தனுஷ் – வெற்றிமாறன் ஐந்தாவது முறையாக இணைந்துள்ள ‘தமிழ் முருகன்’ திரைப்படத்தில் தனுஷின் புதிய கதாபாத்திர தோற்றம் மற்றும் அறிமுக வீடியோ வெளியாகி உள்ளது.
‘பொல்லாதவன்’, ‘ஆடுகளம்’, ‘வட சென்னை’ மற்றும் ‘அசுரன்’ போன்ற வெற்றிப் படங்களைத் தொடர்ந்து, தனுஷ் – வெற்றிமாறன் கூட்டணியில் உருவாகும் புதிய திரைப்படம் ‘தமிழ் முருகன்’. அறிவுமதி எழுதியுள்ள இக்கதையை, தனுஷின் ‘வுண்டர்பார் பிலிம்ஸ்’ மற்றும் ‘புரொடக்ஷன் மைல்ஸ் டு கோ’ நிறுவனங்கள் இணைந்து தயாரிக்கின்றன. இத்திரைப்படத்திற்குச் சாய் அபயங்கர் இசையமைக்கிறார்.
இது ஒரு பண்டைய கால வரலாற்றுப் பின்னணியைக் கொண்ட திரைப்படமாக உருவாகிறது. தமிழ் மக்களுக்கும், தமிழ் நிலத்திற்கும் பாதுகாவலனாக வரும் ஒரு வீரமிக்க கதாபாத்திரத்தில் தனுஷ் நடிக்கிறார். அண்மையில் இப்படத்தின் ஃபர்ஸ்ட் லுக் டீசர் வெளியான நிலையில், தற்போது தனுஷின் கதாபாத்திர தோற்ற வீடியோ வெளியிடப்பட்டுள்ளது.
கையில் வேல் ஏந்தி, யானை மீது கம்பீரமாக அமர்ந்திருக்கும் தனுஷின் இந்த தோற்றம் ரசிகர்களிடையே வரவேற்பைப் பெற்றுள்ளது. இப்படத்தில் தனுஷுடன் இணைந்து மற்றொரு முன்னணி நடிகரான விஜய் சேதுபதியும் ஒரு முக்கிய கதாபாத்திரத்தில் நடிக்க உள்ளதாகத் தகவல்கள் வெளியாகியுள்ளன.
நீண்ட இடைவெளிக்குப் பிறகு தனுஷ் – வெற்றிமாறன் கூட்டணி மீண்டும் இணைந்துள்ளதாலும், இது ஒரு பீரியட் ஃபிலிம் (Historical Period Film) என்பதாலும் ‘தமிழ் முருகன்’ படத்தின் மீதான எதிர்பார்ப்பு கோலிவுட் வட்டாரத்தில் பன்மடங்கு அதிகரித்துள்ளது.
அதேவேளையில், ‘தமிழ் முருகன்’ என்ற தலைப்பு வைத்து, தமிழ்க் கடவுள் முருகனின் பின்னணியில் கதைக்களமும், தனுஷின் கதாபாத்திரமும் அமைந்திருப்பதாக கூறப்படுகிறது. முருகு என்றால் அழகு என்று பொருள்படும் வகையில், முருகன் அழகான தோற்றம் கொண்டிருக்கும்நிலையில், தனுஷ் தாடியுடன் இருப்பது போன்று வெளியிடப்பட்டுள்ள போஸ்டருக்கு ஒரு தரப்பினர் கடும் எதிர்ப்பும், நம்பிக்கையை சிதைக்கும் வகையில் இருப்பதாகவும் விமர்சனங்களையும் முன்வைத்துள்ளனர்.
