மாதத்தின் முதல் நாளான இன்று (ஆகஸ்ட் 1) வெளியிடப்பட்ட அரசு தரவுகளின்படி, இந்தியாவின் சரக்கு மற்றும் சேவை வரி (GST) வசூல் ஜூலை மாதத்தில் தொடர்ந்து அதிகரித்து, ஆண்டுக்கு ஆண்டு அடிப்படையில் 15.4 சதவீதம் உயர்ந்து ரூ. 2.11 லட்சம் கோடியை எட்டியுள்ளது. ஜூலை மாதத்தின் மொத்த ஜிஎஸ்டி வருவாயின் அடிப்படையில், மத்திய ஜிஎஸ்டி (CGST) மூலம் ரூ. 39,835 கோடி, மாநில ஜிஎஸ்டி (SGST) மூலம் ரூ. 47,881 கோடி மற்றும் ஒருங்கிணைந்த ஜிஎஸ்டி (IGST) மூலம் ரூ. 1.23 லட்சம் கோடி வசூலிக்கப்பட்டுள்ளது.
ரிசர்வ் வங்கி ஃபிக்சட் டெபாசிட் விதிகளில் அதிரடி மாற்றங்களைக் கொண்டுவந்துள்ளது. இது தொடர்பான திருத்தப்பட்ட அறிவுறுத்தல்கள் ‘ரிசர்வ் வங்கி (வணிக வங்கிகள் – வைப்புத்தொகையின் மீதான வட்டி விகிதம்) இரண்டாம் திருத்த வழிகாட்டுதல்கள், 2026’-ன் கீழ் வெளியிடப்பட்டுள்ளன. புதிய விதிமுறைகள் வரும் அக்டோபர் 1, 2026 முதல் நடைமுறைக்கு வரவுள்ளன.
இதன்படி, வங்கிகள் ஒரே நாளில் பெறப்படும் ஒத்த தொகைக்கான வைப்புத்தொகைக்கு, நாட்டின் அனைத்து கிளைகளிலும் ஒரே சீரான வட்டி விகிதத்தை வழங்க வேண்டும் என்று ரிசர்வ் வங்கி உத்தரவிட்டுள்ளது. பெரிய அளவிலான வைப்புத்தொகைகள் உட்பட அனைத்து வாடிக்கையாளர்களுக்கும் கிளைகள் வாரியாக வட்டியில் எந்தவிதமான பாகுபாடும் காட்டக் கூடாது எனத் தெரிவிக்கப்பட்டுள்ளது.
20 சதவீத எத்தனால் கலக்கப்பட்ட பெட்ரோலால் பழைய வாகனங்களின் இன்ஜின்களில் பழுது மற்றும் மைலேஜ் குறைவது குறித்து கவலைகள் நிலவி வரும் நிலையில், மேற்கு ஆசிய நெருக்கடியின் போது எத்தனால் கலப்பு இல்லாவிட்டால் பெட்ரோல் விலை மிக அதிகளவில் உயர்ந்திருக்கும் என்று மத்திய அரசு தெரிவித்துள்ளது. எத்தனால் கலப்புக் கொள்கை காரணமாக இறக்குமதிச் சார்ந்திருப்பு குறைந்துள்ளதுடன், பொதுமக்களுக்குப் பெரும் விலை உயர்வில் இருந்தும் நிவாரணம் கிடைத்துள்ளது.
மத்திய கிழக்கு நெருக்கடியின் போது கச்சா எண்ணெய் விலை ஒரு பீப்பாய் 135 டாலரை எட்டிய வேளையில், இந்தியாவில் பெட்ரோல் விலை லிட்டருக்கு ரூ.125 வரை சென்றிருக்கக் கூடும். இருப்பினும், எத்தனால் கலப்புத் திட்டம் மற்றும் உள்நாட்டு உற்பத்தி காரணமாக, நுகர்வோருக்குப் பெட்ரோல் வெறும் ரூ.94.77 என்ற விலையிலேயே கிடைத்தது. உலகளாவிய கச்சா எண்ணெய் விலை உச்சத்தில் இருந்தபோது, லிட்டருக்கு சுமார் ரூ.30 வரை சேமிப்பு ஏற்பட்டு பொதுமக்களுக்குப் பெரும் பலன் கிடைத்துள்ளதாக அரசு வெளியிட்ட அறிக்கையில் குறிப்பிடப்பட்டுள்ளது.
