தமிழக சட்டசபை கூட்டத் தொடர் நேற்று தொடங்கியது. இதில் நிதியமைச்சர் தங்கம் தென்னரசு, 2026- 2027ஆம் நிதியாண்டுக்கான இடைக்கால பட்ஜெட்டை தாக்கல் செய்தார். தேர்தலில் வெற்றி பெற்று புதிய அரசு அமைந்ததுடன் முழு பட்ஜெட் தாக்கல் செய்யப்படும் என்பது குறிப்பிடத்தக்கது. இந்த நிலையில் நேற்று சட்டசபைக்கு அதிமுக எம்எல்ஏக்கள் அழைப்பிதழ் ஒன்று எடுத்து சென்றனர்.
அதில், “காது குத்தும் விழா” என குறிப்பிட்டிருந்தது. பட்ஜெட் என்ற பெயரில் தமிழக மக்களுக்கு காது குத்தும் விழா என அதிமுக குற்றம்சாட்டியுள்ளது. மேலும் அந்த அழைப்பிதழில் “கூவம் சுத்திகரிப்பு, மழைநீர் வடிகால், சிங்கார சென்னை போன்ற திட்டங்களுக்கு விதவிதமாக காது குத்தப்படும்.
“காது குத்து விழாவுக்கு தலைமை தாங்குபவர் தமிழக முதல்வர் ஸ்டாலின், காது குத்துபவர் நிதியமைச்சர் தங்கம் தென்னரசு, இடம் சட்டசபை வளாகம், நேரம் : காலை 10 மணி” என குறிப்பிடப்பட்டு விமர்சித்திருந்தனர்.
ஆனால், நேற்றைய பட்ஜெட் அறிவிப்பில் புதிய அறிவிப்புகள் ஏதும் இல்லை என்றும் எதிர்க்கட்சிகள் விமர்சித்த நிலையில், திமுகவின் 5 ஆண்டுகளின் சாதனை தொகுப்பே பட்ஜெட் என முதலமைச்சர் மு.க.ஸ்டாலின் தெரிவித்திருந்தார்.
இந்தநிலையில், அதிமுகவின் காது குத்தும் விழா விமர்சனத்து பதிலடி கொடுக்கும் வகையில் திமுகவினர் மொட்டை அடிக்கும் விழா என எடப்பாடி பழனிசாமியை விமர்சனம் செய்து பத்திரிகை பதிவிட்டுள்ளனர். அதில், 2019ம் ஆண்டு தொடங்கி தொடர்ந்து 10 தேர்தல்களாக தோற்ற அடிமை அதிமுகவின் பொதுச்செயலாளருக்கு மொட்டை அடிக்கும் விழா…. இந்த ஆண்டும் வெகு விமர்சையாக நடைபெறவுள்ளது.
மேற்படி விழாவில் மொட்டை அடிப்பதோடு சேர்த்து பதினொறு தோல்வி அடிமைசாமி என்ற பட்டம் வழங்கப்படும் என்று தெரிவித்துக்கொள்கிறேன்.. விழா தலைமை கட்சியின் ஓன பாஜக இடம் கமலாலயம், நேரம் : காலை 7.30மணி” என குறிப்பிடப்பட்டு விமர்சித்துள்ளனர்.
