நாடாளுமன்றத்தின் மூன்று நாள் சிறப்பு கூட்டத்தொடர் இன்று (ஏப்ரல் 16) தொடங்கியது. கூட்டத்தொடர் தொடங்கிய சில நிமிடங்களிலேயே, மத்திய அரசு கொண்டு வந்துள்ள தொகுதி மறுவரையறை மசோதா 2026 (Delimitation Bill 2026) மற்றும் அரசியலமைப்பு 131-வது திருத்தச் சட்ட மசோதாவுக்கு எதிராக எதிர்க்கட்சிகள் கடும் அமளியில் ஈடுபட்டன. மக்களவை உறுப்பினர்களின் எண்ணிக்கையை 543-லிருந்து 850-ஆக உயர்த்தும் இந்த மசோதா, மக்கள் தொகையைக் கட்டுப்படுத்திய தென் மாநிலங்களின் அரசியல் பிரதிநிதித்துவத்தைக் குறைக்கும் என எதிர்க்கட்சிகள் குற்றம் சாட்டின. இதனால் ஏற்பட்ட கடும் சலசலப்பு காரணமாக அவை நடவடிக்கைகள் அவ்வப்போது தடைபட்டன.
தமிழகத்தைப் பொறுத்தவரை, திமுக உள்ளிட்ட கூட்டணிக் கட்சிகளின் எம்.பி-க்கள் இந்த மசோதாவுக்குத் தங்கள் கடும் எதிர்ப்பைப் பதிவு செய்யும் வகையில் கருப்புச் சட்டை அணிந்து அவைக்கு வந்தனர். “தென் மாநிலங்களின் குரல் ஒடுக்கப்படுவதை அனுமதிக்க மாட்டோம்” என முழக்கமிட்ட அவர்கள், தொகுதி மறுவரையறை மற்றும் மகளிர் இடஒதுக்கீட்டை இணைப்பதற்கு எதிர்ப்புத் தெரிவித்தனர். இதேவேளையில், தமிழக முதல்வர் மு.க.ஸ்டாலின் மசோதாவின் நகலை எரித்துத் தனது எதிர்ப்பைப் பதிவு செய்த நிலையில், நாடாளுமன்ற வளாகத்திலும் தமிழக எம்.பி-க்களின் போராட்டம் அனல் பறக்கத் தொடங்கியுள்ளது.
