“மக்கள் அவரை வெறுப்பார்கள் என்று நினைத்தேன்”!. கமேனியின் இறுதி ஊர்வலத்தை பார்த்து டிரம்ப் அதிர்ச்சி!

ஈரானின் மறைந்த உச்ச தலைவர் அயதுல்லா அலி கமேனியின் இறுதிச் சடங்கில் திரண்டிருந்த மக்கள் கூட்டத்தைக் கண்டு அதிர்ச்சியடைந்ததாக அமெரிக்க அதிபர் டொனால்ட் ட்ரம்ப் தெரிவித்துள்ளார்.

‘ஆக்சியோஸ்’ (Axios) ஊடகத்திற்கு பேட்டியளித்த டிரம்ப், கமேனியை ஈரானிய மக்கள் வெறுப்பார்கள் என்று தாம் கருதியதாகவும், ஆனால் இறுதி ஊர்வலத்தில் லட்சக்கணக்கான மக்கள் பங்கேற்றது தமக்கு ஆச்சரியத்தை ஏற்படுத்தியதாகவும் அவர் கூறியுள்ளார். சனிக்கிழமையன்று தெஹ்ரானில் தொடங்கிய இறுதிச் சடங்கில், ஆயிரக்கணக்கான மக்கள் பங்கேற்று, பழிவாங்குவோம் என்று முழக்கமிட்டதுடன், கமேனியின் உருவப்படங்களைத் தாங்கி ஊர்வலமாகச் சென்றனர்.

ஈரானை 1989 முதல் வழிநடத்தி வந்த 86 வயதான கமேனி, கடந்த பிப்ரவரி 28 அன்று ஈரான்-இஸ்ரேல் போர் தொடங்கிய முதல் நாளில், இஸ்ரேல் நடத்திய வான்வழித் தாக்குதலில் கொல்லப்பட்டார். இவருடன் இவரது குடும்ப உறுப்பினர்கள் மற்றும் உயர் அதிகாரிகள் பலரும் உயிரிழந்தனர். கமேனியின் உடல் மூன்று நாட்கள் தெஹ்ரானில் வைக்கப்பட்டிருக்கும் என்றும், பின்னர் ஜூலை 7-ம் தேதி புனித நகரமான கோமுக்குக் கொண்டு செல்லப்படும் என்றும் தெரிவிக்கப்பட்டுள்ளது. அதன் தொடர்ச்சியாக, புதன்கிழமையன்று ஈராக் வழியாக ஊர்வலம் நடைபெற்று, இறுதியாக வியாழக்கிழமை கமேனியின் சொந்த ஊரான மஷ்காத்தில் அவரது உடல் அடக்கம் செய்யப்படும்.

இஸ்ரேலின் வான்வழித் தாக்குதலில் கமேனியுடன் அவரது பேத்தி, மகள், மருமகன் மற்றும் அவரது மகன் மொஜ்தபா கமேனியின் மனைவி ஆகியோரும் கொல்லப்பட்டனர். இந்நிலையில், பாதுகாப்பு காரணங்களுக்காகவும், இஸ்ரேலின் அச்சுறுத்தல் மற்றும் கண்காணிப்பு அபாயங்களைக் கருத்தில் கொண்டும், ஈரானின் புதிய உச்ச தலைவரான மொஜ்தபா கமேனி தனது தந்தையின் இறுதிச் சடங்குகளில் கலந்து கொள்ளப் போவதில்லை என்றும் அறிவிக்கப்பட்டிருந்தது.

தற்போது நடைபெற்று வரும் இறுதிச் சடங்குகள், ஈரானின் இறையாண்மைக்கும் அதன் புதிய தலைவருக்கும் வலுசேர்க்கும் ஒன்றாகப் பார்க்கப்படுகிறது. ஹார்முஸ் ஜலசந்தியில் ஈரானின் ஆதிக்கத்தை நிலைநிறுத்துவது மற்றும் அமெரிக்காவுடனான போர் நிறுத்தப் பேச்சுவார்த்தைகள் ஆகியவற்றில் ஈரான் கவனம் செலுத்தி வரும் சூழலில், போர் காரணமாகத் தள்ளிவைக்கப்பட்டிருந்த இந்த இறுதி ஊர்வல நிகழ்வு முக்கியத்துவம் பெறுகிறது. போர் முடிவுக்கு வரும் வரை இரு நாடுகளுக்கும் இடையிலான பேச்சுவார்த்தைகள் நிறுத்தி வைக்கப்பட்டுள்ளன என்பது குறிப்பிடத்தக்கது.