சினிமாத் துறையிலிருந்து அரசியலுக்கு வந்த பல ஜாம்பவான்கள் தங்களது முதல் தேர்தலிலேயே மலைக்க வைக்கும் வாக்கு சதவீதத்தைப் பெற்று வரலாற்றைப் புரட்டிப் போட்டுள்ளனர். அந்த வரிசையில், 2026 சட்டமன்றத் தேர்தலில் களமிறங்கியுள்ள நடிகர் விஜய்யின் ‘தமிழக வெற்றிக் கழகம்’ நாளைய தேர்தல் முடிவுகளில் எவ்வளவு சதவீத வாக்குகளை அறுவடை செய்யும் என்ற எதிர்பார்ப்பு ஒட்டுமொத்த இந்தியாவையும் தமிழகத்தை நோக்கித் திருப்பியுள்ளது.
எம்.ஜி.ஆர், என்.டி.ஆர் போன்ற ஜாம்பவான்கள் தங்களது முதல் தேர்தலிலேயே 30 சதவீதத்திற்கும் அதிகமான வாக்குகளைப் பெற்று ஆட்சிக் கட்டிலில் அமர்ந்தது ஒருபுறம் இருக்க, விஜயகாந்த் போன்றோர் 8 சதவீத வாக்குகளுடன் ஒரு மாற்றத்திற்கான விதையை விதைத்தனர்.
அந்த வகையில், 1977-ம் ஆண்டு தனது முதல் சட்டமன்றத் தேர்தலைச் சந்தித்த மக்கள் திலகம் எம்.ஜி.ஆர் தலைமையிலான அதிமுக, 33.52% வாக்குகளைப் பெற்று ஆட்சியைப் பிடித்தது ஒரு வரலாற்றுச் சாதனையாகும். அதேபோல், ஆந்திராவில் என்.டி.ராமாராவ் (NTR) அவர்கள் 1983-ல் தெலுங்கு தேசம் கட்சியைத் தொடங்கி, வெறும் 9 மாதங்களில் 46.30% வாக்குகளை அள்ளிப் பிடித்து அரியணையில் அமர்ந்தார். இவர்களின் இந்த பிரம்மாண்ட வெற்றி, சினிமா செல்வாக்கு அரசியலில் எவ்வளவு பெரிய மாற்றத்தை ஏற்படுத்தும் என்பதற்கு இன்றும் சான்றாக உள்ளது.
இதனைத் தொடர்ந்து, 2006-ம் ஆண்டு தனித்துப் போட்டியிட்ட ‘கேப்டன்’ விஜயகாந்த் தலைமையிலான தேமுதிக 8.38% வாக்குகளைப் பெற்று தமிழக அரசியலில் ஒரு தவிர்க்க முடியாத சக்தியாக உருவெடுத்தது. ஆந்திராவில் நடிகர் சிரஞ்சீவி 2009-ல் பிரஜா ராஜ்யம் கட்சி மூலம் 16.32% வாக்குகளையும், பவன் கல்யாண் 2019-ல் தனது ஜன சேனா கட்சி மூலம் 5.53% வாக்குகளையும் பெற்று தங்களது அரசியல் பயணத்தைத் தொடங்கினர். இந்தத் தலைவர்கள் அனைவரும் ஆட்சியைப் பிடிக்கிறார்களோ இல்லையோ, பாரம்பரியமான பெரிய கட்சிகளின் வாக்கு வங்கியில் பெரும் விரிசலை ஏற்படுத்தி, அரசியல் திசையை மாற்றியமைத்தவர்கள் என்பது குறிப்பிடத்தக்கது.
தற்போது வெளியாகியுள்ள பல்வேறு தேர்தலுக்குப் பிந்தைய கருத்துக் கணிப்புகள், விஜய்யின் அரசியல் வருகை தமிழக அரசியலில் ஒரு ‘மூன்றாம் துருவத்தை’ உருவாக்கியிருப்பதை உறுதிப்படுத்துகின்றன. Axis My India போன்ற சில கணிப்புகள் தவெக கட்சிக்கு சுமார் 35 சதவீத வாக்குகள் வரை கிடைக்க வாய்ப்புள்ளதாகக் கூறி அதிர வைத்துள்ளன. இது உண்மையானால், எம்.ஜி.ஆரின் முதல் தேர்தல் சாதனையை விஜய் முறியடிக்க வாய்ப்புள்ளது. அதே சமயம், மற்ற சில கணிப்புகள் தவெக 10 முதல் 15 சதவீத வாக்குகளைப் பெற்று திமுக, அதிமுகவின் வாக்கு வங்கியில் கணிசமான பாதிப்பை ஏற்படுத்தும் எனக் கூறுகின்றன. குறிப்பாக இளைஞர்கள் மற்றும் முதல்முறை வாக்காளர்களின் வாக்குகள் பெருமளவில் விஜய்க்குச் சாதகமாக இருக்கும் என எதிர்பார்க்கப்படுகிறது.
தமிழகத்தின் அரசியல் வரலாறு எப்போதும் நட்சத்திரங்களுக்கு சிவப்புக் கம்பளம் விரித்தே வந்துள்ளது. இருப்பினும், தற்போதைய களநிலைமை மிகவும் சவாலானது. நாளைய (மே 4 ) வாக்கு எண்ணிக்கையில் விஜய் பெறும் வாக்கு சதவீதம், அவர் ‘கிங்’ ஆக உருவெடுப்பாரா அல்லது ‘கிங் மேக்கராக’ நீடிப்பாரா என்பதைத் தீர்மானிக்கும். விஜய்யின் அரசியல் பயணம் விஜயகாந்தின் 8 சதவீதத்தைத் தாண்டுமா அல்லது என்.டி.ஆரின் 46 சதவீதத்தை நெருங்குமா என்பதற்கான விடை இன்னும் சில மணிநேரங்களில் தெரிந்துவிடும்.
