22 காரட் ஆபரணத் தங்கத்தின் விலை சென்னையில் இன்று (நவ.20) கிராமுக்கு ரூ.100 குறைந்துள்ளது. நேற்று ஒரே நாளில் தங்கம் விலை இருமுறை உயர்ந்த நிலையில் இன்று குறைந்துள்ளது கவனிக்கத்தக்கது.
அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு என சர்வதேச நிலவரத்துக்கு ஏற்ப தங்கத்தின் விலை நிர்ணயிக்கப்படுவது வழக்கம். அந்த வகையில் கடந்த அக்.17-ம் தேதி ஒரு பவுன் ஆபரணத் தங்கம் ரூ.97,600 ஆக விலை அதிகரித்து, வரலாறு காணாத புதிய உச்சத்தை தொட்டது. பின்னர் தங்கம் விலை குறைந்தும், உயர்ந்தும் வருகிறது.
தங்கத்தின் விலை வரலாறு காணாத வகையில் உயர்ந்து வருவதால், நகை தயாரிப்புத் தொழில் கடுமையாகப் பாதிக்கப்பட்டுள்ளது. இந்நிலையில், வரும் மாதங்களில் தங்கம் விலை மேலும் அதிகரிக்கும் என வல்லுநர்கள் கணித்துள்ளதாக தங்க நகை தயாரிப்பாளர்கள் தெரிவித்துள்ளனர்.
இந்நிலையில், சென்னையில் இன்று 22 காரட் ஆபரணத் தங்கம் கிராமுக்கு ரூ.100 குறைந்து, ஒரு கிராம் ரூ.11,500-க்கு விற்பனை ஆகிறது. தங்கம் பவுனுக்கு ரூ.800 குறைந்து, ஒரு பவுன் ரூ.92,000-க்கு விற்பனை ஆகிறது. சென்னையில் 24 காரட் தங்கம் ஒரு பவுன் ரூ.1,00,368 மற்றும் 18 காரட் தங்கம் ஒரு பவுன் ரூ.76,800-க்கும் விற்பனை ஆகிறது.
இதேபோல வெள்ளி விலையும் இன்று குறைந்துள்ளது. வெள்ளி கிராமுக்கு ரூ.3 குறைந்து, ஒரு கிராம் ரூ.173-க்கும், ஒரு கிலோ வெள்ளி ரூ.3,000 குறைந்து, ரூ.1,73,000-க்கும் சந்தையில் விற்பனை ஆகிறது.
