மகாராஷ்டிரா சட்டசபையில் பா.ஜனதா எம்.எல்.ஏ. விக்ரம் பச்சுதே, பள்ளி மாணவர்களின் உடல்நலத்தை பாதிக்கும் எனர்ஜி பானங்கள் விற்பனை குறித்து முக்கிய கேள்வி எழுப்பினார். இதற்கு பதிலளித்த உணவு மற்றும் மருந்து நிர்வாகத்துறை அமைச்சர் நர்ஹரி ஜிர்வால், பள்ளி வளாகங்களைச் சுற்றி எனர்ஜி பானங்கள் விற்பனை செய்வதற்கு எதிராக கடுமையான நடவடிக்கைகள் எடுக்கப்படும் என உறுதியளித்தார்.
அமைச்சர் தெரிவித்ததாவது, பள்ளி வளாகத்திலிருந்து 500 மீட்டர் சுற்றளவுக்குள் ‘ஸ்டிங்’ உள்ளிட்ட எனர்ஜி பானங்கள் அல்லது வேறு எந்த போதைப் பொருட்களும் விற்கப்படுவது கண்டறியப்பட்டால், அதற்குப் பொறுப்பானவர்கள் மீது உடனடியாக கடும் நடவடிக்கை எடுக்கப்படும். இதனை தீவிரமாக கண்காணிக்க உணவு மற்றும் மருந்து நிர்வாகத் துறைக்கு தெளிவான உத்தரவுகள் பிறப்பிக்கப்பட்டுள்ளன.
பள்ளி மாணவர்களிடையே இத்தகைய பானங்களின் பயன்பாடு அதிகரிப்பது கவலையளிக்கும் விஷயம் என்பதை சுட்டிக்காட்டிய அவர், இதுபோன்ற விற்பனையை முற்றிலுமாகத் தடுக்க துறை அதிகாரிகள் தொடர் கண்காணிப்பு நடத்த வேண்டும் என அறிவுறுத்தினார். சுகாதார நிபுணர்களின் கருத்துப்படி, எனர்ஜி பானங்களில் அதிக அளவு காஃபின் மற்றும் சர்க்கரை உள்ளன. இவை இளம் வயது மாணவர்களுக்கு தூக்கமின்மை, பதற்றம், இதயத் துடிப்பு அதிகரிப்பு, பல் சிதைவு உள்ளிட்ட பல்வேறு உடல்நலக் கோளாறுகளை ஏற்படுத்தும் அபாயம் உள்ளது. நீண்டகாலப் பயன்பாடு மாணவர்களின் செறிவு, நினைவாற்றல் மற்றும் ஒட்டுமொத்த வளர்ச்சியையும் பாதிக்கும் என எச்சரிக்கப்படுகிறது.
இதனைத் தடுக்கும் வகையில், அனைத்து பள்ளிகளிலும் மாணவர்களுக்கு எனர்ஜி பானங்கள் மற்றும் அவற்றால் ஏற்படும் உடல்நலக் கேடுகள் குறித்த விழிப்புணர்வு பிரசாரங்களை நடத்த உத்தரவிடப்பட்டுள்ளது. பெற்றோர்கள், ஆசிரியர்கள் மற்றும் மாணவர்கள் இணைந்து இந்தப் பிரச்னைக்கு தீர்வு காண வேண்டும் என அமைச்சர் வலியுறுத்தினார்.
இந்த நடவடிக்கை மாணவர்களின் ஆரோக்கியத்தைப் பாதுகாக்கும் முக்கிய அரசு முயற்சியாகப் பார்க்கப்படுகிறது. பள்ளி அருகே உள்ள கடைகள் மற்றும் விற்பனையாளர்கள் மீது தொடர் சோதனைகள் நடத்தப்பட்டு, விதிமீறல்கள் கண்டறியப்பட்டால் உரிய சட்ட நடவடிக்கைகள் எடுக்கப்படும் என அதிகாரிகள் தெரிவித்துள்ளனர். இத்தகைய தடுப்பு நடவடிக்கைகள் மாணவர்களின் எதிர்கால ஆரோக்கியத்தை உறுதி செய்யும் என எதிர்பார்க்கப்படுகிறது.
