பிப்ரவரி 15, 2026 அன்று கொழும்பில் நடைபெற்ற டி20 உலகக்கோப்பை லீக் ஆட்டத்தில், இந்திய அணி 61 ரன்கள் வித்தியாசத்தில் பாகிஸ்தானை வீழ்த்தி அபார வெற்றி பெற்றது. ஆட்டத்தில் இந்தியா 175 ரன்கள் குவிக்க, பாகிஸ்தான் அணி 114 ரன்களுக்குச் சுருண்டது. ஆனால், இந்த வெற்றிக்கும் மேலாக ஒரு பிரம்மாண்ட டிஜிட்டல் உலக சாதனை தற்போது வெளியாகியுள்ளது.
ஜியோஸ்டார் (JioStar) அதிகாரப்பூர்வமாக வெளியிட்டுள்ள தகவலின்படி, இந்தப் போட்டியை டிஜிட்டல் தளத்தில் மட்டும் சுமார் 163 மில்லியன் (16.3 கோடி) மக்கள் பார்த்துள்ளனர். இது எந்தவொரு ஐசிசி டி20 உலகக்கோப்பை போட்டியிலும் இதுவரை இல்லாத ஒரு மிக உயர்ந்த டிஜிட்டல் ரீச் ஆகும்.
2024 இறுதிப் போட்டியை முறியடித்தது: கடந்த 2024 டி20 உலகக்கோப்பையில் இந்தியா-தென்னாப்பிரிக்கா இடையிலான இறுதிப் போட்டியின் சாதனையை இந்த ஒரு லீக் போட்டி முறியடித்துள்ளது.
அசுர வளர்ச்சி: 2024-ல் நடந்த இந்தியா-பாகிஸ்தான் போட்டியுடன் ஒப்பிடுகையில், இந்த முறை டிஜிட்டல் ரீச்சில் 56% வளர்ச்சி ஏற்பட்டுள்ளது. இது முந்தைய இந்தியா-பாகிஸ்தான் போட்டியை விட 1.2 மடங்கு அதிகமாகும்.
பார்த்த நேரம்: ரசிகர்கள் மொத்தம் 2,000 கோடி (20 பில்லியன்) நிமிடங்கள் இந்தப் போட்டியைத் தங்களது திரைகளில் கண்டு ரசித்துள்ளனர். இது முந்தைய சீசனுடன் ஒப்பிடும்போது 42% அதிகமாகும்.
ஸ்மார்ட் டிவி சாதனை: கனெக்டட் டிவி (CTV) மூலம் பார்த்தவர்களின் எண்ணிக்கை கடந்த முறையை விட 2.4 மடங்கு அதிகரித்துள்ளது.
ஜியோஸ்டார் நிறுவனத்தின் விளையாட்டுப் பிரிவு விற்பனைத் தலைவர் அனுப் கோவிந்தன் கூறுகையில், “2026 ஐசிசி ஆண்கள் டி20 உலகக்கோப்பையில் இந்தியா – பாகிஸ்தான் போட்டிக்கு முந்தைய எதிர்பார்ப்புகளும், அந்தப் போட்டியும் ஒரு மிகச்சிறந்த கிரிக்கெட் விருந்தாக அமைவதற்கான அனைத்து அம்சங்களையும் கொண்டிருந்தன. இந்தப் போட்டி படைத்துள்ள சாதனை அளவிலான ரீச் மற்றும் வியூவர்ஷிப் , பல்வேறு தளங்களில் இந்தத் தொடருடன் உலகெங்கிலும் உள்ள ரசிகர்கள் எவ்வளவு ஆழமாகத் தங்களை இணைத்துக் கொண்டுள்ளனர் என்பதைத் தெளிவாகக் காட்டுகிறது என்றார்.
