தமிழ்நாடு இந்து சமய அறநிலையத்துறை கட்டுப்பாட்டில் உள்ள கோவில்களில் நடைபெறும் முறைகேடுகள், லஞ்சம் மற்றும் சட்டவிரோத பணப் பரிவர்த்தனைகளுக்கு எதிராக கடுமையான நடவடிக்கை எடுக்கும் வகையில் புதிய முயற்சியை அறிவித்துள்ளார் அமைச்சர் ரமேஷ். இதுதொடர்பாக எக்ஸ் (ட்விட்டர்) தளத்தில் வெளியிட்ட சிறப்பு பதிவில் அமைச்சர், “அன்பிற்குரிய பொது மக்கள் அனைவருக்கும் ஒரு முக்கிய அறிவிப்பு” என்று தொடங்கி, துறை சார்ந்த கோவில்களில் நிகழும் பல்வேறு குற்றச் செயல்களுக்கு எதிராக நேரடியாகத் தனது தனிப்பட்ட மின்னஞ்சல் முகவரிக்கு புகார் அளிக்கலாம் என்று அழைப்பு விடுத்தார்.
முறைகேடுகள், சிறப்பு தரிசனம் உள்ளிட்டவற்றுக்காக பணம் கேட்பது, திருப்பணிகள் மற்றும் வேலைவாய்ப்புகளில் லஞ்சம் வாங்குதல் உள்ளிட்ட புகார்களை விரிவான விளக்கம் மற்றும் ஆதாரங்களுடன் minister_hrce@tn.gov.in (mailto:minister_hrce@tn.gov.in) என்ற முகவரிக்கு அனுப்பலாம். அமைச்சரும் அவரது அலுவலகமும் இத்தகைய புகார்களை நேரடியாகப் பரிசீலித்து உரிய நடவடிக்கை எடுக்கும் என்று உறுதியளித்தார்.
இந்த அறிவிப்பு வெளியான சூழலில், அமைச்சர் ரமேஷ் அண்மையில் திருச்செந்தூர் சுப்பிரமணிய சுவாமி திருக்கோயிலில் அதிரடி ஆய்வு மேற்கொண்ட சம்பவம் பெரும் கவனத்தைப் பெற்றது. சாதாரண பக்தரைப் போல முகக்கவசம் அணிந்து கோயிலுக்கு வந்த அமைச்சர், சிறப்பு தரிசனத்திற்காக ஊழியர்கள் லஞ்சம் கோரியதை நேரில் கண்டார். உடனடியாக நடவடிக்கை எடுத்து, சம்பந்தப்பட்ட அர்ச்சகர் மற்றும் பணியாளர்களைப் பணியிடை நீக்கம் செய்தார். இந்தச் சம்பவம் துறைக்குள் பெரும் அதிர்வலைகளை ஏற்படுத்தியது.
இந்தப் புதிய முயற்சி, கோயில் நிர்வாகத்தில் வெளிப்படைத்தன்மையை அதிகரிக்கவும், பக்தர்களின் நம்பிக்கையைப் பாதுகாக்கவும் உதவும் என்று எதிர்பார்க்கப்படுகிறது. தமிழகத்தில் ஆயிரக்கணக்கான கோயில்கள் அறநிலையத்துறை கட்டுப்பாட்டில் உள்ள நிலையில், பொதுமக்களின் நேரடி பங்கேற்பு மூலம் ஊழலை ஒழிப்பது இலக்கு என அமைச்சர் தரப்பில் தெரிவிக்கப்பட்டுள்ளது.
இந்த நடவடிக்கை துறை அதிகாரிகள் மற்றும் பணியாளர்களிடையே பெரும் எச்சரிக்கையை ஏற்படுத்தியுள்ளது. மேலும் புகார்கள் வரும் பட்சத்தில் கடும் நடவடிக்கை எடுக்கப்படும் என எச்சரிக்கை விடுக்கப்பட்டுள்ளது. பக்தர்கள் இந்த வாய்ப்பைப் பயன்படுத்தி கோயில் நிர்வாகத்தை சீர்திருத்த உதவ வேண்டும் என அறநிலையத்துறை வட்டாரங்கள் வேண்டுகோள் விடுத்துள்ளன.
