“ஒரே நாடு ஒரே தேர்தல் வேண்டும் என்று கருணாநிதியே கூறியிருக்கிறார்” – பாஜக தலைவர் நயினார் நாகேந்திரன் பேச்சு!

“ஒரே நாடு ஒரே தேர்தல்” திட்டம் குறித்து திமுக தலைவர் மு.க. ஸ்டாலின் எதிர்ப்புக் கருத்துகளை தெரிவித்து வரும் நிலையில், திமுகவின் முன்னாள் தலைவரும், முன்னாள் முதலமைச்சருமான கலைஞர் கருணாநிதியே இத்திட்டத்தை ஆதரித்து பேசியுள்ளதாக தமிழ்நாடு பாஜக தலைவர் நயினார் நாகேந்திரன் தெரிவித்துள்ளார்.

கருத்தரங்கில் நயினார் நாகேந்திரன்:

சென்னை திருவான்மியூரில் இன்று நடைபெற்ற “ஒரே நாடு ஒரே தேர்தல்” குறித்த கருத்தரங்கில், தமிழக பாஜக தலைவர் நயினார் நாகேந்திரன் பங்கேற்றுப் பேசினார். இக்கருத்தரங்கில் ஆந்திர மாநில துணை முதலமைச்சர் பவன் கல்யாண் சிறப்பு விருந்தினராகவும், தெலங்கானா முன்னாள் ஆளுநர் தமிழிசை சௌந்தரராஜன் உட்படப் பலரும் கலந்து கொண்டனர்.

“கருணாநிதியின் ‘நெஞ்சுக்கு நீதி’ மேற்கோள்”:

நிகழ்ச்சியில் பேசிய நயினார் நாகேந்திரன், “தற்போதைய முதலமைச்சர் மு.க. ஸ்டாலின், ‘ஒரே நாடு ஒரே தேர்தல் முறை அமல்படுத்தப்பட்டால், அது ஒரே கட்சி தொடர்ந்து ஆட்சி அதிகாரத்தில் அமர்வதற்கு சாதகமாக அமைந்துவிடும்’ என்று கூறி வருகிறார். ஆனால், அவரது தந்தை, முன்னாள் முதலமைச்சர் கருணாநிதி தனது சுயசரிதையான ‘நெஞ்சுக்கு நீதி’ புத்தகத்தில், ‘அரசு இயந்திரங்களின் செயல்பாடு, நேரம் மற்றும் வளங்களை மீதப்படுத்தும் வகையில் ‘ஒரே நாடு, ஒரே தேர்தல்’ மீண்டும் அமல்படுத்தப்படுவது அவசியமானது’ எனக் குறிப்பிட்டிருந்தார்” என்று சுட்டிக்காட்டினார்.

“ஒரு லட்சம் கோடி செலவு சேமிக்கலாம்”:

சமீபத்திய 2024 ஆம் ஆண்டு தேர்தல்களில் நாடு முழுவதும் சுமார் ஒரு லட்சம் கோடி ரூபாய் செலவழிக்கப்பட்டுள்ளதாகக் குறிப்பிட்ட நயினார் நாகேந்திரன், “இதுவே ஒரே தேர்தலாக இருந்திருந்தால், குறைந்தபட்சம் 12,000 கோடி ரூபாயை சேமித்திருக்கலாம். அதன் மூலம் மக்கள் நலனுக்கான வளர்ச்சிப் பணிகளையும் திட்டங்களையும் நடைமுறைப்படுத்தி இருக்கலாம். உண்மையில், 1967 ஆம் ஆண்டு வரை நாடு முழுவதும் ஒரே நேரத்தில் தான் தேர்தல்கள் நடத்தப்பட்டன” என்றார்.

“கட்சி அரசியலுக்கு அப்பாற்பட்டு விவாதிக்க வேண்டும்”:

“நம் நாட்டின் வளமான எதிர்காலத்திற்கும், நாட்டு மக்களின் நேரம், ஆற்றல் ஆகியவற்றைப் பாதுகாப்பதற்கும் வழிவகை செய்யும் இந்த ‘ஒரே நாடு ஒரே தேர்தல்’ கொள்கையானது, கட்சி அரசியலுக்கு அப்பாற்பட்டு, திறந்த மனதுடன் விவாதிக்கப்பட வேண்டியது” என்றும் நயினார் நாகேந்திரன் வலியுறுத்தினார்.

இக்கருத்தரங்கில் கலந்துகொண்டு “ஒரே நாடு ஒரே தேர்தல்” குறித்து மக்களுக்கு விழிப்புணர்வையும் ஏற்படுத்திய ஆந்திர மாநில துணை முதலமைச்சர் பவன் கல்யாணுக்கு நயினார் நாகேந்திரன் தனது மனமார்ந்த நன்றிகளைத் தெரிவித்தார்.