சென்னை ஒன் செயலி வாயிலாக மின்னணு மாதாந்திர பயண அட்டை பெறும் வசதியை அமைச்சர் சிவசங்கர் தொடங்கி வைத்தார்.
மாநகர் போக்குவரத்துக் கழகம் மற்றும் கும்டா இணைந்து சென்னை ஒன் செயலி வாயிலாக ரூ.1,000 (கோல்டன் டிக்கெட்) மற்றும் ரூ.2,000 (டைமண்ட் டிக்கெட்) மின்னணு மாதாந்திர பயண அட்டை பெறும் வசதி அறிமுகம் செய்யப்பட்டுள்ளது.
சென்னை பல்லவன் சாலையில் உள்ள மாநகர போக்குவரத்துக் கழக தலைமை அலுவலகத்தில் நடந்த நிகழ்ச்சியில் இந்த வசதியை பொதுமக்கள் பயன்பாட்டுக்கு அமைச்சர் எஸ்.எஸ்.சிவசங்கர் அறிமுகம் செய்து வைத்தார்.
தற்போது, மாநகர் போக்குவரத்துக் கழக முக்கிய பேருந்து நிலையங்களில் மாதாந்திர பயணச்சீட்டு மையங்கள் வாயிலாக வழங்கப்பட்டு வரும் விருப்பம்போல் பயணம் செய்யும் ரூ.1000 மற்றும் ரூ.2000 மதிப்பிலான பயண அட்டைகள், சென்னை ஒன் செயலி வாயிலாக எங்கும் – எப்போதும் கைபேசியில் எளிதாக பெறக்கூடிய மின்னணு பயண அட்டைகளாக மாற்றப்பட்டுள்ளன.
சென்னை ஒன் செயலி வாயிலாக பெறப்படும் இந்த மின்னணு பயண அட்டை வாங்கிய நாளிலிருந்து, தொடர்ந்து 30 நாட்களுக்கு செல்லுபடியாகும். மேலும், இது முழுக்க முழுக்க பணமில்லா பரிவர்த்தனை முறையில் இயங்குவதால் யுபிஐ அல்லது டெபிட், கிரெடிட் கார்டுகள் மூலம் உடனடியாக கட்டணம் செலுத்தி, பயண அட்டை பெறும் வசதி உள்ளது என அதிகாரிகள் கூறினர்.
இதை தொடர்ந்து நாட்டிலேயே சிறந்த பொதுப் போக்குவரத்து அமைப்பை கொண்ட நகரம் என்ற தேசிய விருது பெற்றதற்காக மாநகர் போக்குவரத்துக் கழக அனைத்து பணியாளர்களுக்கும் அமைச்சர் பாராட்டுச் சான்றிதழும், பதக்கமும் வழங்கி கவுரவித்தார்.
இந்தநிகழ்ச்சியில், மாநகர் போக்குவரத்துக் கழக மேலாண் இயக்குநர் த.பிரபுசங்கர், சென்னை ஒருங்கிணைந்த போக்குவரத்து அதிகார அமைப்பு (கும்டா) உறுப்பினர் செயலர் ஐ.ஜெயக்குமார், மாநகர் போக்குவரத்துக் கழக இணை மேலாண் இயக்குநர் ராம.சுந்தரபாண்டியன், உயர் அலுவலர்கள் மற்றும் தொழிற்சங்க பிரதிநிதிகள் கலந்து கொண்டனர்.
