திருவள்ளூர் மாவட்டம் பழவேற்காட்டில், முதிய தம்பதியர் தனியாக இருப்பதை நோட்டமிட்டு, பட்டப்பகலில் வீட்டிற்குள் புகுந்த மர்ம கும்பல் ஒன்று, 55 வயது பெண்ணைக் கழுத்தை அறுத்துக் கொலை செய்து, 15 சவரன் தங்க நகைகளைக் கொள்ளையடித்துச் சென்ற சம்பவம் அப்பகுதியில் பெரும் அதிர்ச்சியையும் பரப்பரப்பையும் ஏற்படுத்தியுள்ளது.
பழவேற்காடு பழைய பேருந்து நிலையம் அருகே ராதாகிருஷ்ணன் – வனஜா (55) தம்பதியினர் வசித்து வந்தனர். இவர்களது ஒரு மகன் மற்றும் இரண்டு மகள்களுக்குத் திருமணமாகித் தனித்தனியே வசித்து வருவதால், இந்த முதிய தம்பதியினர் மட்டும் வீட்டில் தனியாக வசித்து வந்தனர். ராதாகிருஷ்ணன் வீட்டின் அருகிலேயே மளிகைக் கடை நடத்தி வர, வனஜா வீட்டிலிருந்தபடியே மாவு வியாபாரம் செய்து வந்துள்ளார்.
வழக்கம் போல காலையில் கடையில் இருந்த தனது கணவருக்குத் தேநீர் கொடுத்துவிட்டு வனஜா வீட்டிற்குத் திரும்பியுள்ளார். பிற்பகலில் மளிகைக் கடையைப் பூட்டிவிட்டு ராதாகிருஷ்ணன் வீட்டிற்கு வந்துள்ளார். அங்கே வனஜா கழுத்தில் கத்திக் குத்துப்பட்டு, ரத்த வெள்ளத்தில் சடலமாகக் கிடப்பதைக் கண்டு அலறித் துடித்துள்ளார். அவரது அலறல் சத்தத்தைக் கேட்டு ஓடிவந்த அக்கம் பக்கத்தினர் உடனடியாகக் காவல் துறைக்குத் தகவல் தெரிவித்தனர்.
தகவலறிந்து சம்பவ இடத்திற்கு சென்ற திருப்பாலைவனம் காவல்துறையினர் விசாரணையைத் தொடங்கினர். முதற்கட்ட விசாரணையில், வனஜா தனியாக இருப்பதை நோட்டமிட்ட மர்ம கும்பல், மாவு வாங்குவது போல நடித்து வீட்டிற்குள் புகுந்துள்ளது தெரியவந்தது. பின்னர், வனஜாவின் கழுத்தில் கத்தியால் கொடூரமாகக் குத்திக் கொலை செய்துவிட்டு, அவர் கழுத்தில் அணிந்திருந்த 15 சவரன் தங்க நகைகளைப் பறித்துக் கொண்டு, அக்கும்பல் தப்பியோடியுள்ளது தெரியவந்துள்ளது.
சம்பவ இடத்திற்கு வரவழைக்கப்பட்ட கைரேகை நிபுணர்கள் மற்றும் மோப்ப நாய் உதவியுடன் காவல்துறையினர் முக்கியத் தடயங்களைச் சேகரித்தனர். பின்னர் வனஜாவின் சடலத்தைக் கைப்பற்றிப் பிரேத பரிசோதனைக்காகப் பொன்னேரி அரசு மருத்துவமனைக்கு அனுப்பி வைத்தனர்.
இக்கொலைச் சம்பவம் குறித்துத் திருப்பாலைவனம் காவல்துறையினர் வழக்குப் பதிவு செய்து, அப்பகுதியில் உள்ள கண்காணிப்பு கேமரா (CCTV) காட்சிகளைத் தீவிரமாக ஆய்வு செய்து, தப்பியோடிய மர்ம கும்பலை வலைவீசித் தேடி வருகின்றனர். பட்டப்பகலில் நடந்த இந்தத் துணிகரக் கொலைச் சம்பவம் அப்பகுதி மக்களிடையே பெரும் பீதியை ஏற்படுத்தியுள்ளது.
