இந்தியா-ஆஸ்திரேலியா தலைமை நிர்வாக அதிகாரிகள் (CEO) மன்றம் மற்றும் பொருளாதார சாலைவரைபட (Economic Roadmap) வர்த்தக வரவேற்பு நிகழ்ச்சியில் பங்கேற்ற பிறகு, பிரதமர் நரேந்திர மோடி மற்றும் ஆஸ்திரேலிய பிரதமர் அந்தோனி அல்பனீஸ் இணைந்து எடுத்துக் கொண்ட செல்ஃபி சமூக வலைதளங்களில் கவனம் பெற்றுள்ளது. இரு நாடுகளுக்கும் இடையிலான நெருக்கமான நட்பு மற்றும் வளர்ந்து வரும் கூட்டாண்மையை இந்த தருணம் வெளிப்படுத்தியது.
நிகழ்ச்சியில் உரையாற்றிய பிரதமர் மோடி, உலகம் தற்போது நிச்சயமற்ற சூழல், விநியோகச் சங்கிலி பாதிப்பு மற்றும் எரிசக்தி நெருக்கடியை எதிர்கொண்டு வரும் நிலையில், இந்தியாவும் ஆஸ்திரேலியாவும் “இயற்கையான மற்றும் நம்பகமான கூட்டாளிகள்” எனக் குறிப்பிட்டார்.
இரு நாடுகளும் சுத்தமான எரிசக்தி, உள்கட்டமைப்பு, செயற்கை நுண்ணறிவு (AI), கல்வி உள்ளிட்ட பல்வேறு துறைகளில் ஒத்துழைப்பை மேலும் வலுப்படுத்த வேண்டும் என்று அவர் வலியுறுத்தினார்.
2022-ஆம் ஆண்டு சாதனை நேரத்தில் கையெழுத்தான இந்தியா-ஆஸ்திரேலியா பொருளாதார ஒத்துழைப்பு மற்றும் வர்த்தக ஒப்பந்தம் (ECTA) இருநாடுகளின் வர்த்தக உறவை பலப்படுத்தியுள்ளதாகவும், அதன் அமலாக்கத்திற்குப் பிறகு இந்தியாவின் ஆஸ்திரேலியாவுக்கான ஏற்றுமதி இரட்டிப்பாக உயர்ந்துள்ளதாகவும் மோடி தெரிவித்தார். தற்போது விரிவான பொருளாதார ஒத்துழைப்பு ஒப்பந்தம் (CECA) நோக்கி இரு நாடுகளும் நகர்ந்து வருவதாகவும் கூறினார்.
இந்தியாவில் பசுமை ஹைட்ரஜன், சூரிய மின்கலங்கள், காற்றாலை, நீர்மின் திட்டங்கள் உள்ளிட்ட துறைகளுக்கான உற்பத்தி சூழல் வேகமாக உருவாக்கப்பட்டு வருவதாகவும், 2030-க்குள் 500 ஜிகாவாட் புதுப்பிக்கத்தக்க மின்சார உற்பத்தி திறனையும், 2070-க்குள் நெட்-சீரோ (Net Zero) இலக்கையும் இந்தியா அடைய முயற்சிப்பதாகவும் அவர் தெரிவித்தார்.
மேலும், அணுசக்தித் துறையில் தனியார் முதலீட்டுக்கு இந்தியா வாய்ப்பளித்திருப்பதாகவும், 2047-க்குள் 100 ஜிகாவாட் அணுமின் உற்பத்தி இலக்கு நிர்ணயிக்கப்பட்டுள்ளதாகவும், ஆஸ்திரேலியாவின் யுரேனியம் வளம் இந்தியாவின் அணுசக்தி வளர்ச்சியில் முக்கிய பங்கு வகிக்க முடியும் என்றும் மோடி கூறினார்.
இந்தியாவின் துறைமுகங்கள், விமான நிலையங்கள், தேசிய நெடுஞ்சாலைகள், ரயில்வே மற்றும் நகர்ப்புற உள்கட்டமைப்பு திட்டங்களில் ஆஸ்திரேலிய முதலீட்டாளர்களுக்கு மிகப்பெரிய வாய்ப்புகள் உள்ளதாக அவர் தெரிவித்தார். இந்தியாவில் தினமும் சுமார் 34 கிலோமீட்டர் தேசிய நெடுஞ்சாலைகளும், 8 கிலோமீட்டருக்கும் அதிகமான ரயில் பாதைகளும் அமைக்கப்படுகின்றன என்றும் குறிப்பிட்டார்.
செயற்கை நுண்ணறிவு, குவாண்டம் தொழில்நுட்பம், செமிகண்டக்டர், தரவு மையங்கள் மற்றும் டிஜிட்டல் பொது உள்கட்டமைப்பு போன்ற எதிர்கால தொழில்நுட்பத் துறைகளில் இரு நாடுகளும் இணைந்து உலகளாவிய தீர்வுகளை உருவாக்க முடியும் என்று மோடி தெரிவித்தார். இதற்காக இந்திய அரசு AI மிஷன், குவாண்டம் மிஷன் மற்றும் செமிகண்டக்டர் திட்டங்களுக்கு 10 பில்லியன் அமெரிக்க டாலருக்கும் அதிகமான நிதி ஒதுக்கியுள்ளதாக அவர் கூறினார்.
ஆஸ்திரேலிய ஓய்வூதிய நிதிகள் 4 டிரில்லியன் அமெரிக்க டாலருக்கும் அதிகமான சொத்துகளை நிர்வகித்து வருவதாகவும், இந்தியா பாதுகாப்பான, நிலையான மற்றும் நீடித்த முதலீட்டு சந்தையாக இருப்பதால் ஆஸ்திரேலிய முதலீட்டாளர்கள் இந்தியாவில் நம்பிக்கையுடன் முதலீடு செய்யலாம் என்றும் அவர் அழைப்பு விடுத்தார்.
கல்வித்துறையில், டீக்கின் பல்கலைக்கழகம் மற்றும் வொல்லொங்கோங் பல்கலைக்கழகம் குஜராத்தின் GIFT சிட்டியில் வளாகங்களைத் தொடங்கியிருப்பது இந்தியா மீதான நம்பிக்கையை வெளிப்படுத்துவதாகவும், மாணவர் பரிமாற்றத்தை திறமையாளர் கூட்டாண்மையாக மாற்ற வேண்டும் என்றும் மோடி வலியுறுத்தினார்.
உரையின் நிறைவில், இந்தியா-ஆஸ்திரேலியா உறவு தலைநகரங்களைத் தாண்டி மாநிலங்கள், நகரங்கள், பல்கலைக்கழகங்கள் மற்றும் தொழில்துறைகள் வரை விரிவடைய வேண்டும் என்றும், மாநிலத்திற்கு மாநிலம் மற்றும் துறைக்கு துறை என்ற அடிப்படையில் புதிய கூட்டாண்மைகளை உருவாக்க வேண்டும் என்றும் பிரதமர் மோடி அழைப்பு விடுத்தார்.
