டெல்லியில் எதிர்க்கட்சி தலைவர் ராகுல் காந்தியை திமுக துணைப் பொதுச்செயலாளரும், மாநிலங்களவை உறுப்பினருமான கனிமொழி சந்தித்தார்.
வரவிருக்கும் சட்டமன்றத் தேர்தலுக்கான திமுக மற்றும் காங்கிரஸ் இடையேயான தொகுதிப் பங்கீட்டுப் பிரச்சினை விரைவில் தீர்க்கப்படும் என்று எதிர்பார்க்கப்படுகிறது, அந்தவகையில் திமுக பிரதிநிதிகள் குழு இன்று புதன்கிழமை டெல்லியில் காங்கிரஸ் தலைவர் ராகுல் காந்தியை சந்திக்க உள்ளதாக தெரிவிக்கப்பட்டிருந்தது.
அதன்படி, டெல்லியில் உள்ள காங். மூத்த தலைவர் சோனியா காந்தி இல்லத்தில் ராகுல் காந்தியை கனிமொழி எம்.பி. சந்தித்தார். இரு கட்சிகளின் வட்டாரங்களின்படி, திமுக நாடாளுமன்றக் குழுத் தலைவர் கனிமொழி, சட்டமன்றத் தேர்தலுக்கான தங்கள் கட்சித் தலைமை வழங்கும் இடப் பங்கீட்டு முன்மொழிவைத் தெரிவிப்பதற்காக ராகுல் காந்தியை சந்தித்துள்ளதாக தெரிகிறது.
இருப்பினும், “கடந்த தேர்தலில் காங்கிரஸ் கட்சிக்கு 25 தொகுதிகள் வழங்கப்பட்டன; அதில் 18 தொகுதிகளில் வெற்றி பெற்றது. இப்போது இரண்டு தொகுதிகளை கூடுதலாக வழங்கி அந்த எண்ணிக்கையை மேம்படுத்தலாம் என்று திமுக வட்டாரங்கள் கூறுகின்றன.
இந்த விவகாரம் குறித்து உறுதிப்படுத்திய தமிழ்நாடு காங்கிரஸ் கமிட்டி தலைமையினருக்கு நெருக்கமான ஒரு தகவல் வட்டாரம், திமுக குழு காங்கிரஸ் கட்சியின் மற்ற மூத்த தலைவர்களுடனும் ஆலோசனை நடத்தலாம் என தெரிவித்தது. அந்த பேச்சுவார்த்தைகளின் மூலம், இரு தரப்புக்கும் சம்மதமாகும் வகையிலான ஒரு உடன்பாடு உருவாகும் என்றும் அந்த வட்டாரம் கூறியுள்ளது.
