டிட்வா புயலால் புதுச்சேரியில் 3-வது நாளாக கடல் சீற்றத்துடன் காணப்படுகிறது. 15 மீனவ கிராமங்களிலும் படகு, வலைகளை பாதுகாக்க மீனவர்கள் சிரமத்தில் உள்ள நிலையில் கடல் அரிப்பு ஏற்பட்டு சாலை முழுவதும் கடல் நீர் சூழ்ந்து சின்ன காலாப்பட்டு கிராமம் முற்றிலுமாக துண்டிக்கப்பட்டுள்ளது.
புதுச்சேரியில் இரண்டு நாட்களாக தொடர்ந்து மழை பெய்த வருகிறது. இந்நிலையில், இன்று காலை வரையிலான 24 மணி நேரத்தில் புதுச்சேரியில் 7.53 செ.மீ மழை பதிவாகியுள்ளது.
டிட்வா புயலால் ஏற்பட்டுள்ள கடல் சீற்றத்தால் புதுச்சேரி கடற்கரைச் சாலை மூடப்பட்டது. இது தெரியாமல் ஆர்வமாக பொதுமக்களும், சுற்றுலா பயணிகளும் கடற்கரைக்கு வந்த நிலையில் போலீஸார் அறிவுரை கூறி திருப்பி அனுப்பினர்.
டிட்வா புயலின் தாக்கம் மீனவ கிராமங்களில் அதிகம் இருந்தது. குறிப்பாக கனகசெட்டிக்குளம் தொடங்கி முள்ளோரை வரை 15 கிராமங்களிலும் படகு, வலைகளை பாதுகாக்க மீனவர்கள் சிரமத்துக்கு உள்ளானார்கள். குறிப்பாக சோலைநகர் பகுதியில் மழைநீர் புகுந்தததால் படகுகளை பாதுகாப்பான மேடான பகுதிகளுக்குக் கொண்டு சென்றனர்.
மழை காரணமாக சின்ன காலாப்பட்டு பகுதியில் இருந்து ஊருக்குச் செல்லும் பிரதான சாலையில் கடல் நீரால் அரிப்பு ஏற்பட்டு கிராமம் துண்டிக்கப்பட்டது. கடல் அரிப்பு பிரதான சாலை உடைந்து துண்டிக்கப்பட்டு கிராம மக்கள் 300 பேர் தவிக்கின்றனர்.
இதுபற்றி மீனவர்கள் கூறுகையில், “நேற்று சாலை இருந்தது. காலையில் எழுந்து பார்த்தோம். சாலையை காணவில்லை. கடல் அரிப்பு அதிகமாக இருந்ததால் தூண்டில் முள் வளைவு கேட்டோம். அதை செய்யவில்லை. அதனால் தான் இப்பாதிப்பு ஏற்பட்டுள்ளது” என்றனர்.
குறிப்பாக படகுகள் நிறுத்தி வைக்கப்பட்ட பகுதிக்கு டிராக்டர், ஜேசிபி இயந்திரம் செல்ல முடியாத நிலை உள்ளது. மாவட்ட நிர்வாகம் இதில் உதவ வேண்டும் எனக் கோரியுள்ளனர்.
டிட்வா புயலால் மழை தொடர்ச்சியாக பெய்வதால் பொதுமக்கள் வீட்டுக்குள் முடங்கினர். இயல்பு வாழ்க்கை பாதிக்கப்பட்டுள்ளது. புதுச்சேரி வெறிச்சோடியது. கடல் சீற்றம் அதிகரித்து, அதிக உயரத்துக்கு அலை அடிக்கிறது. பழைய துறைமுகத்திலுள்ள பழைய பாலம் வரை அலையின் வேகம் உள்ளது.
