீராங்கனையாக மாறினார். கடந்த ஆண்டு தனது முதல் விம்பிள்டன் தொடரிலேயே, முன்னாள் அமெரிக்க ஓபன் சாம்பியனான பியான்கா ஆண்ட்ரிஸ்குவை தகுதிச் சுற்றில் வீழ்த்தி, கிராண்ட்ஸ்லாம் முதன்மைச் சுற்றுக்குத் தகுதி பெற்று சாதனை படைத்தார்.
விம்பிள்டனின் ‘மிகவும் அழகான அறிமுக வீராங்கனை’ என்று ரசிகர்களால் புகழப்பட்ட அவர், முதன்மைச் சுற்றில் உலகின் நம்பர் 1 வீராங்கனையான அரினா சபலென்காவுக்கு (Aryna Sabalenka) எதிராகக் கடுமையான போராட்டத்தை வெளிப்படுத்தினார். இந்த ஆண்டு தொடக்கத்தில் ஆஸ்திரேலிய ஓபன் தகுதிச் சுற்றின் போது ஏற்பட்ட காயம் காரணமாக, அவர் இந்த விம்பிள்டன் தொடரில் இருந்து விலகியுள்ளார்.
கடந்த ஆண்டு விம்பிள்டன் விளையாடிய போது, குறைந்த தரவரிசையில் உள்ள டென்னிஸ் வீராங்கனைகள் சந்திக்கும் கடுமையான நிதி நெருக்கடிகள் குறித்து கார்சன் மனம் திறந்தார். கல்லூரி டென்னிஸிலிருந்து தொழில்முறை டென்னிஸிற்கு மாறிய காலகட்டத்தில், தனது சொந்த செலவுகளைக் கவனித்துக் கொள்ள அவர் ‘உபெர் ஈட்ஸ்’ நிறுவனத்தில் உணவு விநியோகம் செய்யும் ஓட்டுநராகப் பணிபுரிந்துள்ளார்.
இது குறித்து அவர் முன்பு அளித்த பேட்டியில், “ஐடிஎஃப் (ITF) போன்ற ஆரம்பக்கட்ட தொடர்களில் விளையாடும் போது எல்லாமே மிகக் கடினம். நான் வசிக்கும் கலிபோர்னியாவில் காரில் எரிபொருள் நிரப்புவதற்கே பெரும் தொகை செலவாகும். மெக்சிகோவில் நடந்த எனது முதல் டபிள்யூடிஏ (WTA) இறுதிப்போட்டிக்கு சில வாரங்களுக்கு முன்பு, எனது வங்கிக் கணக்கில் வெறும் 26 டாலர்கள் (£19) மட்டுமே இருந்தது. அதைக் கண்டு அழுதுவிட்டேன். ஆனால், மனம் தளராமல் பகலில் பயிற்சியை முடித்துவிட்டு, இரவில் லாஸ் ஏஞ்சலஸ் நகரில் மக்களுக்கு உணவு விநியோகம் செய்யும் வேலையைச் செய்தேன்” என்று உருக்கமாகக் குறிப்பிட்டிருந்தார்.
கடந்த விம்பிள்டன் முதன்மைச் சுற்றுக்குத் தகுதி பெற்றதன் மூலம் அவருக்குக் கிடைத்த சுமார் 66,000 பவுண்டுகள் (இந்திய மதிப்பில் சுமார் 70 லட்சத்திற்கும் மேல்) அவரது நிதி நிலைமையைச் சீரமைக்க உதவியது. டென்னிஸ் பயணத்திற்கான செலவுகளைச் சமாளிக்க விளையாட்டுடன் சேர்த்து மாடலிங் துறையிலும் அவர் தொடர்ந்து கவனம் செலுத்தி வருகிறார்.
