ஹாலிவுட்டின் மிகவும் எதிர்பார்க்கப்பட்ட திரைப்படங்களில் ஒன்றான ‘Spider-Man: Brand New Day’, உலகம் முழுவதும் வெளியாகி வசூலில் புதிய வரலாறு படைத்துள்ளது.
மார்வெல் ஸ்டுடியோஸ் மற்றும் சோனி பிக்சர்ஸ் இணைந்து தயாரித்துள்ள இந்தப் படம், வெளியான முதல் வார இறுதியிலேயே உலகளவில் 927 மில்லியன் அமெரிக்க டாலர் (இந்திய மதிப்பில் ரூ.7,700 கோடிக்கும் மேல்) வசூலித்து சாதனை படைத்துள்ளது.
இந்த வசூல் மூலம், ‘Avengers: Endgame’ படத்துக்கு அடுத்தபடியாக, உலக சினிமா வரலாற்றில் இரண்டாவது மிகப்பெரிய தொடக்க வார இறுதி வசூலை பெற்ற திரைப்படமாக Brand New Day உருவெடுத்துள்ளது.
வட அமெரிக்காவில் மட்டும் சுமார் 355 மில்லியன் டாலரும், சர்வதேச சந்தைகளில் 572 மில்லியன் டாலருக்கும் மேல் வசூலித்துள்ளதாக தகவல்கள் தெரிவிக்கின்றன. குறிப்பாக சீனா, இந்தியா மற்றும் ஐரோப்பிய நாடுகளில் ரசிகர்கள் பெரும் வரவேற்பு அளித்துள்ளனர். சீனாவில் மட்டும் 121 மில்லியன் டாலர் வசூலித்த நிலையில், இந்தியாவிலும் ஹாலிவுட் படங்களுக்கான தொடக்க நாள் வசூலில் புதிய சாதனை படைத்துள்ளதாக கூறப்படுகிறது.
இந்தப் படத்தில், ‘No Way Home’ படத்திற்குப் பிறகு, அனைவராலும் மறக்கப்பட்ட பீட்டர் பார்க்கரின் தனிமை, போராட்டம் மற்றும் அடையாளத் தேடலை மையமாகக் கொண்டு கதை நகர்கிறது. டாம் ஹாலண்டின் நடிப்பு ரசிகர்களிடமும் விமர்சகர்களிடமும் பாராட்டைப் பெற்றுள்ளது. ஜெண்டயா, ஜேக்கப் படலான் உள்ளிட்ட நடிகர்களின் நடிப்பும் படத்திற்கு பலம் சேர்த்துள்ளது.
சமீப ஆண்டுகளில் “சூப்பர் ஹீரோ படங்களின் மீதான ஆர்வம் குறைந்துவிட்டது” என்ற கருத்தை இந்தப் படம் முறியடித்துள்ளதாக திரைப்பட விமர்சகர்கள் கூறுகின்றனர். அடுத்த சில நாட்களில் 1 பில்லியன் டாலர் வசூல் என்ற மைல்கல்லையும் Spider-Man: Brand New Day எட்டும் என பாக்ஸ் ஆபிஸ் நிபுணர்கள் கணித்துள்ளனர்.
