இந்தியாவில் இருந்து இறக்குமதி செய்யப்படும் பொருட்களுக்கு 12.5 சதவீத கூடுதல் சுங்கவரி விதிக்க அமெரிக்கா முன்வைத்துள்ள திட்டத்தை மறுபரிசீலனை செய்ய வேண்டும் என்று இந்திய அரசு வலியுறுத்தியுள்ளது. மேலும், வர்த்தகப் பிரச்சினைகளை ஒருதலைப்பட்ச நடவடிக்கைகளால் அல்லாமல், இருதரப்பு பேச்சுவார்த்தை மூலம் தீர்க்க வேண்டும் என்றும் இந்தியா தெரிவித்துள்ளது.
அமெரிக்க வர்த்தக பிரதிநிதி அலுவலகம் (USTR) நடத்திய பொதுக் கருத்துக் கேட்புக் கூட்டத்தில், இந்திய வர்த்தகத் துறை இணைச் செயலாளர் பிரிஜ் மோகன் மிஸ்ரா இந்தியாவின் நிலைப்பாட்டை எடுத்துரைத்தார்.
அப்போது, கட்டாயத் தொழிலாளர் (Forced Labour) முறையை ஒழிப்பது இந்தியாவின் அரசியலமைப்புச் சட்டக் கடமையும், சர்வதேச அளவில் அளித்துள்ள உறுதிப்பாடும் என்றும் அவர் கூறினார்.
அதே நேரத்தில், அமெரிக்க வர்த்தகச் சட்டத்தின் Section 301-ன் கீழ் நடத்தப்பட்ட விசாரணை சட்ட ரீதியாகவும், உண்மைத் தகவல் அடிப்படையிலும் பல குறைபாடுகளைக் கொண்டுள்ளதாக இந்தியா சுட்டிக்காட்டியது.
இந்தியா உள்ளிட்ட 46 நாடுகளை ஒரே பிரிவில் சேர்த்து, இந்தியாவில் தயாரிக்கப்படும் பொருட்கள் கட்டாயத் தொழிலாளர்களால் உருவாக்கப்பட்டவை என்பதற்கான நாடு வாரியான உறுதியான ஆதாரங்கள் எதையும் USTR சமர்ப்பிக்கவில்லை என்றும் இந்தியா தெரிவித்தது.
இந்திய ஏற்றுமதியாளர்களுக்கு அநியாயமான போட்டி நன்மை கிடைக்க அரசின் கொள்கைகள் காரணமாக உள்ளன என்பதை நிரூபிக்கும் துறைவாரியான ஆதாரங்களுக்குப் பதிலாக, பொதுவான வர்த்தகத் தரவுகள் மற்றும் சில குறைந்த அளவிலான எடுத்துக்காட்டுகளை மட்டுமே USTR பயன்படுத்தியுள்ளதாகவும் இந்தியா குற்றம்சாட்டியது.
எனவே, முன்மொழியப்பட்ட 12.5 சதவீத சுங்கவரி முடிவை மறுபரிசீலனை செய்ய வேண்டும் என்றும், இந்தியா–அமெரிக்கா இடையே நடைபெற்று வரும் இருதரப்பு வர்த்தக பேச்சுவார்த்தையின் வாயிலாகவே அனைத்து வர்த்தகப் பிரச்சினைகளுக்கும் தீர்வு காண வேண்டும் என்றும் மிஸ்ரா வலியுறுத்தினார்.
வாஷிங்டனில் உள்ள இந்தியத் தூதரகத்தின் முதல் செயலாளரும், வேளாண் மற்றும் பதப்படுத்தப்பட்ட உணவுப் பொருட்கள் ஏற்றுமதி மேம்பாட்டு ஆணையத்தின் (APEDA) பிரதிநிதியுமான ஸ்ரேயான்ஸ் குப்தா, இந்திய அரிசி ஏற்றுமதி தொடர்பாக USTR வெளியிட்டுள்ள கருத்துகளையும் மறுத்தார்.
இந்தியா இறக்குமதி செய்யும் அரிசியின் அளவு மிகவும் குறைவானது என்றும், இந்தியா அமெரிக்காவுக்கு ஏற்றுமதி செய்யும் அரிசியின் மதிப்பில் அது 3 சதவீதத்திற்கும் குறைவானது என்றும் அவர் தெரிவித்தார்.
மேலும், இந்திய வேளாண் அமைச்சகத்தில் பதிவு செய்யப்பட்ட அரிசி ஆலைகளில் இருந்து மட்டுமே அமெரிக்காவுக்கு அரிசி ஏற்றுமதி செய்ய அனுமதி வழங்கப்படுவதாகவும், இந்தியாவுக்கு எதிரான விசாரணையை வாபஸ் பெற வேண்டும் அல்லது குறைந்தபட்சம் இந்திய அரிசி ஏற்றுமதிக்கு விலக்கு அளிக்க வேண்டும் என்றும் அவர் கோரிக்கை விடுத்தார்.
இந்திய தொழில்துறை அமைப்புகளான FICCI மற்றும் CII ஆகியவையும் இந்த கூடுதல் சுங்கவரிக்கு எதிர்ப்பு தெரிவித்துள்ளன. கூடுதல் சுங்கவரி விதிக்கப்பட்டால் இந்திய ஏற்றுமதியாளர்கள் மட்டுமல்லாமல், அமெரிக்க உற்பத்தியாளர்கள், இறக்குமதியாளர்கள், சில்லறை விற்பனையாளர்கள் மற்றும் நுகர்வோரும் பாதிக்கப்படுவார்கள்; மேலும், உலகளாவிய விநியோகச் சங்கிலியிலும் பாதிப்பு ஏற்படும் என்று அவை எச்சரித்துள்ளன.
கட்டாயத் தொழிலாளர் மற்றும் அதிகப்படியான தொழில்துறை உற்பத்தி தொடர்பாக 2026 மார்ச் மாதம் USTR, 60 நாடுகள் மீது இரண்டு தனித்தனி Section 301 விசாரணைகளை தொடங்கியது. பின்னர், ஜூன் 3 அன்று இந்தியா உள்ளிட்ட 54 நாடுகளின் பொருட்களுக்கு 12.5 சதவீத கூடுதல் சுங்கவரி விதிக்க முன்மொழிந்தது. கனடா மற்றும் ஐரோப்பிய ஒன்றியம் உள்ளிட்ட ஆறு நாடுகளுக்கு 10 சதவீத சுங்கவரி பரிந்துரைக்கப்பட்டுள்ளது.
இந்த சுங்கவரி முன்மொழிவுகள் இன்னும் இறுதி செய்யப்படவில்லை. பல்வேறு தரப்பினரின் கருத்துகளை ஆய்வு செய்த பிறகே அமெரிக்கா இறுதி முடிவை அறிவிக்க உள்ளது.
