இந்திய மருத்துவ ஆராய்ச்சி கவுன்சில் (ICMR) வெளியிட்டுள்ள சமீபத்திய ஆய்வறிக்கையின்படி, இந்திய ஆண்களிடையே வாய்ப் புற்றுநோய் (Oral Cancer) பாதிப்பு முன்னெப்போதும் இல்லாத வகையில் அதிகரித்து வருவது கண்டறியப்பட்டுள்ளது. தொடர்ச்சியான புகையிலைப் பயன்பாட்டினால் ஆண்களுக்கு ஏற்படும் வாய் புற்றுநோய் இந்தியாவில் அதிகரித்து வருகிறது. இத்தகைய அதிகரிப்புப் போக்கைக் காட்டும் பல ஜி20 நாடுகளில் இந்தியாவும் ஒன்றாகும் என்று இந்திய மருத்துவ ஆராய்ச்சிக் கழகத்தின் (ஐசிஎம்ஆர்) சமீபத்திய உலகளாவிய ஆய்வு ஒன்று தெரிவித்துள்ளது.
குறிப்பாக, மது அருந்துதல் மற்றும் புகையிலைப் பயன்பாடு போன்ற காரணிகளால் இந்த பாதிப்பு ஆண்டுக்கு 1.20% என்ற விகிதத்தில் உயர்ந்து வருகிறது. 2024-ஆம் ஆண்டில் மட்டும் இந்தியாவில் சுமார் 11.3 லட்சம் பேர் இப்புற்றுநோயால் பாதிக்கப்பட்டுள்ளதாகப் புள்ளிவிவரங்கள் தெரிவிக்கின்றன. இது கடந்த ஆண்டுகளை விட கணிசமான உயர்வு என்பது குறிப்பிடத்தக்கது.
ஆய்வு செய்யப்பட்ட மற்ற 10 ஜி20 நாடுகளான அர்ஜென்டினா, சீனா, ஜெர்மனி, இத்தாலி, தென் கொரியா, ஆஸ்திரேலியா, கனடா, பிரான்ஸ், துருக்கி மற்றும் அமெரிக்கா ஆகியவற்றில், இந்தியாவில் ஆண்களிடையே வாய் புற்றுநோய் பாதிப்புகள் ஆண்டுக்குச் சுமார் 1.20 சதவீதம் அதிகரித்துள்ளன. சீனா (1.10 சதவீதம்), கனடா (0.94 சதவீதம்) மற்றும் அமெரிக்கா (0.57 சதவீதம்) ஆகிய நாடுகளிலும் இந்த அதிகரிப்புப் போக்குகள் பதிவாகியுள்ளன.
இந்தியாவைத் தொடர்ந்து சீனா, அமெரிக்கா மற்றும் கனடா போன்ற நாடுகளிலும் ஆண்களிடையே வாய்ப் புற்றுநோய் பாதிப்பு அதிகரித்து வருவது உலகளாவிய கவலையை ஏற்படுத்தியுள்ளது. நகர்ப்புற வாழ்க்கை முறை மாற்றம், பதப்படுத்தப்பட்ட உணவுகள் மற்றும் போதைப் பழக்கங்கள் இளைஞர்களையும் இந்தப் பாதிப்புக்கு உள்ளாக்கி வருவதாக ஆய்வில் எச்சரிக்கப்பட்டுள்ளது.
ஆரம்ப நிலையிலேயே கண்டறிந்தால் குணப்படுத்த வாய்ப்புள்ள போதிலும், விழிப்புணர்வு குறைபாடு காரணமாகப் பலர் உயிரிழக்கும் சூழல் நீடிக்கிறது. இந்த அபாயகரமான போக்கைக் கட்டுப்படுத்த கடுமையான புகையிலை ஒழிப்பு நடவடிக்கைகளும், முறையான மருத்துவப் பரிசோதனைகளும் அவசியம் என மருத்துவர்கள் வலியுறுத்துகின்றனர்.
11 நாடுகளில் உள்ள உலகளாவிய புற்றுநோய் கண்காணிப்பகத்தின் (GLOBOCAN) 2022 தரவுகளை அடிப்படையாகக் கொண்டு, ஐசிஎம்ஆர்-தேசிய தொற்றா நோய்கள் தொற்றுநோயியல் நிறுவனம் (ICMR-NINE) நடத்திய ஆய்வில், இந்தியாவில் கர்ப்பப்பை வாய்ப் புற்றுநோய் பாதிப்புகள் குறைந்து வந்தாலும், ஒட்டுமொத்த நோயின் சுமை அதிகமாகவே உள்ளது என்றும் குறிப்பிடப்பட்டுள்ளது.
பொது சுகாதார இதழில் வெளியிடப்பட்ட இந்த ஆய்வில், இந்தியாவில் மார்பகப் புற்றுநோய் பாதிப்புகள் தொடர்ந்து அதிக அளவில் பதிவாகி வருவதாகவும், அதேவேளையில் நாடுகளின் வளர்ச்சி நிலைகள் மற்றும் சுகாதார வசதிகளைப் பொறுத்து இந்தப் போக்குகள் மாறுபடுவதாகவும் கண்டறியப்பட்டுள்ளது.
பெண்களிடையே, தென் கொரியாவில் வாய் புற்றுநோய் பாதிப்பு ஆண்டுக்கு 2.17 சதவீதம் என்ற மிகக் கடுமையான உயர்வைப் பதிவு செய்துள்ளது. அதனைத் தொடர்ந்து பிரான்ஸ் (1.93 சதவீதம்) மற்றும் கனடா (0.54 சதவீதம்) ஆகிய நாடுகள் உள்ளன.
ஆய்வு செய்யப்பட்ட 11 நாடுகளிலும் பெண்களிடையே மார்பகப் புற்றுநோயே முதன்மையான புற்றுநோயாகத் தொடர்கிறது. தென் கொரியாவில் இதன் பாதிப்பு விகிதம் மிக வேகமாக (ஆண்டுக்கு 5.07 சதவீதம்) அதிகரித்துள்ளது. அதனைத் தொடர்ந்து துருக்கி (2.42 சதவீதம்), சீனா (2.03 சதவீதம்), இந்தியா (1.83 சதவீதம்) மற்றும் இத்தாலி (1.04 சதவீதம்) ஆகிய நாடுகளில் அதிகரிப்பு காணப்படுகிறது.
கருப்பை வாய்ப் புற்றுநோயைப் பொறுத்தவரை, சீனாவில் ஆண்டுக்கு 6.11 சதவீதம் என்ற கூர்மையான அதிகரிப்பு பதிவாகியுள்ளது. இருப்பினும், இந்தியாவில் ஆண்டுக்கு -4.19 சதவீதம் சரிவு காணப்பட்டது. அதனைத் தொடர்ந்து தென் கொரியா (-0.20 சதவீதம்), அர்ஜென்டினா (-1.62 சதவீதம்) மற்றும் அமெரிக்கா (-1.17 சதவீதம்) ஆகிய நாடுகளில் சரிவு காணப்பட்டது. இந்தியாவில் பெண்களிடையே மார்பக மற்றும் கருப்பை வாய்ப் புற்றுநோய்களே மிகவும் பொதுவான இரண்டு புற்றுநோய்களாகத் தொடர்கின்றன.
சமீபத்திய பத்தாண்டுகளில் இந்தியாவில் கர்ப்பப்பை வாய்ப் புற்றுநோய் சீராகக் குறைந்து வருவதாக டாக்டர் மாத்தூர் கூறினார். “பரிசோதனை மற்றும் HPV தடுப்பூசியில் ஏற்பட்டுள்ள முன்னேற்றங்களால், மேலும் சரிவுகள் எதிர்பார்க்கப்படுகின்றன,” என்று கூறிய அவர், அதிகரித்து வரும் புற்றுநோய் சுமையைக் கட்டுப்படுத்தும் முயற்சிகளை அரசாங்கத்தின் முன்னெடுப்புகள் வலுப்படுத்தியுள்ளன என்றும் குறிப்பிட்டார்.
உலகளவில், புற்றுநோய் ஒரு பரவலான சுகாதாரச் சவாலாக உருவெடுத்துள்ளது. மேம்பட்ட பரிசோதனை, முன்கூட்டியே கண்டறிதல் மற்றும் சிகிச்சை ஆகியவற்றின் காரணமாக, அதிக வருமானம் கொண்ட நாடுகளில் புற்றுநோய் பாதிப்பு மற்றும் இறப்பு விகிதங்கள் நிலைபெறுவதையோ அல்லது குறைவதையோ காணமுடிகிற போதிலும், ஏற்றத்தாழ்வுகள் தொடர்கின்றன.
ஐசிஎம்ஆர்-நைன் (ICMR-NINE) மதிப்பீடுகளின்படி, 2024-ஆம் ஆண்டில் இந்தியாவில் 1.56 மில்லியன் புதிய புற்றுநோய் பாதிப்புகளும், 874,404 இறப்புகளும் பதிவாகியுள்ளன. தற்போதைய போக்குகள் தொடர்ந்தால், 2045-ஆம் ஆண்டுக்குள் ஆண்டுதோறும் 2.46 மில்லியன் பாதிப்புகள் ஏற்படும் என கணிக்கப்பட்டுள்ளது. 2024-ஆம் ஆண்டில் ஆண்களிடையே வாய் புற்றுநோயால் மட்டும் 113,000-க்கும் மேற்பட்ட புதிய பாதிப்புகள் ஏற்படும் என எதிர்பார்க்கப்படுகிறது. குளோபோகான் (GLOBOCAN) அறிக்கையின்படி, உலகளவில் 2022-ஆம் ஆண்டில் கிட்டத்தட்ட 20 மில்லியன் புதிய புற்றுநோய் பாதிப்புகளும், 9.7 மில்லியன் இறப்புகளும் பதிவாகியுள்ளன.
