ஐபிஎல் 2026 தொடரில் பஞ்சாப் கிங்ஸ் அணிக்கு எதிரான போட்டியின் போது, ராஜஸ்தான் ராயல்ஸ் அணியின் கேப்டன் ரியான் பராக் இ-சிகரெட் புகைத்தது பெரும் சர்ச்சையை ஏற்படுத்தியுள்ளது. இந்தியாவில் தடை செய்யப்பட்ட ஒரு பொருளை நேரலை போட்டியின் போது அவர் பயன்படுத்தியது ரசிகர்கள் மற்றும் கிரிக்கெட் வட்டாரத்தில் அதிர்ச்சியை ஏற்படுத்தியுள்ளது.
கடந்த ஏப்ரல் 28-ம் தேதி முல்லன்பூரில் நடைபெற்ற பஞ்சாப் கிங்ஸ் vs ராஜஸ்தான் ராயல்ஸ் போட்டியின் போது இந்தச் சம்பவம் நிகழ்ந்தது. ராஜஸ்தான் அணி பேட்டிங் செய்து கொண்டிருந்த 16-வது ஓவரில், கேமரா வீரர்களின் ஓய்வறையை நோக்கித் திரும்பியது. அப்போது ரியான் பராக் வேப் பயன்படுத்திக் கொண்டிருப்பது நேரலையில் தெளிவாகத் தெரிந்தது.
இந்த சீசனில் ராஜஸ்தான் அணி புள்ளிப்பட்டியலில் முதல் நான்கு இடங்களில் இருந்தாலும், கேப்டன் ரியான் பராக்கின் தனிப்பட்ட ஆட்டம் மோசமாக உள்ளது. அவர் இதுவரை விளையாடிய 9 போட்டிகளில் வெறும் 117 ரன்கள் மட்டுமே எடுத்துள்ளார்.
மேலும், நேரலை போட்டியின் போது வீரர்கள் புகைப்பிடிக்கும் அல்லது வேப் பயன்படுத்தும் சர்ச்சையில் சிக்கியது இது முதல் முறையல்ல. ஐபிஎல் 2020-ன் போது அப்போதைய ஆஸ்திரேலிய கேப்டன் ஆரோன் பின்ச் ஓய்வறையில் வேப் பயன்படுத்தியது கேமராவில் சிக்கியது.
இந்த ஆண்டு தொடக்கத்தில் தென்னாப்பிரிக்காவின் SA20 லீக் போட்டியின் போது, டி வில்லியர்ஸ் வேப் பயன்படுத்திய வீடியோ வைரலானது. கேமரா தன் பக்கம் திரும்புவதைக் கண்டு அவர் சற்று பதற்றமடைந்ததும் குறிப்பிடத்தக்கது.
மெக்கல்லம் 2015 உலகக்கோப்பை அரையிறுதி போட்டியின் போதும், பென் ஸ்டோக்ஸ் 2019 உலகக்கோப்பை இறுதிப் போட்டியின் போதும் பதற்றத்தைக் குறைக்க கழிவறையில் புகைப்பிடித்ததாகப் பின்னாளில் ஒப்புக்கொண்டனர்.
இந்தியாவில் 2019-ம் ஆண்டின் சட்டப்படி (PECA) மின்னணு சிகரெட்டுகள் மற்றும் வேப்களை தயாரிப்பதும், விற்பனை செய்வதும் மற்றும் பயன்படுத்துவதும் சட்டப்படி குற்றமாகும்.
ஐபிஎல் நடத்தை விதிகளின் கீழ் (Article 2.21 – விளையாட்டின் நற்பெயருக்குக் கேடு விளைவித்தல்), ரியான் பராக்கிற்கு அவரது போட்டி ஊதியத்தில் இருந்து 25% அபராதம் விதிக்கப்பட்டுள்ளது. மேலும் அவருக்கு ஒரு டிமெரிட் புள்ளியும் (Demerit Point) வழங்கப்பட்டுள்ளது.
பிசிசிஐ (BCCI) மற்றும் ஐபிஎல் நிர்வாகம் இது குறித்து பராக்கிடம் விளக்கம் கேட்டுள்ளதாகத் தகவல்கள் தெரிவிக்கின்றன. ஒரு அணியின் கேப்டனாகப் பொறுப்பான பதவியில் இருந்துகொண்டு இத்தகைய செயலில் ஈடுபட்டது சமூக வலைதளங்களில் விவாதமாக மாறியுள்ளது.
