கோவை வடக்கு தாசில்தார் அலுவலகத்தில் லஞ்ச ஒழிப்புத்துறை அதிகாரிகள் இன்று மாலை திடீர் சோதனையில் ஈடுபட்டனர். கூடுதல் காவல் கண்காணிப்பாளர் தலைமையில் நடைபெற்ற இந்த நடவடிக்கை பரபரப்பை ஏற்படுத்தியது.
மாலை சுமார் 5 மணி அளவில் தொடங்கிய சோதனையில், அலுவலகத்தின் பல்வேறு பிரிவுகளில் அதிகாரிகள் தீவிர ஆய்வு மேற்கொண்டனர். சோதனையின் ஒரு பகுதியாக அலுவலக வளாகத்தில் நிறுத்தப்பட்டிருந்த ஊழியர்கள் மற்றும் பொதுமக்களின் இருசக்கர, நான்கு சக்கர வாகனங்களும் முழுமையாக பரிசோதிக்கப்பட்டன.
வாகனங்களில் கணக்கில் வராத பணம், முக்கிய ஆவணங்கள் அல்லது சந்தேகத்திற்கிடமான பொருட்கள் உள்ளனவா என்பது குறித்து லஞ்ச ஒழிப்புத்துறை அதிகாரிகள் தீவிரமாக ஆய்வு செய்தனர். மேலும், அலுவலகத்தில் பணியாற்றும் சில அதிகாரிகளிடம் தனித்தனியாக விசாரணை நடத்தப்பட்டு வருவதாக தகவல் வெளியாகியுள்ளது.
சோதனை நடைபெற்று வந்ததால், வடக்கு தாசில்தார் அலுவலகத்தின் பிரதான நுழைவாயில் தற்காலிகமாக மூடப்பட்டு, பொதுமக்கள் உள்ளே செல்லவும் வெளியே வரவும் கட்டுப்பாடுகள் விதிக்கப்பட்டன. அலுவலக வளாகத்தில் இருந்த அனைத்து வாகனங்களும் முழுமையான சோதனைக்கு பின்னரே வெளியே செல்ல அனுமதிக்கப்பட்டன.
இந்த திடீர் நடவடிக்கையால் அலுவலக வளாகத்தில் பரபரப்பான சூழல் நிலவியது. லஞ்ச ஒழிப்புத்துறையினர் தொடர்ந்து சோதனை மேற்கொண்டு வருவதால், சோதனையின் முடிவில் மேலும் முக்கிய தகவல்கள் வெளியாகலாம் என எதிர்பார்க்கப்படுகிறது.
