சென்னை நகரின் நிர்வாக மையத்தை மாற்றும் முக்கிய முடிவுக்கு வழிவகுக்கும் திட்டம் ஒன்று தமிழக அரசு வட்டாரங்களில் தீவிர ஆலோசனையில் உள்ளது. கோயம்பேடு பகுதியில் உள்ள பழைய புறநகர் பேருந்து நிலைய வளாகத்தில் புதிய தலைமைச் செயலக வளாகம் அமைக்கும் யோசனை அதிகாரிகள் மத்தியில் வலுப்பெற்றுள்ளதாக தகவல்கள் வெளியாகியுள்ளன. இந்தத் தகவல் அரசு அதிகாரிகளிடையே பரபரப்பை ஏற்படுத்தியுள்ளதோடு, சென்னையின் எதிர்கால நகரத் திட்டமிடலில் மாற்றங்களை எதிர்பார்க்கும் நிலையை உருவாக்கியுள்ளது.
கோயம்பேடு புறநகர் பேருந்து நிலையம் 2002-ம் ஆண்டு சுமார் 36 ஏக்கர் நிலப்பரப்பில் ரூ.103 கோடி செலவில் கட்டப்பட்டது. தமிழகத்தின் பல்வேறு மாவட்டங்கள், புதுச்சேரி, கர்நாடகா, கேரளா, ஆந்திரா, தெலங்கானா உள்ளிட்ட அண்டை மாநிலங்களுக்கான பேருந்து சேவைகளுக்கு முக்கிய மையமாக இருந்தது. அருகிலேயே மாநகரப் பேருந்து நிலையமும் செயல்பட்டு வந்தது.
எனினும், கிளாம்பாக்கத்தில் புதிய ஒருங்கிணைந்த பேருந்து நிலையம் திறக்கப்பட்ட பிறகு கோயம்பேட்டின் பயன்பாடு பெருமளவு குறைந்துவிட்டது. இதையடுத்து, அந்த இடத்தில் வணிக வளாகம் மற்றும் பன்னோக்கு மையம் அமைக்கும் திட்டத்தை சென்னை பெருநகர் வளர்ச்சிக் குழுமம் (CMDA) பரிசீலித்து வந்த நிலையில், தற்போது புதிய தலைமைச் செயலகத்துக்கான யோசனை முன்வைக்கப்பட்டுள்ளது.
தற்போதைய தலைமைச் செயலக வளாகத்தில் இட நெருக்கடி அதிகரித்துள்ளது. அதிகாரிகள் மற்றும் ஊழியர்களின் வாகன நிறுத்துமிடப் பற்றாக்குறை, மைய நகரப் பகுதியில் நிலவும் போக்குவரத்து நெரிசல் ஆகியவை அலுவலகப் பணிகளில் தாமதத்தை ஏற்படுத்துவதாக அதிகாரிகள் சுட்டிக்காட்டுகின்றனர்.
கோயம்பேடு பகுதியில் மெட்ரோ ரயில், மாநகரப் பேருந்து மற்றும் தொலைதூரப் பேருந்து இணைப்புகள் சிறப்பாக உள்ளன. இது அதிகாரிகள் மற்றும் பொதுமக்களின் போக்குவரத்தை எளிதாக்கும். மேலும், அரும்பாக்கம், நெற்குன்றம், விருகம்பாக்கம் உள்ளிட்ட அருகிலுள்ள பகுதிகளில் பல மூத்த அதிகாரிகள் வசிப்பதால் நிர்வாக ரீதியாகவும் இந்த இடம் வசதியானதாகக் கருதப்படுகிறது.
இந்தத் திட்டத்துக்கு முதலமைச்சரின் ஒப்புதல் கிடைத்தால், வரவிருக்கும் நிதிநிலை அறிக்கையில் அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. புதிய தலைமைச் செயலகத்தை அமைக்க சுமார் ரூ.350 கோடி வரை செலவாகலாம் என மதிப்பிடப்பட்டுள்ளது. இருப்பினும், தமிழக அரசு இதுவரை எந்த அதிகாரப்பூர்வ அறிவிப்பையும் வெளியிடவில்லை. இத்திட்டம் நிறைவேறினால், சென்னை நகரின் நிர்வாகச் செயல்பாடுகள் மேம்படுவதோடு, போக்குவரத்து நெரிசலை குறைக்கும் வகையில் முக்கிய மாற்றம் ஏற்படும் எனக் கருதப்படுகிறது.
